ສປປ ລາວ ກຳລັງຊຸກຍູ້ປັບປຸງ ດ້ານກະສິກຳ ຂອງປະເທດໃຫ້ດີຂຶ້ນ, ພາຍໃຕ້ໂຄງການ ການກໍ່ສ້າງໂຮງງານຂ້າສັດທັນສະໄໝ, ເຊິ່ງຄາດວ່າ ຈະກາຍ ເປັນໜຶ່ງ ໃນໂຄງການ ສາກົນ ທີ່ໃຫຍ່ທີ່ສຸດ ໃນລາວ ແລະ ໃນພາກພື້ນ ອາຊີຕາເວັນອອກ ສ່ຽງໃຕ້.
ໂຄງການດັ່ງກ່າວແມ່ນໄດ້ຖືກພັດທະນາໂດຍບໍລິສັດ ຄຳນເຊິງ ສາກົນຈໍາກັດ. ໂດຍສະຖານທີ່ດັ່ງກ່າວພວມກໍ່ສ້າງຢູ່ບ້ານ ສິມມະໂນ ເມືອງຫາດຊາຍຟອງ ນະຄອນຫຼວງວຽງຈັນ.
ໂຄງການດັ່ງກ່າວ, ຄາດວ່າຈະສຳເລັດໃນທ້າຍປີ 2024 ແລະ ເປີດດຳເນີນການໃນຕົ້ນປີ 2025, ເຊິ່ງຈະມີບົດບາດສຳຄັນໃນພື້ນຖານໂຄງລ່າງກະສິກຳ ແລະ ຜະລິດສະບຽງອາຫານຂອງພາກພື້ນ.
ລາຍງານຄວາມຄືບໜ້າດັ່ງກ່າວ ເກີດຂຶ້ນໃນລະຫວ່າງການຢ້ຽມຢາມໂຄງການຂອງ ທ່ານ ດຣ ລິນຄຳ ດວງສະຫວັນ ລັດຖະມົນຕີກະຊວງກະສິກຳ ແລະ ປ່າໄມ້ ເມື່ອອາທິດທີ່ຜ່ານມາ.
ໃນການຢ້ຽມຢາມ, ທ່ານ ດຣ ລິນຄຳ ໄດ້ເນັ້ນໜັກເຖິງຄວາມສຳຄັນຂອງໂຄງການນີ້ໃນການຮັບປະກັນຄວາມໝັ້ນຄົງດ້ານສະບຽງອາຫານ ແລະ ຊຸກຍູ້ການຜະລິດສິນຄ້າຢູ່ລາວ.
ໂອກາດນີ້ ຕາງໜ້າ ບໍລິສັດ ໄດ້ລາຍງານກ່ຽວກັບສະພາບລວມຂອງໂຄງການກໍ່ສ້າງໂຮງຂ້າສັດທັນສະໄໝ ໂດຍສະເພາະແມ່ນຄວາມຄືບໜ້າຂອງໂຄງການ ຊຶ່ງຄາດວ່າຈະສຳເລັດການກໍ່ສ້າງ ໃນທ້າຍປີ 2024 ແລະ ກຽມເປີດນໍາໃຊ້ໃນຕົ້ນປີ 2025 ໂດຍໂຮງງານມີຂະໜາດ 68 ແມັດ x 258 ແມັດ, ມີກໍາລັງການຜະລິດ 1 ພັນໂຕ/ວັນ (ເຮັດວຽກ 2 ກະ 16 ຊົ່ວໂມງ) ມູນຄາການລົງທຶນທັງໝົດ ແມ່ນ 500 ລ້ານໂດລາ.
ພາຍຫຼັງການລົງຢ້ຽມຢາມ, ທ່ານລັດຖະມົນຕີໄດ້ເປັນປະທານກອງປະຊຸມຢູ່ກະຊວງກະສິກຳ ແລະ ປ່າໄມ້ ເພື່ອປຶກສາຫາລືກ່ຽວກັບຄວາມຄືບໜ້າຂອງໂຄງການ ແລະ ບັນດາບາດກ້າວທີ່ຈຳເປັນໃນການປະຕິບັດໃຫ້ສຳເລັດຜົນ.
ທ່ານຮຽກຮ້ອງມາຍັງບັນດາກົມວິຊາການທີ່ກ່ຽວຂ້ອງ, ເປັນຕົ້ນແມ່ນພະແນກລ້ຽງສັດ ແລະ ການປະມົງ, ພະແນກກະສິກຳ ແລະ ກົມສົ່ງເສີມກະສິກຳ ແລະ ສະຫະກອນ ຈົ່ງພ້ອມກັນສົມທົບກັນຢ່າງແໜ້ນແຟ້ນ ເພື່ອເຮັດໃຫ້ໂຄງການດັ່ງກ່າວບັນລຸຕາມຄາດໝາຍ.
ທ່ານລັດຖະມົນຕີ ກະຊວງກະສິກຳ ແລະ ປ່າໄມ້ ເນັ້ນໜັກເຖິງຄວາມຈຳເປັນຂອງການປະສານງານລະອຽດຂອງທຸກພາກສ່ວນທີ່ກ່ຽວຂ້ອງ, ໂດຍຖືວ່າ ໂຄງການນີ້ບໍ່ພຽງແຕ່ເປັນຜົນສຳເລັດອັນສຳຄັນຂອງປະເທດລາວເທົ່ານັ້ນ ແຕ່ຍັງເປັນການພັດທະນາອັນສຳຄັນຂອງຂະແໜງອຸດສາຫະກຳກະສິກຳຂອງອາຊີຕາເວັນອອກສ່ຽງໃຕ້ອີກດ້ວຍ.
ທີ່ມາ: ຂ່າວສານກະສິກຳ,ປ່າໄມ້ ແລະ ພັດທະນາ ຊົນນະບົດ, https://www.facebook.com/100063552519728/videos/1190256948871928
