ເມື່ອບໍ່ດົນມານີ້ ນາຍົກລັດຖະມົນຕີຂອງປະເທດຍີ່ປຸ່ນ ທ່ານ ຟູມິໂອະ ຄິຊິດະ ໄດ້ປະກາດແຜນການກະຕຸກຊຸກຍູ້ເສດຖະກິດທີ່ສຳຄັນທີ່ມີມູນຄ່າປະມານ 17 ພັນຕື້ເຢນ (ປະມານ 113 ຕື້ໂດລາ) ເພື່ອສືບຕໍ່ຟື້ນຟູເສດຖະກິດຍີ່ປຸ່ນໃນຫຼາຍໆດ້ານ, ບໍ່ວ່າຈະເປັນຈາກການຊ່ວຍເຫຼືອຂະແໜງຄົວເຮືອນ. ການຫຼຸດຜ່ອນພາສີ ແລະການລົງທຶນໃນປະເທດ ເພື່ອແກ້ໄຂບັນຫາເງິນຝືດ.
ໜຶ່ງໃນແຜນການຊ່ວຍເຫຼືອທີ່ສໍາຄັນພາຍໃຕ້ມາດຕະການນີ້ແມ່ນ ຊ່ວຍຫຼຸດຜ່ອນຜົນກະທົບຂອງອັດຕາເງິນຝືດຂອງຄົວເຮືອນຍີ່ປຸ່ນ, ການຫຼຸດຜ່ອນພາສີ, ຊ່ວຍໃຫ້ພາກເອກະຊົນເພີ່ມຄ່າຈ້າງຂຶ້ນ ແລະ ຊຸກຍູ້ການລົງທຶນຕື່ມອີກໃນປະເທດ.
ເມື່ອສົມທົບກັບການສະໜັບສະໜູນເງິນກູ້ຂອງລັດ ແລະ ການລົງທຶນຂອງລັດຖະບານທ້ອງຖິ່ນ ນີ້ຈະເຮັດໃຫ້ຍອດຈຳນວນມາດຕະການກະຕຸ້ນເສດຖະກິດບັນລຸປະມານ 21 ພັນຕື້ເຢນ.
ໂດຍທ່ານ ຄິຊິດະ ກ່າວວ່າ: ”ເສດຖະກິດຍີ່ປຸ່ນພວມຢູ່ໃນຂອບເຂດຂອງການຫຼຸດພົ້ນອອກຈາກເງິນຝືດ, ມັນຈະຍາກຂຶ້ນ ຖ້າຫາກພວກເຮົາພາດໂອກາດນີ້, ຂ້າພະເຈົ້າຕັ້ງໃຈທີ່ຈະເພີ່ມລາຍໄດ້ທີ່ສາມາດຈັບຈ່າຍໄດ້ ເພື່ອນຳໄປສູ່ການເຕີບໂຕຂະຫຍາຍຕົວ.”
ນາຍົກຍີ່ປຸ່ນ ໄດ້ເບິ່ງວ່າການໃຊ້ງົບຂອງລັດຖະບານຄັ້ງນີ້ ຈະບໍ່ນຳໄປສູ່ພາວະເງິນເຟີ້ ແຕ່ເບິ່ງເລື່ອງນີ້ເປັນສິ່ງທ້າທາຍສຳຄັນ.
ນະໂຍບາຍດັ່ງກ່າວລວມມີການຕັດພາສີຊົ່ວຄາວ 40,000 ເຢນ (266 ໂດລາສະຫະລັດ) ຕໍ່ຄົນ ໃນເດືອນມິຖຸນາຂອງປີ 2024 ແລະ ມີອີກ 70,000 ເຢນ (465 ໂດລາສະຫະລັດ) ຈ່າຍໃຫ້ກັບຄົວເຮືອນທີ່ມີລາຍໄດ້ຕໍ່າ ລວມທັງເງິນອຸດໜູນນໍ້າມັນແອັດຊັງ ແລະ ໃບບິນຄ່າສາທາລະນູປະໂພກ.
ໂດຍລັດຖະບານຍີ່ປຸ່ນຄາດການວ່າ ແຜນງານດັ່ງກ່າວ ຈະຊ່ວຍເພີ່ມຍອດລວມຜະລິດຕະພັນພາຍໃນຂອງຍີ່ປຸ່ນໄດ້ ປະມານ 1,2%.
ແຜນການກະຕຸ້ນເສດຖະກິດຄັ້ງໃຫຍ່ນີ້ ເກີດຂຶ້ນທ່າມກາງການຫຼຸດລົງຢ່າງຕໍ່ເນື່ອງຂອງການຈັດອັນດັບຄວາມນິຍົມຂອງ ທ່ານ ຟູມິໂອະ ຄິຊິດະ. ໂດຍເມື່ອບໍ່ດົນມານີ້, ຄວາມນິຍົມໃນຕົວຂອງຄິຊິດະໄດ້ຫຼຸດລົງຢູ່ລະດັບຕ່ຳສຸດນັບແຕ່ທ່ານຂຶ້ນດຳລົງຕຳແໜ່ງເປັນນາຍົກລັດຖະມົນຕີ 2 ປີກ່ອນ.
ຢ່າງໃດກໍຕາມ ນະໂຍບາຍດັ່ງກ່າວ ຍັງມີບາງຄົນ ຫຼື ບາງຝ່າຍ ໄດ້ເບິ່ງວ່າ ເປັນນະໂຍບາຍແຜນການໃຊ້ຈ່າຍແບບປະຊານິຍົມຂອງນາຍົກ ຄິຊິດະ ທີ່ຈະເຮັດໃຫ້ ສະພາບຂອງໜີ້ສິນຍີ່ປຸ່ນ ຮຸນແຮງຂຶ້ນກວ່າເກົ່າ.
ຕິດຕາມຂ່າວທັງໝົດຈາກ LaoX: https://laox.la/all-posts/