ຫວຽດນາມກຽມທີ່ຈະອອກມາດຕະການຜ່ອນຜັນພາສີ ແລະ ສິດທິປະໂຫຍດອື່ນໆ ສໍາລັບບໍລິສັດຜະລິດ semiconductor ເພື່ອຊ່ວຍພັດທະນາອຸດສາຫະກໍາດັ່ງກ່າວ, ເນື່ອງຈາກວ່າຫວຽດນາມມີບົດບາດສຳຄັນຫຼາຍຂຶ້ນໃນທ່າມກາງສົງຄາມຊິບລະຫວ່າງຈີນກັບສະຫະລັດ.
ໂດຍໃນແຜນຍຸດທະສາດແຫ່ງຊາດຂອງຫວຽດນາມ ຈະກວມເງິນອຸດໜູນຊ່ວຍເຫຼືອເຂົ້າໃນອຸດສາຫະກຳຜ່ານກອງທຶນວິທະຍາສາດ ແລະ ການຄົ້ນຄວ້າຮ່ວມກັນກັບບໍລິສັດເຕັກໂນໂລຊີເອກະຊົນເຊັ່ນ FPT…
ບັນດາບໍລິສັດຕ່າງໆ ນັບຕັ້ງແຕ່ Nvidia ຈົນເຖິງ Samsung ຕ່າງກໍຊອກໂອກາດໃນການຂະຫຍາຍທຸລະກິດຊິບຂອງພວກເຂົາຢູ່ໃນຫວຽດນາມ. ເຊິ່ງຜູ້ຊ່ຽວຊານຄາດການວ່າຫວຽດນາມຈະສາມາດເຮັດລາຍໄດ້ຫຼາຍລ້ານໂດລາຈາກ US Chips and Science Act ແລະ ຍັງກາຍເປັນທີ່ຕັ້ງຂອງໂຮງງານໃນການທົດສອບ ແລະ ການປະກອບຊິ້ນສ່ວນທີ່ໃຫຍ່ທີ່ສຸດໃນໂລກຂອງ Intel.
Huynh Thanh Dat ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີຫວຽດນາມ ກ່າວວ່າ “ອຸດສາຫະກຳ semiconductor ຂອງ ຫວຽດນາມ ມີອັດຕາການຜະລິດພາຍໃນຕ່ຳ, ບັນດາການເຄື່ອນໄຫວຄົ້ນຄວ້າ ແລະ ການພັດທະນາບໍ່ສອດຄ່ອງ, ຊັບພະຍາກອນມະນຸດທີ່ມີຄຸນະພາບສູງໃນດ້ານ semiconductor ຍັງຈໍາກັດ”
ເມື່ອບໍ່ດົນມານີ້, ຫວຽດນາມໄດ້ພາດການລົງທຶນຫຼາຍຕື້ໂດລາຈາກບໍລິສັດຍັກໃຫຍ່ເຊັ່ນ Intel ຈາກສະຫະລັດ ແລະ AT&S ຈາກອອສເຕຣຍ, ເຊິ່ງທັງສອງໄດ້ເລືອກມາເລເຊຍເປັນທີ່ຕັ້ງທີ່ສຳຄັນສໍາລັບການຂະຫຍາຍການຜະລິດຄັ້ງໃຫຍ່ໃນການສົ່ງອອກ.
ແນວໃດກໍດີ, Jose Fernandez ຮອງລັດຖະມົນຕີການຕ່າງປະເທດ ຝ່າຍຮັບຜິດຊອບການເຕີບໂຕດ້ານເສດຖະກິດ, ພະລັງງານ ແລະ ສິ່ງແວດລ້ອມຂອງສະຫະລັດກ່າວວ່າ “ຫວຽດນາມ ໄດ້ດຶງດູດບໍລິສັດ semiconductor ຫຼາຍສິບແຫ່ງ ແລະ ບໍລິສັດຂອງສະຫະລັດອີກຫຼາຍເເຫ່ງກໍກໍາລັງກະກຽມທີ່ຈະຂະຫຍາຍຕົວເຂົ້າໄປໃນປະເທດ. ຖ້າຫາກວ່າ ຫວຽດນາມ ມີພະລັງງານທົດແທນພຽງພໍທີ່ຈະຕອບຮັບເປົ້າໝາຍສີຂຽວທີ່ບັນດາບໍລິສັດດັ່ງກ່າວໄດ້ວາງອອກໄວ້”
ຫວຽດນາມ ຕັ້ງເປົ້າໝາຍໃນການເຝິກອົບຮົມວິສະວະກອນໃນອຸດສາຫະກຳຊິບໃຫ້ໄດ້ 50,000 ຄົນພາຍໃນປີ 2030, ແລະ ບັນດາມະຫາວິທະຍາໄລກໍໄດ້ເລີ່ມເປີດສອນບັນດາວິຊາສະເພາະກ່ຽວກັບ Semiconductor ຮ່ວມກັບບໍລິສັດຕ່າງໆເຊັ່ນ Samsung, ເຊິ່ງຫວຽດນາມ ມີພື້ນຖານການສຶກສາດ້ານວິທະຍາສາດເຕັກໂນໂລຊີທີ່ແຂງແຮງຢູ່ເເລ້ວ ແຕ່ຍັງມີການຂາດແຄນທັກສະຂັ້ນສູງທີ່ເປັນຂໍ້ຈຳກັດໃນການກ້າວຂຶ້ນສູ່ການເປັນອຸດສາຫະກຳອັນດັບຕົ້ນໆໃນດ້ານເອເລັກໂຕຣນິກ.
ຢ່າງໃດກໍຕາມ, ການແຂ່ງຂັນດ້ານເຕັກໂນໂລຊີຂອງຈີນກັບສະຫະລັດ ໄດ້ຊຸກຍູ້ອຸດສາຫະກໍາ semiconductor ແລະ ບໍລິສັດອື່ນໆ ທີ່ກ່ຽວຂ້ອງຕ້ອງໄດ້ຊອກສະຖານທີ່ສຳຮອງເພື່ອຫຼີກເວັ້ນຜົນກະທົບທີ່ອາດຈະເກີດຂຶ້ນ.
ນອກຈາກນີ້, ຫວຽດນາມ ກໍໄດ້ສະແດງໃຫ້ເຫັນເຖິງຄວາມທຸ້ມເທຕໍ່ກັບອຸດສາຫະກຳຊິບ. ໂດຍໄດ້ເພີ່ມສອງໂຄງການຂອງລັດຖະບານຄື: ມູນນິທິພັດທະນາວິທະຍາສາດ ແລະ ເຕັກໂນໂລຊີແຫ່ງຊາດ ສໍາລັບການສະໜອງເງິນອຸດໜູນ ແລະ ການສະໜັບສະໜູນດ້ານຕ່າງໆໃນໂຄງການພັດທະນາຜະລິດຕະພັນແຫ່ງຊາດ, ເຊິ່ງນີ້ແມ່ນຄວາມພະຍາຍາມຮ່ວມກັນເພື່ອສ້າງ 10 ຜະລິດຕະພັນທີ່ສາມາດສົ່ງເຂົ້າແຂ່ງຂັນໃນປີ 2030, ລວມໄປເຖິງການຜະລິດເພື່ອສົ່ງອອກອີກດ້ວຍ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
