ຕະຫຼາດຮຸ້ນຂອງຈີນໄດ້ມີການເພີ່ມຂຶ້ນຢ່າງຮຸນແຮງ, ໂດຍດັດຊະນີ Hang Seng ເພີ່ມຂຶ້ນ 7.7% ໃນສາມມື້ທີ່ຜ່ານມາ, ເຊິ່ງຖືວ່າເປັນໄລຍະທີ່ມີການຟື້ນຕົວທີ່ໃຫຍ່ທີ່ສຸດຮອບ 1 ປີ. ໃນສ່ວນຂອງຮຸ້ນບາງຕົວເຊັ່ນ Alibaba, Tencent, NetEase, Baidu ແລະ JD ກໍໄດ້ມີການປັບຕົວເພີ່ມຂຶ້ນເຊັ່ນກັນ.
ໂດຍເຫດຜົນທີ່ຕະຫຼາດຮຸ້ນຈີນຟື້ນຕົວແມ່ນມາຈາກປັດໄຈຫຼາຍປະການເຊັ່ນ:
- ທາງການຂອງຈີນກຽມອອກມາດຕະການພິເສດ. ເພື່ອສະໜັບສະໜູນຕະຫຼາດຮຸ້ນຂອງຈີນ ດ້ວຍງົບປະມານ 2 ພັນຕື້ກວ່າຢວນ
- ທະນາຄານກາງຈີນໄດ້ມີສ່ວນຊ່ວຍໃນການ ກະຕຸ້ນເສດຖະກິດ ໂດຍການປັບຫຼຸດອັດຕາສ່ວນເງິນສໍາຮອງຂັ້ນຕ່ຳ (RRR) ສໍາລັບທະນາຄານການຄ້າໃນປະເທດຈີນລົງອີກຄັ້ງໃນເດືອນໜ້າ.
- ນັກທຸລະກິດ ແລະ ນັກລົງທຶນທີ່ມີຊື່ສຽງເຂົ້າຊື້ຮຸ້ນຈີນໃນເວລາທີ່ຕະຫຼາດຈະຫຼຸດລົງ
ແນວໃດກໍດີ, ການເພີ່ມຂຶ້ນຂອງຕະຫຼາດຮຸ້ນໃນ 3 ມຶ້ນີ້ບໍ່ສາມາດປຽບທຽບໄດ້ກັບຮຸ້ນຂອງຈີນທີ່ຫຼຸດລົງມາໃນຕະຫຼອດ 3 ປີຜ່ານມາໄດ້. ດັ່ງນັ້ນ, ລາຄາຮຸ້ນຂອງຈີນໃນຈຸດນີ້ຍັງຢູ່ໃນລະດັບທີ່ຕໍ່າຫຼາຍເມື່ອທຽບກັບອະດີດ ແລະ ບໍ່ມີຫຍັງຮັບປະກັນວ່າຕະຫຼາດຮຸ້ນຂອງຈີນຈະບໍ່ຫຼຸດລົງຫຼັງຈາກທີ່ເພີ່ມຂຶ້ນຢ່າງຮຸນແຮງ. ເນື່ອງຈາກວ່າຕະຫຼາດຮຸ້ນຂອງຈີນຍັງຕ້ອງປະເຊີນກັບປັດໄຈໃນແງ່ລົບຫຼາຍປະການເຊັ່ນ: ເສດຖະກິດຈີນຊ້າລົງ, ລັດຖະບານຈີນສືບຕໍ່ປະຕິບັດນະໂຍບາຍຢ່າງເຂັ້ມງວດໃນຂະແໜງເຕັກໂນໂລຊີ ແລະ ສົງຄາມຣັດເຊຍ – ຢູເຄຣນທີ່ສົ່ງຜົນກະທົບຕໍ່ເສດຖະກິດໂລກ.
ເພາະສະນັ້ນ, ພວກເຮົາຈະຕ້ອງຕິດຕາມເບິ່ງຕໍ່ໄປວ່າ ການເພີ່ມຂຶ້ນໃນຄັ້ງນີ້ຈະເປັນການຟື້ນຄືນກັບມາຢ່າງຍິ່ງໃຫຍ່ ຫຼື ເປັນພຽງການເພີ່ມຂຶ້ນພຽງຊົ່ວຄາວ ແລະ ບໍ່ຄວນຟ້າວທີ່ຈະລົງທຶນ ເນື່ອງຈາກວ່າຍັງມີຄວາມສ່ຽງສູງທີ່ຕະຫຼາດຮຸ້ນຂອງຈີນຈະຫຼຸດລົງອີກເທື່ອໜຶ່ງ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/