ວັນທີ 23 ພຶດສະພານີ້,ບັນດາຄູ-ອາຈານ ແລະ ນ້ອງນັກຮຽນປະຖົມເກັ່ງລະດັບຊາດ ຈໍານວນ 125 ຄົນ,ນໍາພາໂດຍ ທ່ານ ອຈ. ສີສະໝຸດ ແສນບຸດຕະລາດ ຫົວໜ້າກົມຮ່ວມມືກັບຕ່າງປະເທດ ກະຊວງສຶກສາທິການ ແລະ ກິລາ ໄດ້ອອກເດີນທາງດ້ວຍລົດໄຟລາວ-ຈີນ D888, ຈາກສະຖານີນະຄອນຫຼວງວຽງຈັນ ສູ່ສະຖານີບໍ່ເຕັນ ເພື່ອເຂົ້າຮ່ວມກິດຈະກໍາສະເຫຼີມສະຫຼອງວັນເດັກນ້ອຍສາກົນຢູ່ສປ ຈີນ.
![](https://laox.la/wp-content/uploads/2023/05/image-573.png)
ທ່ານ ອຈ. ສີສະໝຸດ ໄດ້ໃຫ້ຮູ້ວ່າ: ກິດຈະກໍາຮ່ວມສະຫຼອງວັນເດັກນ້ອຍສາກົນລາວ-ຈີນຄັ້ງນີ້ໃຊ້ເວລາທັງໝົດ 16 ວັນ (23 ພຶດສະພາ ຫາ 7 ມິຖຸນາ 2023), ເຊິ່ງຈະເຄື່ອນໄຫວທັດສະນະສຶກສາຢູ່ບາງຕົວເມືອງໃຫຍ່ຂອງສປ ຈີນ ເຊັ່ນ: ເລີ່ມທີ່ນະຄອນຊຽງຮຸ່ງ ກິ່ງແຂວງປົກຄອງຕົນເອງສິບສອງພັນນາ, ເພື່ອຮ່ວມກິດຈະກໍາກັບນັກຮຽນໂຮງຮຽນປະຖົມສິບສອງພັນນາເລກ 1, ນະຄອນຫຼວງປັກກິ່ງ ຈະຢ້ຽມຊົມພະລາດຊະວັງກູ່ໂກ່ງ, ເຂົ້າຊົມຈັດຕຸລັດທ່ຽນອັນເໝິນ, ຢ້ຽມຊົມມະຫາວິທະຍາໄລຊິນຫົວ ເຂົ້າຮ່ວມກິດຈະກໍາກັບນັກຮຽນໂຮງຮຽນປະຖົມປັກກິ່ງປ່າອີ້ ແລະ ອື່ນໆ.
ແຂວງຊີອານ ຈະເຂົ້າຮ່ວມກິດຈະກໍາກັບໂຮງຮຽນພັດທະນາຊີອານ, ແຂວງຟູໂຈວ່ ເພື່ອຮ່ວມກິດຈະກໍາຈັບມືກັນຮ່ວມກັບໂຮງຮຽນປະຖົມ Tiger Hill, ກິດຈະກໍາມິດຕະພາບເຍົາວະຊົນລາວ-ຈີນ ແລະແຂວງເຊັຍເໝິນ ຮ່ວມກິດຈະກໍາກັບນັກຮຽນໂຮງຮຽນປະຖົມເຊັຍເໝິນ ແລະເດີນທາງກັບນະຄອນຫຼວງວຽງຈັນ.
![](https://laox.la/wp-content/uploads/2023/05/image-574.png)
ບໍລິສັດລົດໄຟລາວ-ຈີນ ໄດ້ໃຫ້ຮູ້ວ່າ: ເພື່ອອໍານວຍຄວາມສະດວກໃຫ້ນ້ອງນັກຮຽນ ພ້ອມດ້ວຍຄູ-ອາຈານ ແລະຄະນະນໍາ ບໍລິສັດລົດໄຟລາວ-ຈີນ ໄດ້ອໍານວຍຄວາມສະດວກໃນການຈອງປີ້, ການເຂົ້າອອກສະຖານີ, ການຂຶ້ນລົງລົດໄຟ ແລະການບໍລິການພາຍໃນລົດໄຟ ແລະອື່ນໆ ເພື່ອສົ່ງເສີມໃຫ້ນ້ອງໆນັກຮຽນ ຄູອາຈານ ເດີນທາງໃນການໄປທັດສະນະສຶກສາດ້ວຍລົດໄຟຂ້າມແດນລາວ-ຈີນ ຢ່າງສະດວກສະບາຍ.
ຂໍ້ມູນຈາກ: https://cutt.ly/zwqhCKgK
ຕິດຕາມຂ່າວທັງໝົດຈາກ LaoX: https://laox.la/all-posts/