ວິນລີ້ ໄຊວຸດ ຫຼື ວິນ ນັກແຕ້ມໜຸ່ມນ້ອຍຜູ້ທີ່ສ້າງຜົນງານຮູບແຕ້ມ ຄຣິສຕິນ່າ ລາສະສິມມາ ທີ່ໃຜໆເຫັນແລ້ວຕ່າງກໍບອກເປັນສຽງດຽວກັນວ່າ ສຸດຍອດ ແລະ ງາມຫຼາຍ.
ສຳລັບຮູບພາບນັ້ນ ວິນລີ້ໄດ້ບອກເຖິງແຮງບັນດານໃຈໃນການແຕ້ມວ່າ : “ຍ້ອນເປັນຄົນທີ່ມັກຮັກໃນລວດລາຍຢູ່ແລ້ວ ບວກກັບຊຸດປະຈຳຊາດປີນີ້ແມ່ນມີຄວາມງົດງາມຫລາຍ ເຊິ່ງປະສົມປະສານເອກະລັກອັນລ້ຳຄ່າຫລາຍໆຢ່າງຂອງລາວເຂົ້າໄປໄດ້ຢ່າງລົງຕົວ ເຊິ່ງໄດ້ບົ່ງບອກເຖິງວັດທະນະນຳ ແລະ ຮີດຄອງປະເພນີອັນດີງາມຂອງຫລວງພຣະບາງ ແລະ ທີ່ສຳຄັນທີ່ສຸດກໍເພື່ອເປັນການສົ່ງແຮງເຊຍແຮງໃຈໃຫ້ກັບເອື້ອຍ ຄຣິສຕິນ່າ ທີ່ເປັນຕົວແທນນາງງາມຂອງລາວເຂົ້າປະກວດໃນປີນີ້”
ຈຶ່ງໄດ້ສ້າງຜົນງານນີ້ຂຶ້ນມາໂດຍການແຕ້ມແບບດິຈິຕອລຜ່ານໂປຣແກຣມ Procreate ໃນ iPad ໂດຍໃຊ້ເວລາໃນການແຕ້ມໄປເຖິງ 12 ຊົ່ວໂມງກວ່າຈະໄດ້ເປັນຜົນງານທີ່ງົດງາມ ແລະ ລະອຽດອອກມາໃຫ້ພວກເຮົາໄດ້ເຫັນ.
ໂດຍສ່ວນຕົວແລ້ວວິນລີ້ເປັນຄົນທີ່ມັກແຕ້ມຮູບມາຕັ້ງແຕ່ຍັງນ້ອຍ, ມີຄວາມຕັ້ງໃຈໃນການສຶກສາ,ພັດທະນາສີມື ແລະ ຜະລິດຜົນງານອອກມາເລື້ອຍໆ “ຍ້ອນຮູ້ວ່າຕົນເອງມັກດ້ານນີ້ ກໍເລີຍພະຍາຍາມເຝິກຝົນຕົນເອງມາເລື້ອຍໆ ເພື່ອຈະມາຮຽນຢູ່ວິຈິດສິນໃຫ້ໄດ້ ເພາະຕອນນັ້ນຄິດວ່າມັນເປັນສິ່ງທີ່ຍາກຫລາຍ ໂດຍສະເພາະສຳລັບຄົນຕ່າງແຂວງຄືເຮົາ ” ວິນລີ້ກ່າວ.
ປັດຈຸບັນ ວິນລີ້ ອາຍຸ 20 ປີ ແລະ ກຳລັງສຶກສາຢູ່ທີ່ສະຖາບັນວິຈິດສິນແຫ່ງຊາດ ພາກວິຊາຈິດຕະກຳ ປີທີ 3.
ສາມາດຕິດຕາມຜົນງານຂອງວິນລີ້ໄດ້ທີ່ຊ່ອງທາງ
- Facebook : Willie xaiwouth
- Facebook Page : The Willie style
- Instagram : win_williexw
- YouTube : willie channel
ຕິດຕາມຂ່າວທັງໝົດຈາກ LaoX: https://laox.la/all-posts/
