ເຈົ້າເຄີຍຮູ້ສຶກເມື່ອຍ ແລະ ເບື່ອໜ່າຍກັບ social media ຫຼືບໍ່? ຫຼາຍໆຄົນອາດຈະລະເລີຍເຄັດລັບດີໆໃນການໃຊ້ຊີວິດ ເຖິງແມ່ນວ່າພວກເຂົາເຫຼົ່ານັ້ນຈະຮູ້ວ່າເຄັດລັບເຫຼົ່ານີ້ຈະຊ່ວຍໃຫ້ຕົນເອງໃຊ້ຊີວິດໄດ້ງ່າຍ. ໃນມື້ນີ້ພວກເຮົາມີ Life Hack ໜຶ່ງຢ່າງທີ່ຈະມາແນະນໍາ ເຊິ່ງຜູ້ຊ່ຽວຊານບອກວ່າ ພຽງເຮັດຕາມນີ້ ຊີວິດຂອງເຈົ້າຈະດີຂຶ້ນໃນທັນທີ! ໂດຍວິທີການນັ້ນກໍຄືການ “ປິດສຽງ” ຫຼື “Mute” ນັ້ນເອງ.
ສຳລັບວິທີການ Mute ນັ້ນອາດຈະແຕກຕ່າງກັນໄປຂຶ້ນຢູ່ກັບແຕ່ລະແພລັດຟອມ. ແຕ່ໂດຍທົ່ວໄປແລ້ວ ພວກເຮົາສາມາດເຂົ້າໄປໜ້າໂປຣຟາຍຂອງບຸກຄົນທີ່ເຮົາຕ້ອງການ Mute ແລະ ກົດປຸ່ມ “ປິດສຽງ” ຫຼື “ຍົກເລີກການຕິດຕາມ” ພຽງເທົ່ານີ້, ເຮົາກໍສາມາດຈັດລະບຽບ social media ຂອງເຮົາໄດ້ແລ້ວ.
ເມື່ອໂພສ ຫຼື ສະຕໍລີ່ຂອງພວກເຂົາເຫຼົ່ານັ້ນຫາຍໄປຈາກທາມລາຍຂອງເຮົາ, ຄວາມລຳຄານໃຈຕ່າງໆ ທີ່ພວກເຂົາມັກສ້າງຂຶ້ນກໍຈະຫາຍໄປນຳເຊັ່ນກັນ. ແລະທີ່ສຳຄັນຄື ການ Mute ຈະບໍ່ສົ່ງຜົນກະທົບຕໍ່ພວກເຂົາເລີຍ, ພວກເຂົາເຈົ້າຈະບໍ່ຮູ້ເລີຍວ່າພວກເຂົາຖືກ Mute ແລະ ເຮົາກໍບໍ່ຕ້ອງກັງວົນກ່ຽວກັບເລື່ອງຄວາມບໍ່ສະບາຍ ຫຼື ດຣາມ່າທີ່ຈະເກີດຂຶ້ນ.
ໃຫ້ເຮົາລອງຈິນຕະນາການວ່າ ເຮົາຈະລືມພວກເຂົາເຫຼົ່ານັ້ນໄປເລີຍວ່າມີການເຄື່ອນໄຫວຢູ່ໃນໂລກຂອງ social media, ເວັ້ນເສຍແຕ່ວ່າຈະມີຜູ້ໃດຜູ້ໜຶ່ງຈັບເອົາບັນຫາຂອງເຂົາເຈົ້າມາສົນທະນາກັນ.
Bailey Parnell, ຊີອີໂອຂອງສູນ Digital Wellbeing ໄດ້ອະທິບາຍວ່າ ການປິດສຽງ ຫຼື Mute ບັນຊີທີ່ສ້າງຄວາມໜ້າລໍາຄານເປັນວິທີທີ່ດີທີ່ຈະປັບປຸງຄຸນະພາບຂອງຊີວິດຂອງເຮົາ, ຄ້າຍຄືກັບການສ້າງເຂດແດນໃນໂລກດິຈິຕອນເພື່ອສ້າງສະພາບແວດລ້ອມທີ່ດີກວ່າສໍາລັບຕົວເຮົາເອງ.
“ມັນຊ່ວຍໃຫ້ທ່ານຫຼີກເວັ້ນເນື້ອຫາທີ່ອາດຈະເຮັດໃຫ້ຮູ້ສຶກບໍ່ສະບາຍໃຈ ໂດຍບໍ່ມີການຕັດການເຊື່ອມຕໍ່, ເຊິ່ງເປັນການແກ້ໄຂທີ່ເໝາະສົມສໍາລັບສະຖານະການທີ່ໜ້າອຶດອັດໃນຄວາມສຳພັນເຊັ່ນ: ສະມາຊິກໃນຄອບຄົວ, ເພື່ອນຮ່ວມງານ ຫຼື ຄົນທີ່ພວກເຮົາບໍ່ຕ້ອງການຍົກເລີກຕິດຕາມ. ເຖິງແມ່ນວ່າພວກເຂົາຈະສ້າງຄວາມໜ້າລໍາຄານໃນໂລກອອນລາຍກໍຕາມ, ການ Mute ພວກເຂົາຈະຊ່ວຍໃຫ້ສຸຂະພາບຈິດຂອງເຮົາດີຂຶ້ນ ໃນຂະນະທີ່ຍັງຄົງຮັກສາການເຄືອຂ່າຍທາງສັງຄົມ ຫຼື ວິຊາຊີບເອົາໄວ້ໄດ້”
ເຖິງແມ່ນວ່າຄໍາແນະນໍານີ້ເຫຼົ່ານີ້ຈະເບິ່ງຄືວ່າງ່າຍດາຍ ແລະ ຊັດເຈນ, ແຕ່ມັນອາດຈະເປັນການຍາກສໍາລັບບາງຄົນທີ່ຈະເຮັດ.
Monica Amorosi, ນັກບໍາບັດໃນນິວຢອກ ໄດ້ອະທິບາຍວ່າ ເມື່ອພວກເລື່ອນໄປເຫັນເນື້ອຫາໃນ social media ທີ່ເຮັດໃຫ້ເຮົາຕົກໃຈ, ໃຈຮ້າຍ ຫຼື ໜ້າລັງກຽດ, ຮ່າງກາຍຂອງພວກເຮົາຈະປ່ອຍຮໍໂມນ adrenaline ອອກມາ ເພາະສື່ເຫຼົ່ານີ້ປຽບສະເໝືອນ ຄວາມບັນເທີງ ຫຼື ສິ່ງທີ່ດຶງດູດຄວາມສົນໃຈຂອງເຮົາ.
“ໜ້າຟີດ social media ຂອງເຮົາຄວນຈະເປັນພື້ນທີ່ສຳລັບການຮຽນຮູ້ສິ່ງດີໆ, ເຊື່ອມຕໍ່ກັບຄົນທີ່ມີຄວາມຄິດຄ້າຍຄືກັນ ຫຼື ຄວາມຫຼາກຫຼາຍຕ່າງໆໃນທົ່ວໂລກ. ດັ່ງນັ້ນການ Mute ສິ່ງທີ່ເຮັດໃຫ້ເຮົາຮູ້ສຶກບໍ່ດີ ຫຼື ສົ່ງຜົນໃນທາງລົບຈື່ງເປັນວິທີທີ່ດີທີ່ສຸດ”
ສຳລັບທ່ານໃດທີ່ກຳລັງປະເຊີນກັບບັນຫາ social media ທີ່ສົ່ງຜົນເເຕ່ດ້ານລົບ, ມີແຕ່ເລື່ອງທີ່ໜ້າລຳຄານໃຈ ຫຼື ດຣາມ່າໃນແຕ່ລະມື້ ຈົນກະທົບຕໍ່ສຸຂະພາບຈິດຂອງເຮົາ ທັ້ງໆທີ່ຈະເປັນພື້ນທີ່ແບ່ງປັນແຕ່ເລື່ອງດີໆ. ໃຫ້ທ່ານລອງປະຕິບັດຄຳແນະນຳທີ່ແສນຈະງ່າຍດາຍເຫຼົ່ານີ້ ໂດຍການ Mute ບຸກຄົນເຫຼົ່ານັ້ນ, ເພື່ອຮັກສາສຸຂະພາບຈິດຂອງທ່ານ ໂດຍບໍ່ຕ້ອງເສຍມາລະຍາດ ແລະ ຍັງຄົງຮັກສາສາຍສຳພັນເອົາໄວ້ (ແຖມອີກຝ່າຍຍັງບໍ່ຮູ້ຕົວອີກ)
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
