ໃນວັນຈັນທີ່ຜ່ານມາໄດ້ມີການເປີດເຜີຍຂໍ້ມູນຂອງຕົວເລກການຂະຫຍາຍຕົວຂອງເສດຖະກິດໃນອິນໂດເນເຊຍໃນປີ 2023 ເຊິ່ງໄດ້ມີການເຕີບໂຕທີ່ 5.05%, ຫຼຸດລົງຈາກ 5.31% ໃນປີ 2022. ໂດຍສາເຫດຫຼັກແມ່ນມາຈາກລາຄາສິນຄ້າໂພກປະພັນທີ່ຫຼຸດລົງ ສົ່ງຜົນກະທົບຕໍ່ການສົ່ງອອກ ແລະ ນະໂຍບາຍການເງິນທີ່ເຂັ້ມງວດ ສົ່ງຜົນກະທົບຕໍ່ຄວາມຕ້ອງການພາຍໃນປະເທດ.
- ສຳລັບຕົວເລກ GDP: ກົມສະຖິຕິອິນໂດເນເຊຍ (BPS) ໄດ້ມີການລາຍງານວ່າ ເສດຖະກິດອິນໂດເນເຊຍເຕີບໂຕ 5.05% ໃນປີ 2023 ເມື່ອທຽບໃສ່ປີ 2022, ເຊິ່ງຕ່ຳກວ່າການຄາດການຂອງນັກວິເຄາະທີ່ 5.17% ແລະ ຕ່ຳກວ່າຄາດໝາຍຂອງລັດຖະບານທີ່ 5.3% – 5.9%.
ການສົ່ງອອກ: ການສົ່ງອອກສິນຄ້າ ແລະ ການບໍລິການຂອງອິນໂດເນເຊຍໃນປີ 2023 ມີການຂະຫຍາຍຕົວຢູ່ທີ່ 4.93%, ເຊິ່ງຫຼຸດລົງຈາກ 18.37% ໃນປີ 2022 ໂດຍມີສາເຫດມາຈາກ:
- ຄວາມຕ້ອງການໃນທົ່ວໂລກທີ່ຊະລໍຕົວ: ເສດຖະກິດໂລກທີ່ຊະລໍຕົວ ສົ່ງຜົນກະທົບຕໍ່ຄວາມຕ້ອງການສິນຄ້າຈາກອິນໂດເນເຊຍ.
- ລາຄາສິນຄ້າໂພກປະພັນທີ່ຫຼຸດລົງ: ລາຄາສິນຄ້າໂພກປະພັນເຊັ່ນ ຖ່ານຫິນ, ເຫຼັກ ແລະ ນ້ຳມັນປາມດິບຫຼຸດລົງ ສົ່ງຜົນກະທົບຕໍ່ລາຍໄດ້ຈາກການສົ່ງອອກຂອງອິນໂດເນເຊຍ, ເຊິ່ງເປັນແຮງຂັບເຄື່ອນຫຼັກຂອງເສດຖະກິດ.
- ສົງຄາມການຄ້າລະຫວ່າງຈີນ ແລະ ສະຫະລັດສົ່ງຜົນກະທົບຕໍ່ເສດຖະກິດໂລກ ລວມທັງອິນໂດເນເຊຍ
- ຄວາມບໍ່ແນ່ນອນທາງດ້ານການເມືອງ: ການເລືອກຕັ້ງທົ່ວໄປໃນອິນໂດເນເຊຍ ທີ່ຈັດຂຶ້ນໃນປີ 2023
ເສດຖະກິດພາຍໃນປະເທດຂອງອິນໂດເນເຊຍຍັງຄົງເຕີບໂຕຢ່າງຕໍ່ເນື່ອງຈາກການບໍລິໂພກຂອງພາກເອກະຊົນທີ່ຂະຫຍາຍຕົວ 5.41% ແລະ ການລົງທຶນຂອງເອກະຊົນທີ່ເພີ່ມຂຶ້ນ 4.96%.
ຢ່າງໃດກໍຕາມ, ລັດຖະບານອິນໂດເນເຊຍໄດ້ມີການຄາດການໄວ້ວ່າອັດຕາການເຕີບໂຕຂອງເສດຖະກິດພາຍໃນປະເທດຈະມີການຂະຫຍາຍຕົວເພິ່ມຂຶ້ນທີ່ 5.2% ໃນປີ 2024 ແລະ ການລົງທຶນໃນພາກເອກະຊົນຄາດວ່າຈະຟື້ນຕົວ, ຫຼັງຈາກຄວາມບໍ່ແນ່ນອນທາງດ້ານການເມືອງທີ່ໄດ້ຮັບການແກ້ໄຂແລ້ວ.
ທະນາຄານກາງອິນໂດເນເຊຍ ອາດຈະມີໂອກາດຫຼຸດອັດຕາດອກເບ້ຍໃນເຄິ່ງປີຫຼັງຂອງປີ 2024. ໃນຂະນະທີ່ລັດຖະບານໄດ້ເລັ່ງການດຳເນີນໂຄງການຕ່າງໆກ່ອນໝົດວາລະຂອງຕົນ ເພື່ອຫຼຸດຜ່ອນຜົນກະທົບຕໍ່ເສດຖະກິດ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/