ລັດຖະບານລາວ ປະກາດສ້າງຕັ້ງ “ມະຫາວິທະຍາໄລສ້າງຄູແຫ່ງຊາດ” ພ້ອມສະຫຼອງວັນຄູແຫ່ງຊາດ ຄົບຮອບ 32 ປີ
ກະຊວງສຶກສາທິການ ແລະ ກິລາ (ສສກ) ປະກາດສ້າງຕັ້ງ ມະຫາວິທະຍາໄລສ້າງຄູແຫ່ງຊາດ (ມສຊ) ຢ່າງເປັນທາງການ ໃນວັນທີ 6 ຕຸລາ 2026, ພ້ອມທັງຈັດພິທີສະເຫຼີມສະຫຼອງວັນຄູແຫ່ງຊາດ ຄົບຮອບ 32 ປີ (7 ຕຸລາ 1994 – 7 ຕຸລາ 2026) ເພື່ອແນໃສ່ຍົກລະດັບມາດຕະຖານການສ້າງຄູ ແລະ ຕອບສະໜອງການປ່ຽນແປງຂອງລະບົບການສຶກສາໃນຍຸກດິຈິຕອນ.
ຕາມການລາຍງານຂອງ ໜັງສືພີມ ປະຊາຊົນ, ພິທີດັ່ງກ່າວຈັດຂຶ້ນທີ່ວິທະຍາເຂດ ມສຊ (ບ້ານດົງຄໍາຊ້າງ, ເມືອງຫາດຊາຍຟອງ) ໂດຍການເປັນກຽດເຂົ້າຮ່ວມຂອງ ທ່ານ ທອງສະລິດ ມັງໜໍ່ເມກ ຮອງນາຍົກລັດຖະມົນຕີ ແລະ ລັດຖະມົນຕີກະຊວງ ສສກ.
ໃນງານໄດ້ມີການປະກາດດຳລັດແຕ່ງຕັ້ງ ທ່ານ ຫຼ້າວັນ ວົງຄໍາສານ ຂຶ້ນດຳລົງຕຳແໜ່ງເປັນ ຜູ້ອໍານວຍການໃຫຍ່ ມສຊ ຄົນທຳອິດ, ພ້ອມດ້ວຍຮອງຜູ້ອຳນວຍການໃຫຍ່ອີກ 2 ທ່ານ ຄື: ທ່ານ ນາງ ວົງເດືອນ ໂອໃສ ແລະ ທ່ານ ນາງ ວັນແສງ ຈຸນລະມະນີ.
ເພື່ອຮັບປະກັນຄຸນນະພາບການສຶກສາໃນໄລຍະໃໝ່, ທ່ານ ທອງສະລິດ ມັງໜໍ່ເມກ ໄດ້ຊີ້ນຳທິດທາງການປັບປຸງລະບົບການສ້າງຄູ ແລະ ໄດ້ມອບ 7 ວຽກງານຈຸດສຸມ ໃຫ້ແກ່ ມສຊ ນຳໄປຈັດຕັ້ງປະຕິບັດຢ່າງເປັນຮູບປະທຳ ເຊິ່ງປະກອບມີ: ການບໍລິຫານ ປັບປຸງກົນໄກຄຸ້ມຄອງບໍລິຫານ ແລະ ວິຊາການ ໃຫ້ທັນສະໄໝ ແລະ ເຊື່ອມໂຍງສາກົນ; ການພັດທະນາບຸກຄະລາກອນ ສ້າງ “ຄູຍຸກໃໝ່” ໃຫ້ມີ 4 ທັກສະຫຼັກ ຄື: ທັກສະດິຈິຕອນ (AI, ເຕັກໂນໂລຊີ), ທັກສະຊີວິດ, ທັກສະອາຊີບ ແລະ ການເປັນຜູ້ປະກອບການ; ການປະຕິຮູບລະບົບ ກະກຽມຄວາມພ້ອມຫຼັກສູດໃໝ່ (6+3+3) ແລະ ຫັນຈາກລະບົບຄູອາສາສະໝັກ ໄປສູ່ລະບົບຄູທົດແທນຢ່າງເປັນລະບົບ; ການເປັນແບບຢ່າງສ້າງຄວາມເປັນແບບຢ່າງຮອບດ້ານໃຫ້ແກ່ຜູ້ອຳນວຍການສະຖານການສຶກສາ; ສະຫວັດດີການ ກໍຄືການປະຕິບັດນະໂຍບາຍຕ່າງໆ ຕໍ່ຄູ-ອາຈານ ຢ່າງສົມກຽດ; ການຮ່ວມມື ໂດຍເພີ່ມທະວີການຮ່ວມມືກັບສະຖານການສຶກສາທັງພາຍໃນ ແລະ ຕ່າງປະເທດ; ການຮ່ວມມືສາກົນ ຍາດແຍ່ງການຮ່ວມມືສາກົນ ໂດຍກຳແໜ້ນຫຼັກການ “ເຊື່ອມໂຍງ ແຕ່ບໍ່ເຊື່ອມສະຫຼາຍ”.
ໃນໂອກາດດຽວກັນ, ທ່ານຮອງນາຍົກລັດຖະມົນຕີ ຍັງໄດ້ກ່າວປາຖະກະຖາຮຳນຶກເຖິງປະຫວັດຄວາມເປັນມາຂອງວັນຄູແຫ່ງຊາດ 7 ຕຸລາ ແລະ ຄຸນງາມຄວາມດີຂອງ “ນາຍຄູຄຳ” ຜູ້ເປັນຄູລາວຄົນທຳອິດທີ່ເປັນແບບຢ່າງດ້ານຄວາມຮັກຊາດ. ພ້ອມທັງໄດ້ຍົກຄຳເວົ້າອຳມະຕະຂອງ ປະທານ ໄກສອນ ພົມວິຫານ ທີ່ວ່າ: “ຄູແມ່ນກຳລັງຫຼັກແຫຼ່ງແກ່ນສານ ຂອງການສຶກສາ, ແມ່ນຜູ້ຕາງໜ້າສັງຄົມ, ຕາງໜ້າລັດ ເພື່ອສຶກສາອົບຮົມຜູ້ໜຸ່ມນ້ອຍ ແລະ ຄົນຮຸ່ນໃໝ່” ເພື່ອປຸກລະດົມຈິດໃຈ ແລະ ໃຫ້ທິດຊີ້ນຳໃນການສ້າງຄູໃຫ້ໄດ້ມາດຕະຖານ, ມີຈັນຍາບັນ ແລະ ຮັບປະກັນການສະໜອງຄູໃຫ້ພຽງພໍ ໂດຍສະເພາະໃນເຂດຫ່າງໄກສອກຫຼີກ.
ນອກຈາກການເປີດໂຕມະຫາວິທະຍາໄລແຫ່ງໃໝ່ແລ້ວ, ພາຍໃນງານຍັງໄດ້ມີການປະກາດເລື່ອນຊັ້ນ ແລະ ຍ້ອງຍໍບຸກຄະລາກອນການສຶກສາ ໂດຍມີການແຕ່ງຕັ້ງຮອງສາດສະດາຈານໃໝ່ຈໍານວນ 12 ທ່ານ, ມອບຂໍ້ຕົກລົງຍ້ອງຍໍຄູພິການດີເດັ່ນ 2 ທ່ານ ແລະ ແຕ່ງຕັ້ງພະນັກງານບໍລິຫານຂອງ ມສຊ ອີກ 16 ທ່ານ.
ພິທີດັ່ງກ່າວໄດ້ດຳເນີນໄປດ້ວຍບັນຍາກາດອັນຟົດຟື້ນ ໂດຍມີການສະແດງສິລະປະ, ບົດຟ້ອນອວຍພອນ, ການອ່ານກອນ ແລະ ການຮ້ອງເພງ “7 ຕຸລາໝັ້ນຍືນ” ຈາກນັກຮຽນ-ນັກສຶກສາ ເພື່ອສະແດງຄວາມກະຕັນຍູກະຕະເວທີຕໍ່ແມ່ພິມຂອງຊາດ ທີ່ໄດ້ເສຍສະຫຼະເຫື່ອແຮງໃນການສ້າງຊັບພະຍາກອນມະນຸດໃຫ້ແກ່ປະເທດຊາດ.
#LaoX #ວັນຄູແຫ່ງຊາດ #ວັນຄູແຫ່ງຊາດ7ຕຸລາ #ມະຫາວິທະຍາໄລສ້າງຄູແຫ່ງຊາດ #ມສຊ #ກະຊວງສຶກສາທິການແລະກິລາ #ການສຶກສາລາວ #ຄູຍຸກໃໝ່ #ຂ່າວລາວ #ຂ່າວການສຶກສາ
