ເພື່ອຕ້ານການເພີ່ມຂຶ້ນຂອງຄ່າຄອງຊີບ, ລັດຖະບານນິວຊີແລນໄດ້ຖອນພາສີນ້ຳມັນເຊື້ອໄຟ 25 ເຊັນ ຫຼື ປະມານ 1,800 ກີບ ຊົ່ວຄາວ ເປັນເວລາ 3 ເດືອນ ແລະໄດ້ແຈ້ງໃຫ້ບໍລິສັດນ້ຳມັນເຊື້ອໄຟຍົກເລີກການເກັບພາສີກັບປະຊາຊົນ ເຊິ່ງຈະຊ່ວຍໃຫ້ປະຊາຊົນປະຢັດເງິນໃນການຕື່ມນໍ້າມັນໄປປະມານ 126,000 ກີບ ໃນການໃສ່ເຕັມຖັງ 40 ລິດ ແລະ ປະມານ 195,000 ກີບສໍາລັບຖັງ 60 ລິດ.
ຈາຊິນດາ ອາຣ໌ເດິຣ໌ນ (Jacinda Ardern), ນາຍົກລັດຖະມົນຕີນິວຊີແລນ ໄດ້ຖະແຫຼງການວ່າລັດຖະບານມີແຜນຈະລົດພາສີນ້ຳມັນເຊື້ອໄຟ ແລະ ຄ່າທຳນຽມໃນການໃຊ້ຖະໜົນ 25 ເຊັນຂອງນິວຊີແລນ ນັບແຕ່ວັນທີ 15 ມີນານີ້ເປັນຕົ້ນໄປ ແລ້ວຈະສືບຕໍ່ເປັນເວລາ 3 ເດືອນ.
ນອກຈາກນີ້ ຄ່າໂດຍສານສາທາລະນະກໍຈະຖືກລົດລົງເຄິ່ງໜຶ່ງນັບແຕ່ວັນທີ 1 ເມສາ. ນະໂຍບາຍນີ້ເປັນສ່ວນໜຶ່ງຂອງມາດຕະການຫຼຸດຜ່ອນພາລະຄ່າຂົນສົ່ງຂອງຄອບຄົວ ທີ່ມີລາຍຮັບປານກາງ ແລະ ລາຍຮັບຕ່ຳ.
ຂອບໃຈຂໍ້ມູນຈາກ: https://cutt.ly/KSuBgvH
ຕິດຕາມຂ່າວທັງໝົດຈາກ LaoX: https://laox.la/all-posts/