ລັດຖະບານຈະດຳເນີນການໂຈະທຸລະກິດ, ປັບໃໝ ແລະ ຍົກເລີກໃບອະນຸຍາດຂອງບໍລິສັດທີ່ບໍ່ມີຄວາມຄືບໜ້າ ຫຼື ບັນລຸຂໍ້ຕົກລົງກ່ຽວກັບການຂຸດຄົ້ນ ແລະ ການຊື້ຂາຍ cryptocurrencies ໃນປະເທດລາວ.
ເຊິ່ງກ່ອນໜ້ານີ້, ເພື່ອທີ່ຈະເພີ່ມລາຍຮັບເຂົ້າມາໃນປະເທດຈາກເເຫຼ່ງທຸລະກິດໃໝ່ ລັດຖະບານໄດ້ອະນຸຍາດໃຫ້ບໍລິສັດ 15 ເເຫ່ງສາມາດເຂົ້າມາທົດລອງຂຸດ Bitcoin ເເລະ ເຮັດການຊື້ຂາຍໃນສະກຸນເງິນດິຈິຕອນ.
ໃນວັນທີ 9 ພະຈິກ, ໃນກອງປະຊຸມສະພາເເຫ່ງຊາດ ໄດ້ມີສະມາຊິກໃນສະພາໄດ້ຍົກຄຳຖາມອອກມາໃນສະພາເພື່ອຫາລືກ່ຽວກັບມາດຕະການທີ່ຈະຕ້ອງປະຕິບັດຕໍ່ຜູ້ຖືສຳປະທານທີ່ບໍ່ມີການເຄື່ອນໄຫວໃນທຸລະກິດທີ່ກ່ຽວຂອງກັບສະກຸນເງິນດິຈິຕອນ. ເຊິ່ງທ່ານນາຍົກລັດຖະມົນຕີ ສອນໄຊ ສີພັນດອນ ກໍຍອມຮັບວ່າ ໄດ້ພົບເຫັນສອງບໍລິສັດບໍ່ມີຄວາມຄືບໜ້າ ເເລະ ບາງບໍລິສັດກໍຫຼ້າຊ້າໃນການຊຳລະຄ່າທຳນຽມ, ໃນຂະນະທີ່ບໍລິສັດສ່ວນຫຼາຍມີຄວາມຄືບໜ້າ ແລະ ໄດ້ສ້າງລາຍຮັບຢ່າງຫຼວງຫຼາຍເຂົ້າມາໃຫ້ກັບງົບປະມານຂອງລັດ.
ທ່ານ ສອນໄຊ ສິີພັນດອນ ກ່າວວ່າ ຄ່າທຳນຽມທີ່ໄດ້ຄ້າງຊຳລະເເມ່ນມີຈຳນວນ 20 ລ້ານໂດລາສະຫະລັດ (415.3 ຕື້ກີບ) ການທີ່ບໍລິສັດຫຼ້າຊ້າໃນການຊໍາລະຄ່າທໍານຽມນັ້ນ ເເມ່ນເກີດຈາກມູນຄ່າຂອງ Bitcoin ໃນຕະຫຼາດໂລກໄດ້ມີການຫຼຸດລົງຫຼາຍກວ່າ 50% ເມື່ອທຽບກັບມູນຄ່າໃນເວລາທີ່ລັດຖະບານກໍານົດຄ່າທໍານຽມ. ເນື່ອງຈາກວ່າມັນເປັນຄ່າທໍານຽມທີ່ສາມາດເຈລະຈາຕໍ່ລອງກັນໄດ້ຕາມລາຄາທົ່ວໂລກ (ລາຄາທີ່ເພີ່ມຂຶ້ນໝາຍເຖິງຄ່າທໍານຽມທີ່ຈະຕ້ອງຈ່າຍກໍຈະເພີ່ມຂຶ້ນນຳ), ລັດຖະບານຈຶ່ງໄດ້ມີການພິຈາລະນາ ແລະ ຕັດສິນໃຈທີ່ຈະຫຼຸດຄ່າທໍານຽມທີ່ຕ້ອງຊຳລະລົງ 50%
ທ່ານ ສອນໄຊ ສິີພັນດອນ ກ່າວຕໍ່ບັນດາສະມາຊິກລັດຖະສະພາວ່າ “ໂດຍການຕັດສິນໃຈດັ່ງກ່າວ, ບໍລິສັດທີ່ກ່ຽວຂ້ອງຈະຕ້ອງໄດ້ເລີ່ມຈ່າຍຄ່າທຳນຽມຂອງພວກເຂົາ ແລະ ຄາດວ່າຄ່າທຳນຽມທັງໝົດຈະຖືກຊຳລະເຕັມຈຳນວນໃນທ້າຍປີ 2023”
ລັດຖະບານນັ້ນໄດ້ມີການຕິດຕາມບໍລິສັດ ເເລະ ທຸລະກິດທີ່ກ່ຽວຂ້ອງກັບສະກຸນເງິນດິຈິຕອນຢ່າງໃກ້ຊິດ, ໂດຍໄດ້ກ່າວເຕືອນວ່າ ບັນດາບໍລິສັດທີ່ບໍ່ມີຄວາມຄືບໜ້າ ຫຼື ບໍ່ປະຕິບັດຕາມຂໍ້ຕົກລົງທີ່ລົງນາມກັບລັດຖະບານ ອາດຈະເຮັດໃຫ້ການດຳເນີນທຸລະກິດຂອງເຂົາເຈົ້າຖືກໂຈະ, ປັບໃໝ ແລະ ເຖິງຂັ້ນຖືກຖອດຖອນໃບອະນຸຍາດຕາມກົດໝາຍອອກ.
ນັບຕັ້ງເເຕ່ໄດ້ມີການອະນຸຍາດໃຫ້ບໍລິສັດຕ່າງໆເຂົ້າມາທົດລອງຂຸດ Bitcoin ຈົນເຖິງປັດຈຸບັນ, ບໍລິສັດຕ່າງໆໄດ້ສ້າງລາຍໄດ້ລວມກວ່າ 390 ລ້ານໂດລາ (8,101 ຕື້ກີບ). ເຊິ່ງໃນເງິນຈຳນວນນີ້ ໄດ້ມີຄ່າໃບອະນຸຍາດມູນຄ່າ 7 ລ້ານກວ່າໂດລາສະຫະລັດ (145.4 ຕື້ກວ່າກີບ) ເເລະ 5.71 ຕື້ກີບໃຫ້ກັບລັດຖະບານ, ຄ່າອາກອນ 23.86 ລ້ານໂດລາສະຫະລັດ (495.4 ຕື້ກວ່າກີບ) ແລະ ຄ່າໄຟຟ້າ 359.96 ລ້ານໂດລາສະຫະລັດ (ກວ່າ 7,476 ຕື້ກີບ) ຈ່າຍໃຫ້ ລັດວິສາຫະກິດໄຟຟ້າລາວ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
