ວິກິດລາຄານໍ້າມັນໂລກດັນ ສປປ ລາວ ຂາດດຸນການຄ້າ 465 ລ້ານໂດລາ, ກົດດັນຕໍ່ຄັງສຳຮອງເງິນຕາ

ລາຄານໍ້າມັນໂລກທີ່ພຸ່ງສູງຂຶ້ນໄດ້ສົ່ງຜົນກະທົບໂດຍກົງເຮັດໃຫ້ ສປປ ລາວ ປະເຊີນພາວະຂາດດຸນການຄ້າເຖິງ 465 ລ້ານໂດລາສະຫະລັດ ໃນໄລຍະ 8 ເດືອນຕົ້ນປີ 2026. ສະຖານະການນີ້ຍັງສືບຕໍ່ສ້າງຄວາມກົດດັນຕໍ່ຄັງສຳຮອງເງິນຕາຕ່າງປະເທດ.

ອີງຕາມຂໍ້ມູນສະຖິຕິຫຼ້າສຸດຈາກກົມການຄ້າຕ່າງປະເທດ, ພາບລວມຂອງມູນຄ່າການຄ້າຕ່າງປະເທດຂອງ ສປປ ລາວ ໃນໄລຍະ 8 ເດືອນຜ່ານມາ ສາມາດບັນລຸໄດ້ເຖິງ 14,3 ຕື້ກວ່າໂດລາສະຫະລັດ ແຕ່ຕົວເລກດັ່ງກ່າວໄດ້ແຝງໄວ້ດ້ວຍສິ່ງທ້າທາຍອັນໃຫຍ່ຫຼວງ.

ເຖິງແມ່ນວ່າພາກການສົ່ງອອກຈະສາມາດສ້າງລາຍຮັບເຂົ້າປະເທດໄດ້ເຖິງ 6.928 ລ້ານກວ່າໂດລາສະຫະລັດ ແຕ່ກໍຍັງບໍ່ສາມາດແບກຮັບມູນຄ່າການນຳເຂົ້າລວມທີ່ຖີບຕົວສູງເຖິງ 7.394 ລ້ານກວ່າໂດລາສະຫະລັດໄດ້ ເຊິ່ງສົ່ງຜົນໃຫ້ປະເທດຕົກຢູ່ໃນສະຖານະຂາດດຸນການຄ້າລວມ -465 ລ້ານກວ່າໂດລາສະຫະລັດ.

ປັດໄຈຫຼັກທີ່ຢູ່ເບື້ອງຫຼັງການຂາດດຸນຢ່າງໜັກໜ່ວງໃນຄັ້ງນີ້ ແມ່ນມາຈາກຄວາມແຕກໂຕນຂອງລາຄານໍ້າມັນກາຊວນໃນຕະຫຼາດໂລກທີ່ໄດ້ກາຍເປັນພາລະອັນໜັກໜ່ວງທີ່ສຸດຂອງປະເທດ.

ເມື່ອເຈາະເລິກເບິ່ງຂໍ້ມູນຈະເຫັນໄດ້ຢ່າງຊັດເຈນວ່າ ຜົນກະທົບຈາກວິກິດພະລັງງານໂລກໄດ້ດູດເອົາເງິນຕາຕ່າງປະເທດອອກໄປຢ່າງມະຫາສານ ໂດຍສະເພາະໃນເດືອນເມສາ ປີ 2026 ມູນຄ່າການນຳເຂົ້ານໍ້າມັນກາຊວນຂອງລາວໄດ້ພຸ່ງຂຶ້ນໄປສູງເຖິງ 216 ລ້ານໂດລາສະຫະລັດ ເຊິ່ງເພີ່ມຂຶ້ນຫຼາຍກວ່າສອງເທົ່າຕົວເມື່ອທຽບໃສ່ເດືອນດຽວກັນຂອງປີ 2025 ກ່ອນເກີດວິກິດ ທີ່ມູນຄ່າການນຳເຂົ້າສະເລ່ຍພຽງ 89 ລ້ານໂດລາ.

ສະຖານະການດັ່ງກ່າວຍັງຄົງແກ່ຍາວມາເຖິງເດືອນກໍລະກົດ ປີ 2026 ທີ່ມູນຄ່າການນຳເຂົ້ານໍ້າມັນກາຊວນຍັງຄົງສູງເຖິງ 122 ລ້ານໂດລາສະຫະລັດ ທຽບໃສ່ພຽງ 58 ລ້ານໂດລາໃນໄລຍະດຽວກັນຂອງປີກາຍ. ໂຕເລກເຫຼົ່ານີ້ສະທ້ອນໃຫ້ເຫັນວ່າ ມູນຄ່າການຂາດດຸນບໍ່ໄດ້ເກີດຈາກປະລິມານການຊົມໃຊ້ທີ່ເພີ່ມຂຶ້ນຫຼາຍ ແຕ່ເກີດຈາກລາຄານຳເຂົ້າທີ່ແພງຂຶ້ນຈົນກົດດັນດຸນການຄ້າຂອງປະເທດຢ່າງໜັກ.

ເຖິງຢ່າງໃດກໍຕາມ, ເສດຖະກິດຂອງປະເທດຍັງໄດ້ຮັບການຫໍ່ຫຸ້ມຈາກຂະແໜງການສົ່ງອອກທີ່ຍັງຄົງຮັກສາລະດັບການເຕີບໂຕໄວ້ໄດ້ ໂດຍສະເພາະແມ່ນໝວດສິນຄ້າປະເພດຄຳປະສົມ ແລະ ຄຳແທ່ງ ທີ່ກາຍເປັນສິນຄ້າສົ່ງອອກອັນດັບໜຶ່ງ ດ້ວຍການສ້າງລາຍຮັບສູງເຖິງ 1.156 ລ້ານໂດລາສະຫະລັດ ປະຕິບັດຕາມດ້ວຍການສົ່ງອອກເກືອກາລີມູນຄ່າ 873 ລ້ານໂດລາສະຫະລັດ ແລະ ເຄື່ອງໃຊ້ໄຟຟ້າອີກກວ່າ 712 ລ້ານໂດລາສະຫະລັດ. ແຕ່ລາຍຮັບອັນມະຫາສານເຫຼົ່ານີ້ກໍຕ້ອງຖືກນຳໄປຊົດເຊີຍກັບການນຳເຂົ້າວັດຖຸມີຄ່າທີ່ມີມູນຄ່າສູງເຖິງ 1.024 ລ້ານໂດລາສະຫະລັດ ນອກເໜືອຈາກການນຳເຂົ້ານໍ້າມັນກາຊວນທີ່ສູງເຖິງ 1.037 ລ້ານໂດລາສະຫະລັດ.

ສຳລັບທິດທາງຂອງກະແສການຄ້າໃນພາກພື້ນ, ສາທາລະນະລັດ ປະຊາຊົນຈີນ ຍັງຄົງຮັກສາຕຳແໜ່ງຕະຫຼາດສົ່ງອອກລາຍໃຫຍ່ທີ່ສຸດຂອງລາວດ້ວຍມູນຄ່າກວ່າ 2.675 ລ້ານໂດລາສະຫະລັດ ຮອງລົງມາແມ່ນຫວຽດນາມ ທີ່ 1.205 ລ້ານໂດລາສະຫະລັດ ແລະ ໄທ 855 ລ້ານໂດລາສະຫະລັດ. ໃນທາງກົງກັນຂ້າມ, ປະເທດໄທກໍຍັງຄົງເປັນແຫຼ່ງນຳເຂົ້າສິນຄ້າຫຼັກທີ່ສຸດຂອງລາວດ້ວຍມູນຄ່າທີ່ສູງເຖິງ 3.540 ລ້ານໂດລາສະຫະລັດ ຕາມມາດ້ວຍການນຳເຂົ້າຈາກປະເທດຈີນ 2.357 ລ້ານໂດລາສະຫະລັດ.

#LaoXperts #ເສດຖະກິດລາວ #ການຄ້າຕ່າງປະເທດ #ລາຄານໍ້າມັນ #ຂາດດຸນການຄ້າ #ຂ່າວເສດຖະກິດ #LaosEconomy