ນັດສຸດທ້າຍທີ່ພົບກັບການແຂ່ງກັບເຈົ້າຖິ່ນຢ່າງມົງໂກລີ ແລະ ທີມຊາດລາວເຮົາກໍເອົາຊະນະທີມຊາດມົງໂກລີຢ່າງດຸເດືອດ ສົ່ງສຽງມ່ວນມັນໃຫ້ກັບແຟນບານທີ່ເຊຍທັງຂອບສະໜາມ ແລະ ຊົມຜ່ານການຖ່າຍທອດສົດ.
ຈາກຜົນການແຂ່ງຂັນທີ່ທີມຊາດລາວ ຊະນະ ມົງໂກລີ 3-2 ໃນການແຂ່ງຂັນບານເຕະຊິງແຊ້ມອາຊີ ຮຸ່ນອາຍຸບໍ່ເກີນ 23 ປີ 2022 ຮອບຄັດເລືອກກຸ່ມ J ວັນອາທິດ 31 ຕຸລາ 2021 ທີ່ຜ່ານມາ. ທີມຊາດລາວຈົບອັນດັບທີ 3 ຂອງກຸ່ມ, ສ່ວນທີມຊາດໄທເຂົ້າຮອບໃນຖານະອັນດັບທີ 2.
ຜົນການແຂ່ງຂັນ ທີມຊາດລາວ ຢູ 23 ໄດ້ປະຕູຈາກ: ບຸນພະຈັນ ບຸນກອງ ນາທີ 6’ ກັບ ນາທີ 74’ ແລະ ຈາກການສະກັດບານເຂົ້າປະຕູຕົນເອງຂອງນັກກິລາ ມົງໂກລີ BAT-ORGIL ນາທີ 46’.
ທີມຊາດມົງໂກລີ ໄດ້ປະຕູຈາກ: ການສະກັດບານເຂົ້າປະຕູຕົນເອງຂອງນັກກິລາລາວ ພຸດທະວົງ ສັງວິໄລ ນາທີ 22’ ແລະ ໄດ້ປະຕູຈາກນັກກິລາ OYUNBOLD ນາທີ 23’.
ສະຫຼຸບ ທີມຊາດລາວ ລົງສະໜາມ 3 ນັດ ຊະນະ 1, ເສຍ 2 ມີ 3 ຄະແນນເປັນອັບດັບ 3 ຂອງ ກຸ່ມ J.
ນອກຈາກນີ້ ບຸນພະຈັນ ໄດ້ກ່າວຫຼັງຈົບເກມວ່າ: “ເກມທີ່ພົບກັບມົງໂກລີ ແມ່ນໄດ້ພະຍາຍາມເຮັດຢ່າງເຕັມທີ່ແລ້ວ ເພື່ອຊາວລາວທຸກຄົນ ແລະ ດີໃຈທີ່ສາມາດເກັບໄຊຊະນະເໜືອມົງໂກລີໄດ້, ຮູ້ສຶກດີໃຈທີ່ພວກເຮົາຊ່ວຍກັນ ແລະ ເຮັດໃຫ້ເຮົາມີແຮງຊຸກຍູ້ໃຫ້ຕົນເອງຍິງໄດ້ 2 ປະຕູ ເພື່ອທີມແລ້ວກໍເພື່ອປະຊາຊົນລາວທຸກຄົນ”.
ບຸນພະຈັນກ່າວຕື່ມອີກວ່າ: “ຂອບໃຈກອງເຊຍ ທີ່ມາເຊຍພວກເຮົາທຸກນັດ ເຖິງພວກເຮົາຈະພາດມາ 2 ເກມກໍຕາມ ແລະ ຂອບໃຈກອງເຊຍທາງບ້ານ ເກມນີ້ກໍເຮັດເຕັມທີ່ເພື່ອພວກເຮົາ ແລະ ຊາວລາວທຸກຄົນ”.
ບານເຕະ ຢູ 23 ຊິງແຊ້ມເອເຊຍ 2022 ຮອບສຸດທ້າຍ ຈະຈັດການແຂ່ງຂັນຂຶ້ນໃນວັນທີ 1-19 ມິຖຸນາ ປີ 2022 ທີ່ປະເທດອຸດເບກິສຖານ.
ແນວໃດທີມຊາດລາວເຮົາກໍສູ້ຊົນຕໍ່ໄປ.
ຂອບໃຈຂໍ້ມູນຈາກ:
ຕິດຕາມຂ່າວທັງໝົດຈາກ LaoX: https://laox.la/all-posts/
