ສະມາຄົມນັກທຸລະກິດກະສິກຳລາວ, ເຊິ່ງດຳເນີນທຸລະກິດພາຍໃຕ້ສະພາການຄ້າ ແລະ ອຸດສາຫະກຳແຫ່ງຊາດລາວ (LNCCI) ກໍາລັງພະຍາຍາມຈະປັບປຸງຜະລິດຕະພັນກະສິກໍາ ໂດຍການແປງຮູບວັດຖຸດິບໃຫ້ກາຍເປັນສິນຄ້າທີ່ມີມູນຄ່າຫຼາຍຂຶ້ນ.
ກອງປະຊຸມສະຫຼຸບວຽກງານ 2023 ແລະ ກຳນົດທິດທາງແຜນງານ 2024 ຂອງ ສະມາຄົມນັກທຸລະກິດ ກະສິກຳລາວ ເມື່ອບໍ່ດົນມານີ້ ທີ່ສະພາການຄ້າ ແລະ ອຸດສາຫະກຳແຫ່ງຊາດລາວ ໄດ້ປຶກສາຫາລືກ່ຽວກັບວິທີການເພີ່ມປະລິມານ ແລະ ຄຸນະພາບສິນຄ້າກະສິກຳໃຫ້ສູງສຸດ ແລະ ຊຸກຍູ້ການຂາຍ.
ວຽກງານຂອງສະມາຄົມແມ່ນໄດ້ຮັບການຊີ້ນຳຈາກສະພາການຄ້າ ແລະ ອຸດສາຫະກຳແຫ່ງຊາດລາວ ແລະ ໄດ້ສຸມໃສ່ຊຸກຍູ້ຜູ້ຊື້, ກຸ່ມຜະລິດ, ສະຫະກອນ, ກຸ່ມຜູ້ສະໜອງວັດຖຸດິບໃຫ້ໂຮງງານ (ຝຸ່ນ, ອາຫານ, ແນວພັນພືດ, ແນວພັນສັດ, ອຸປະກອນ, ກົນຈັກ, ນ້ຳປະປາ), ສະຖາບັນການເງິນ (ທະນາຄານ ແລະ ສະຖາບັນການເງິນຈຸລະພາກ) ຮ່ວມມືກັນ ເພື່ອສົ່ງເສີມຜະລິດຕະພັນກະເສດເປັນສິນຄ້າ.
ສະມາຄົມ, ສົມທົບກັບຂະແໜງການທີ່ກ່ຽວຂ້ອງ ບັນລຸໄດ້ໝາກຜົນທີ່ໜ້າພໍໃຈຕາມແຜນການທີ່ວາງໄວ້ໃນປີ 2023, ເຮັດໃຫ້ມີບັນດາໝາກຜົນດີທາງດ້ານສິນຄ້າ ແລະ ບົດຮຽນຕື່ມອີກ.
ສຳລັບທິດທາງແຜນການໃນປີ 2024 ທາງສະມາຄົມຍັງຈະສືບຕໍ່ສ້າງຄວາມເຂັ້ມແຂງໃຫ້ແກ່ສະມາຊິກ ແລະ ສະມາຄົມ ສືບຕໍ່ຜັນຂະຫຍາຍການສົ່ງເສີມການຜະລິດກະສິກຳເປັນສິນຄ້າຕາມກົນwກຂອງ ສະພາການຄ້າ ແລະ ອຸດສາຫະກຳແຫ່ງຊາດລາວ ພ້ອມກັບມີສ່ວນຮ່ວມໃນການຈັດຕັ້ງປະຕິບັດວາລະແຫ່ງຊາດຂອງພາກລັດຖະບານ, ສະມາຄົມຈະລົງເລິກການສ້າງໂຄງປະກອບລາຄາຂອງສິນຄ້າກະສິກຳໃຫ້ເປັນຖານຂໍ້ມູນທີ່ສອດຄ່ອງກັບສະພາບຕົວຈິງຂອງການຜະລິດ ແລະ ການຈຳໜ່າຍ, ສ້າງຖານຂໍ້ມູນທຸລະກິດກະສິກຳໃຫ້ສາມາດເຂົ້າເຖິງງ່າຍ, ຊ່ວຍບັນດາສະມາຊິກໃນການຄົ້ນຄວ້າ-ສັງລວມບັນຫາຄວາມສະດວກໃນການດຳເນີນທຸລະກິດຜ່ານເວທີທຸລະກິດລາວ (Lao Business Forum).
ທ່ານ ບຸນເລີດ ຫຼວງປະເສີດ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ ມີຄວາມເຫັນຕໍ່ກອງປະຊຸມວ່າ ສະມາຄົມທຸລະກິດກະສິກຳລາວ ພາຍຫຼັງທີ່ໄດ້ມີການປັບປຸງການຈັດຕັ້ງຜ່ານມາ ເຖິງເປັນເວລາອັນສັ້ນ ແລະ ຍັງຂາດ ຫຼາຍປັດໄຈ ແຕ່ກໍເຫັນໄດ້ເຖິງການເຮັດວຽກຂອງຄະນະບໍລິຫານງານ ເຊິ່ງສະແດງອອກມີຫຼາຍກິດຈະກຳທີ່ເກີດຂຶ້ນໃນດ້ານຕັ້ງໜ້າຫຼາຍອັນ. ໃນນາມຕາງໜ້າໃຫ້ສະພາການຄ້າ ແລະ ອຸດສາຫະກຳແຫ່ງຊາດລາວ ຈະໃຫ້ການສະໜັບສະໜູນ-ໃຫ້ຄວາມຮ່ວມມືໃນການສ້າງຄວາມເຂັ້ມແຂງໃຫ້ແກ່ສະມາຄົມທຸລະກິດກະສິກຳໃຫ້ມີຄວາມເຂັ້ມແຂງຂຶ້ນຢ່າງບໍ່ຢຸດຢັ້ງ ແລະ ຂະຫຍາຍຕົວຄຽງຄູ່ກັບການຈັດຕັ້ງຂອງສະພາການຄ້າ ແລະ ອຸດສາຫະກຳແຫ່ງຊາດລາວ ທີ່ມີຢູ່ແຕ່ລະແຂວງ ແລະ ກຳລັງຂະຫຍາຍລົງສູ່ຂັ້ນເມືອງໃນຂອບເຂດທົ່ວປະເທດ.
ທ່ານ ບຸນເລີດ ຫຼວງປະເສີດ ຍັງໄດ້ມີທິດຊີ້ນຳເພີ່ມເຕີມໃຫ້ສະມາຄົມໃຫ້ມີການສ້າງຍຸດທະສາດວຽກງານຂອງສະມາຄົມ ທີ່ຕິດພັນກັບແຜນພັດທະນາເສດຖະກິດສັງຄົມຂອງຊາດທີ່ພາກລັດໄດ້ກຳນົດອອກມາ ແລະ ແຜນຍຸດທະສາດຂອງກະຊວງຂະແໜງການທີ່ກ່ຽວຂ້ອງ ໂດຍມີການກຳນົດແຜນງານໃນແຕ່ລະໄລຍະ ເຊັ່ນ: ໄລຍະສັ້ນ, ໄລຍະກາງ ແລະ ໄລຍະຍາວ ແລະ ໃຫ້ສາມາດວັດແທກໄດ້ຜົນງານທີ່ຈັດຕັ້ງໄດ້ໃນແຕ່ລະໄລຍະຢ່າງເປັນຮູບປະທຳ, ພ້ອມກັນນັ້ນກໍຂໍໃຫ້ສະມາຄົມເອົາໃຈໃສ່ການມີສ່ວນຮ່ວມໃນການຈັດຕັ້ງວາລະແຫ່ງຊາດຢ່າງຕັ້ງໜ້າ.
ໃນຊຸມປີມໍ່ໆມານີ້, ປະເທດລາວມີລາຍໄດ້ຫຼາຍລ້ານໂດລາຈາກການສົ່ງອອກຜະລິດຕະພັນກະເສດ, ຕົ້ນຕໍແມ່ນ: ໝາກກ້ວຍ, ຢາງພາລາ, ມັນຕົ້ນ, ອ້ອຍ, ແລະງົວ-ຄວາຍ, ໂດຍຈີນເປັນຜູ້ຊື້ສິນຄ້າຫຼາຍກວ່າໝູ່. ນອກຈາກນີ້, ສິນຄ້າກະເສດກໍຖືກວາງຂາຍຢູ່ຕະຫຼາດຕ່າງໆໃນທົ່ວປະເທດລາວຫຼາຍຂຶ້ນ, ແຕ່ລັດຖະບານກໍຕ້ອງການສົ່ງເສີມການຜະລິດກະສິກຳໃຫ້ເຂັ້ມແຂງຫຼາຍຂຶ້ນ ເພື່ອຫາລາຍໄດ້ຈາກຕ່າງປະເທດໃຫ້ຫຼາຍຂຶ້ນ.
https://www.facebook.com/photo?fbid=786522583522220&set=a.485450406962774
ຕິດຕາມຂ່າວທັງໝົດຈາກ LaoX: https://laox.la/all-posts/