ລັດຖະບານລາວ ກໍຄືກະຊວງເຕັກໂນໂລຊີ ແລະ ສື່ສານ ໄດ້ຮ່ວມມືກັບບັນດາບໍລິສັດຍີ່ປຸ່ນ ເພື່ອສຶກສາຄົ້ນຄວ້າ ແລະ ຕີລາຄາຄວາມພ້ອມຂອງລາວໃນການພັດທະນາບັນດາໂຄງການຊອບແວ ແລະ ແອັບພລິເຄຊັນ ພັດທະນາລະບົບ ພິສູດ ແລະ ຢືນຢັນຕົວຕົນຜ່ານລະບົບ ດິຈິຕອລ ຫຼື digital ID systems.
ໂດຍກອງປະຊຸມປຶກສາຫາລືດັ່ກ່າວ ມີຂຶ້ນເມື່ອບໍ່ດົນມານີ້ ພາຍໃຕ້ການເປັນປະທານຂອງ ທ່ານ ມີທ່ານ ແກ້ວວິສຸກ ໂສລະພົມ ຮອງລັດຖະມົນຕີກະຊວງເຕັກໂນໂລຊີ ແລະ ສື່ສານ ແລະ ເຂົ້າຮ່ວມໂດຍທ່ານ Shinya Shimada, ຫົວໜ້າສູນບໍລິຫານລັດດິຈິຕອລ, ຜູ້ຕາງໜ້າບໍລິສັດ Ryobi System ຂອງຍີ່ປຸ່ນ ແລະ ບໍລິສັດ NEC Corporation, ແລະ ຈາກບັນດາກົມກອງທີ່ກ່ຽວຂ້ອງເຂົ້າຮ່ວມ.
ການໂອ້ລົມດັ່ງກ່າວ ເກີດທ່າມກາງ ຄວາມພະຍາຍາມໃນການຫັນເປັນດິຈິຕອລ ຂອງ ສປປ ລາວ ພາຍໃຕ້ວິໄສທັດການພັດທະນາເສດຖະກິດດິຈິຕອລແຫ່ງຊາດ ໄລຍະ 20 ປີ, ຍຸດທະສາດການພັດທະນາເສດຖະກິດດິຈິຕອລ ແຫ່ງຊາດ ໄລຍະ 10 ປີ ແລະ ແຜນພັດທະນາເສດຖະກິດດິຈິຕອລ ແຫ່ງຊາດ ໄລຍະ 5 ປີ (201-2025) ຂອງ ສປປ ລາວ ແລະ ການນຳໃຊ້ເຕັກໂນໂລຊີກຸ່ມຂໍ້ມູນຜູກພັນໃນການສ້າງເສດຖະກິດດິຈິຕອລ.
ໂດຍກອງປະຊຸມດັ່ງກ່າວ ໄດ້ປຶກສາຫາລືກ່ຽວກັບການຈັດຕັ້ງຂອບເຂດການຮ່ວມມືເພື່ອດຳເນີນການສຶກສາ ແລະ ກຳນົດທິດຂອງແຕ່ລະຝ່າຍທີ່ກ່ຽວຂ້ອງໃນການພັດທະນາລະບົບ. ສອງຝ່າຍຈະນຳໃຊ້ block chain ໃນການພັດທະນາຂະແໜງການຕ່າງໆຂອງລັດຖະບານ ໂດຍຫັນຈາກລະບົບແບບເກົ່າ ໄປຫາລະບົບແບບ ດິຈິຕອລ, ເຮັດໃຫ້ການບໍລິຫານມີປະສິດທິຜົນກວ່າເກົ່າ, ເຮັດໃຫ້ເສດຖະກິດມະຫາພາກມີຄວາມໝັ້ນຄົງ ແລະ ເຊື່ອມໂຍງເຂົ້າກັບສາກົນໄດ້ດີກວ່າ.
ໂຄງການດັ່ງກ່າວ ຈະເລີ່ມພັດທະນາຜ່ານ ຊອບແວ ແລະ ແອັບພິເຄຊັນເພື່ອປັບປຸງລະບົບການຈັດການ ແລະ ບໍລິຫານ ລວມເຖິງການບໍລິການຂອງພາກລັດ ແລະ ສັງຄົມ: ລະບຸຕົວຕົນດ້ວຍລະບົບດິຈິຕອລ (digital identity) ລະບຸທີ່ຢູ່ອາໄສຜ່ານ ອີເລັກໂທຣນິກ (e-residence), ການເງິນ ດິຈິຕອລ (e-finance), ສຸຂະພາບ ອິເລັກໂທຣນິກ (e-health) ແລະ ການສຶກສາແບບອີເລັກໂທຣນິກ (e-schooling).
ທ່ານ ແກ້ວວິສຸກ ກ່າວວ່າ: ກະຊວງເຕັກໂນໂລຊີ ແລະ ສື່ສານມີຄວາມສຳພັນທີ່ໃກ້ຊິດກັບບັນດາບໍລິສັດສື່ສານຂອງຍີ່ປຸ່ນ, ການຮ່ວມມືນີ້ຊ່ວຍເພີ່ມທະວີການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຮອບດ້ານລະຫວ່າງສອງປະເທດ.
ສູນບໍລິຫານລັດດິຈິຕອລຈະປະສານສົມທົບກັບບໍລິສັດ Ryobi System ແລະ NEC Corporation ໃນການຄົ້ນຄວ້າທາງດ້ານກົດໝາຍ ແລະ ເຕັກນິກ ເພື່ອຮັບປະກັນໃຫ້ທຸກພາກສ່ວນເຮັດວຽກຮ່ວມກັນ, ເພື່ອບັນລຸພື້ນຖານການຈັດຕັ້ງປະຕິບັດໃນອະນາຄົດ.
ຂໍ້ມູນຈາກ: http://vientianetimes.org.la/sub-new/Current/Cur_172_Laos_Japan_y23.php
ຕິດຕາມຂ່າວທັງໝົດຈາກ LaoX: https://laox.la/all-posts/
