ໃນວັນທີ 16 ມັງກອນ, ສຳນັກງານຂ່າວຕ່າງປະເທດໄດ້ມີການລາຍງານວ່າ Ping An Bank Co. ບໍລິສັດຜູ້ໃຫ້ກູ້ຢືມລາຍໃຫຍ່ຂອງຈີນ ໄດ້ຈັດອັນດັບບໍລິສັດ 41 ແຫ່ງໃນບັນຊີລາຍຊື່ຂອງບໍລິສັດພັດທະນາອະສັງຫາລິມະຊັບທີ່ມີສິດໄດ້ຮັບການສະໜັບສະໜູນດ້ານເງິນທຶນ. ເຊິ່ງນີ້ຖືເປັນການເຄື່ອນໄຫວຫຼ້າສຸດເພື່ອຊ່ວຍເຫຼືອຂະແໜງອະສັງຫາລິມະຊັບຂອງປະເທດທີ່ກຳລັງປະເຊີນກັບບັນຫາວິກິດການອະສັງຫາລິມະຊັບໃນຕອນນີ້.
Ping An Bank ໄດ້ຕັດສິນໃຈປັບມາດຕະຖານທີ່ກ່ຽວຂ້ອງເຖິງການຂະຫຍາຍວົງເງິນສິນເຊື່ອເພື່ອຕອບສະໜອງຄວາມຕ້ອງການທຶນທີ່ເໝາະສົມຂອງບັນດາບໍລິສັດອະສັງຫາລິມະຊັບ. ນີ້ແມ່ນພາລະກິດທີ່ໄດ້ວາງອອກໃນກອງປະຊຸມເສດຖະກິດປະຈຳປີຄັ້ງໃຫຍ່ຂອງລັດຖະບານໃນເດືອນຜ່ານມາ.
ທັງນີ້, Ping An Bank ຍັງໄດ້ແຈກຢາຍລາຍຊື່ໄປໃຫ້ພະແນກ ແລະ ສາຂາຕ່າງໆຂອງບໍລິສັດໃນຕົ້ນເດືອນນີ້ ວ່າຄວນຈະຂະຫຍາຍການສະໜັບສະໜູນການໃຫ້ສິນເຊື່ອຢ່າງເຕັມທີ່ແກ່ບໍລິສັດພັດທະນາອະສັງຫາລິມະຊັບທີ່ດໍາເນີນທຸລະກິດທີ່ດຳເນີນງານຕາມປົກກະຕິ; ແລະ ຫຼີກເວັ້ນຈາກການຕັດ ຫຼື ໂຈະການຈຳກັດສິນເຊື່ອ. ອີກທັງທະນາຄານຍັງໄດ້ຮຽກຮ້ອງໃຫ້ນໍາໃຊ້ການຂະຫຍາຍເວລາໃຫ້ຄົບຕາມກຳນົດ ແລະ ກຳນົດຕາຕະລາງໃນການຊຳລະເງິນຈໃໝ່ເພື່ອຫຼຸດຜ່ອນຄວາມກົດດັນດ້ານສະພາບຄ່ອງ. ໂດຍຫຼາຍກວ່າເຄິ່ງໜຶ່ງຂອງບໍລິສັດອະສັງຫາລິມະຊັບຢູ່ໃນບັນຊີລາຍຊື່ແມ່ນໄດ້ຮັບການສະໜັບສະໜູນຈາກພາກລັດ ເຊິ່ງນີ້ລວມມີບໍລິສັດ Poly Property Group Co. ແລະ ບໍລິສັດ Beijing Urban Construction Group Co., ໃນຂະນະສ່ວນທີ່ເຫຼືອແມ່ນກວມເອົາພາກເອກະຊົນເຊັ່ນ: Longfor Group Holdings Ltd., China Vanke Co. ແລະ Gemdale Corp.
ນອກຈາກນີ້ໃນບັນຊີລາຍການຊື່ດັ່ງກ່າວຍັງລວມມີບັນດາບໍລິສັດອະສັງຫາລິມະຊັບເຊັ່ນ: Hangzhou Binjiang Group Co. ແລະ Greentown China Holdings Ltd., ລວມເຖິງຜູ້ພັດທະນາທີ່ຕັ້ງຢູ່ໃນຮ່ອງກົງເຊັ່ນ: ບໍລິສັດ New World Development ແລະ Sun Hung Kai Properties Ltd.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/