ພິທີເປີດປີທ່ອງທ່ຽວລາວ 2024 ແລະ ເປີດບຸນນະມັດສະການພະທາດຫຼວງວຽງຈັນ ແລະ ງານວາງສະແດງສິນຄ້າ ປະຈຳປີ 2023 ຈັດຂຶ້ນໃນວັນທີ 23 ພະຈິກ 2023 ຢູ່ເດີ່ນທາດຫລວງ ນະຄອນຫຼວງວຽງຈັນ. ໃຫ້ກຽດເຂົ້າຮ່ວມມີ ທ່ານ ສອນໄຊ ສີພັນດອນ ນາຍົກລັດຖະມົນຕີ, ມີຮອງນາຍົກລັດຖະມົນຕີ, ລັດຖະມົນຕີ, ຮອງລັດຖະມົນຕີ, ບັນດາ ການນຳ ພັກ-ລັດ ພ້ອມແຂກຖືກເຊີນເຂົ້າຮ່ວມ.
ພິທີເປີດປີທ່ອງທ່ຽວລາວ ແມ່ນຈັດຂຶ້ນພ້ອມກັບງານສະເຫຼີມສະຫຼອງບຸນນະມັດສະການພະທາດຫຼວງ ປະຈຳປີ 2023. ສປປ ລາວ ໄດ້ເປີດປີທ່ອງທ່ຽວລາວມາແລ້ວ 3 ຄັ້ງ, ສໍາລັບປີ 2024 ແມ່ນຄັ້ງທີ 4 ເຊິ່ງໄດ້ກໍານົດຄໍາຂວັນ “ທ່ອງທ່ຽວລາວ ປອດໄພ, ຊື່ນໃຈໃນວັດທະນະທຳ, ທຳມະຊາດ ແລະ ປະຫວັດສາດ” ໂດຍ ໄດ້ກຳນົດເອົາ 79 ກິດຈະກໍາ, ໃນນີ້ມີ 14 ກິດຈະກຳລະດັບຊາດ ແລະ 65 ກິດຈະກໍາລະດັບແຂວງ ເພື່ອສ້າງຂະບວນການໃຫ້ຟົດຟື້ນ ໃນຂອບເຂດທົ່ວປະເທດກໍຄື ພາຍໃນແຂວງ ຕະຫຼອດຮອດຂັ້ນເມືອງ ຕາມສະພາບທ່າແຮງຂອງການທ່ອງທ່ຽວຂອງຕົນ.
ງານບຸນນະມັດສະການພະທາດຫຼວງປີນີ້ຈະດໍາເນີນເປັນເວລາ 5 ມື້ (23-27ພະຈິກ) ມີບັນດາຫ້າງຮ້ານຕ່າງໆວາງສະແດງ 800 ກວ່າຮ້ານ ແລະ ມີຢູ່ສູນການຄ້າລາວໄອເຕັກອີກດ້ວຍ.
ທີ່ມາ: Lao National Radio
ຕິດຕາມຂ່າວທັງໝົດຈາກ LaoX: https://laox.la/all-posts/