ລັດຖະບານແຮງງານຂອງ Australia ແລະ ລັດ New South Wales ປະກາດວ່າ ນະຄອນ Sydney ຈະເປັນເຈົ້າພາບໃນການຈັດຕັ້ງກອງປະຊຸມສຸດຍອດ Global Nature Positive ຄັ້ງທຳອິດໃນຕົ້ນເດືອນຕຸລາ 2024.
ໂດຍໃນການປະຊຸມສຸດຍອດດັ່ງກ່າວຈະລວບລວມຕົວແທນຈາກທົ່ວໂລກ ລວມທັງລັດຖະມົນຕີ, ກຸ່ມຮັກສິ່ງແວດລ້ອມ, ຊົນເຜົ່າພື້ນເມືອງ, ນັກທຸລະກິດ, ນັກວິທະຍາສາດ ແລະ ຜູ້ນໍາຊຸມຊົນຕ່າງໆ ເພື່ອພິຈາລະນາວ່າຈະມີວິທີການໃດແດ່ທີ່ຈະເພີ່ມການລົງທຶນໃນໂຄງການຟື້ນຟູທໍາມະຊາດ.
ຂອບເຂດຄວາມຫຼາກຫຼາຍດ້ານຊີວະພາບທົ່ວໂລກໄດ້ຮັບການຕົກລົງໂດຍເຫັນດີຈາກ 196 ປະເທດໃນກອງປະຊຸມສະຫະປະຊາຊາດກ່ຽວກັບຄວາມຫຼາກຫຼາຍທາງຊີວະພາບໃນປີກາຍນີ້ ແລະ ໄດ້ຮັບການອະທິບາຍວ່າເປັນ “ສັນຍາປາຣີສເພື່ອທຳມະຊາດ” ໂດຍມີເປົ້າໝາຍໃນການລວບລວມເງິນທຶນ 200 ຕື້ໂດລາຕໍ່ປີເພື່ອສ້ອມແປງທຳມະຊາດພາຍໃນປີ 2030.
ໃນກອງປະຊຸມສຸດຍອດທີ່ກຳລັງຈະເກີດຂຶ້ນນີ້ ຈະມຸ່ງເນັ້ນໃສ່ສາມຫົວຂໍ້ສຳຄັນຄື: ຄວາມໂປ່ງໃສ ແລະ ການລາຍງານ, ຄວາມຕ້ອງການທາງທຸລະກິດຕໍ່ທຳມະຊາດ ແລະ ເພີ່ມການມີສ່ວນຮ່ວມຂອງຜູ້ຄອບຄອງທີ່ດິນ. ນອກຈາກນີ້ໃນກອງປະຊຸມຍັງໄດ້ເນັ້ນໜັກວ່າກົດລະບຽບດັ່ງກ່າວຈະຊ່ວຍໃຫ້ທຸລະກິດຕ່າງໆສາມາດລົງທຶນ ແລະ ປະເມີນຜົນໂຄງການຟື້ນຟູທໍາມະຊາດໄດ້.
Penny Sharp ລັດຖະມົນຕີກະຊວງການປ່ຽນແປງຂອງດິນຟ້າອາກາດຂອງລັດ NSW ກ່າວວ່າ “Australia ເປັນຜູ້ນໍາລະດັບໂລກໃນການສະໜັບສະໜູນການລິເລີ່ມທີ່ເປັນມິດກັບທຳມະຊາດ ແລະ ຫຼຸດຜ່ອນການປ່ອຍກ໊າສເຮືອນແກ້ວໃຫ້ເປັນສູນ (net zero). ພວກເຮົາຮູ້ສຶກຍິນດີຫຼາຍທີ່ Sydney ໄດ້ຖືກຮັບເລືອກໃຫ້ເປັນເມືອງເຈົ້າພາບສໍາລັບການຈັດຕັ້ງກອງປະຊຸມໃນຄັ້ງນີ້”
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/