ອີງຕາມການລາຍງານຂອງ ສື່ມວນຊົນ ຫວຽດນາມ ລັດຖະບານຫວຽດນາມ ກະຊວງຄົມມະນາຄົມຂົນສົ່ງຫວຽດນາມ ເຫັນດີໃຫ້ການຮ່ວມມືລະຫວ່າງບໍລິສັດພັດທະນາພື້ນຖານໂຄງລ່າງຫວຽດນາມ Deo Ca Group JSC ແລະ ບໍລິສັດນ້ຳມັນເຊື້ອໄຟລາວມະຫາຊົນ (PetroTrade) ເພື່ອກໍ່ສ້າງທາງລົດໄຟເຊື່ອມຕໍ່ສອງປະເທດ.
ກະຊວງໄດ້ຮັບເອົາຂໍ້ສະເໜີຂອງບໍລິສັດຮ່ວມທຶນກໍ່ສ້າງທາງລົດໄຟ Vung Ang-Tan Ap-Mụ Giạ ໃນຮູບແບບການຮ່ວມມືພາກລັດ-ເອກະຊົນ (PPP), ໂດຍອ້າງອີງຕາມຄຳເຫັນຂອງທ່ານ ຫງວຽນກວາງວິງ ຜູ້ອຳນວຍການໃຫຍ່ກຸ່ມບໍລິສັດ Deo Ca JSC.
ການຮ່ວມທຶນໃນຖານະຜູ້ລົງທຶນໂຄງການແມ່ນຕ້ອງດໍາເນີນການສຶກສາຄວາມເປັນໄປໄດ້ກ່ອນ ແລະ ສົ່ງບົດລາຍງານການປະເມີນຕາມລະບຽບກົດໝາຍວ່າດ້ວຍການລົງທຶນ, ກົດໝາຍວ່າດ້ວຍລົດໄຟ, ກົດໝາຍທີ່ກ່ຽວຂ້ອງ ແລະ ແຜນການໃນການວາງແຜນ.
ໂຄງການທາງລົດໄຟ Vung Ang-Tan Ap-Mụ Giạ ແມ່ນສ່ວນໜຶ່ງຂອງທາງລົດໄຟວຽງຈັນ-ຫວຸງແອງ, ເຊິ່ງໄດ້ລວມເຂົ້າໃນແຜນການພັດທະນາຕາໜ່າງທາງລົດໄຟແຫ່ງຊາດໄລຍະ 2021 – 2030, ດ້ວຍວິໄສທັດຮອດປີ 2050. ມີຄວາມຍາວ 103 ກິໂລແມັດ. ແລະ ຄາດວ່າຈະມີມູນຄ່າເກືອບ 27,5 ຕື້ດົ່ງ (1,12 ຕື້ໂດລາສະຫະລັດ).
ໂດຍໂຄງການນີ້ ຈະເປັນໂຄງການສຳຄັນ, ເປັນສ່ວນໜຶ່ງຂອງໂຄງການທາງລົດໄຟຫວຽດນາມ – ລາວ ໂດຍລວມ, ແລະ ແມ່ນໜຶ່ງໃນບັນດາບູລິມະສິດຂອງລັດຖະບານຫວຽດນາມ ແລະ ລາວ.
ເສັ້ນທາງລົດໄຟ ວຽງຈັນ-ຫວຸງແອງມີຄວາມຍາວທັງໝົດ 554.7 ກິໂລແມັດ ຈາກທ່າເຮືອຫວຸງແອງ ແຂວງ ຮ່າຕິ້ງ ຫາ ນະຄອນຫຼວງວຽງຈັນ. ໂຄງການດັ່ງກ່າວຈະໄດ້ຮັບການກໍ່ສ້າງພາຍໃຕ້ການຮ່ວມມືພາກລັດ-ເອກະຊົນ, ດ້ວຍຍອດຈຳນວນເງິນລົງທຶນ 149,550 ຕື້ດົງ (6,3 ຕື້ໂດລາສະຫະລັດ).
ທ່າເຮື່ອຫວຸງແອງ ຈະມີບົດບາດສຳຄັນໃນການຊຸກຍູ້ການພົວພັນດ້ານເສດຖະກິດຂອງສອງປະເທດໂດຍຜ່ານການແລກປ່ຽນການຄ້າ ແລະ ການຂົນສົ່ງທາງທະເລ, ແນໃສ່ຕະຫຼາດພາກຕາເວັນອອກສຽງເໜືອຂອງໄທ, ຈີນ, ສ.ເກົາຫຼີ ແລະ ຍີ່ປຸ່ນ.
ໃນເດືອນແລ້ວນີ້ PetroTrade ໄດ້ລົງນາມໃນຂໍ້ຕົກລົງກັບ ບໍລິສັດ Yooshin Engineering Corporation ແລະ ທາງລົດໄຟແຫ່ງຊາດ ສ.ເກົາຫຼີ ເພື່ອກະກຽມການອອກແບບລະອຽດຂອງເສັ້ນທາງລົດໄຟ ວຽງຈັນ-ຫວຸງແອງ ທີ່ເຊື່ອມຕໍ່ເມືອງ ທ່າແຂກ ແຂວງຄຳມ່ວນ ກັບຝັ່ງລາວ ຊາຍແດນລາວ-ຫວຽດນາມ.
ຕິດຕາມຂ່າວທັງໝົດຈາກ LaoX: https://laox.la/all-posts/