ລັດຖະບານພວມດຳເນີນມາດຕະການຄຸ້ມຄອງການນຳໃຊ້ເງິນຕາຕ່າງປະເທດ ແລະ ຊຸກຍູ້ໃຫ້ມີການນຳໃຊ້ເງິນກີບໃຫ້ກວ້າງຂວາງ ແນໃສ່ກ່ຮເຮັດໃຫ້ອັດຕາເງິນເຟີ້ຫຼຸດລົງ ແລະ ເສີມສ້າງມູນຄ່າຂອງເງິນກີບ.
ທະນາຄານແຫ່ງ ສປປ ລາວ (ທຫລ) ໄດ້ຈັດກອງປະຊຸມປຶກສາຫາລືກ່ຽວກັບກົດໝາຍວ່າດ້ວຍເງິນຕາຕ່າງປະເທດ ໂດຍສະເພາະການນຳໃຊ້ເງິນຕາຕ່າງປະເທດ ແລະບັນຊີທະນາຄານເງິນຕາຕ່າງປະເທດ. ໂດຍບັນດາສະມາຊິກຄະນະໄດ້ແລກປ່ຽນຄວາມເຫັນກ່ຽວກັບຮ່າງກົດໝາຍ 2 ສະບັບກ່ຽວກັບບັນດາຂົງເຂດທີ່ກ່ຽວຂ້ອງ.
ໃນໄລຍະທີ່ຜ່ານມາ ທຫລ ຍັງບໍ່ໄດ້ຜັນຂະຫຍາຍເປັນນິຕິກຳ ເປັນອັນສະເພາະ ໃນການຄຸ້ມຄອງການນຳໃຊ້ເງິນຕາຕ່າງປະເທດ ແລະ ການເປີດບັນຊີເງິນຝາກເງິນຕາຕ່າງປະເທດ ຢູ່ ສປປ ລາວ, ເຮັດໃຫ້ການຄອບຄອງເງິນຕາຕ່າງປະເທດ ທັງໃນຮູບແບບເງິນຝາກ ແລະ ເງິນສົດ ຢູ່ໃນສັງຄົມ ຍັງບໍ່ມີຄວາມເປັນເອກະພາບ ໃນການຈັດຕັ້ງປະຕິບັດທີ່ຊັດເຈນ.
ດັ່ງນັ້ນ, ທ່ານ ເພັດສະຖາພອນ ແກ້ວວົງວິຈິດ ຫົວໜ້າກົມຄຸ້ມຄອງເງິນຕາຕ່າງປະເທດ ຈຶ່ງໄດ້ນໍາສະເໜີ 02 ນິຕິກໍາ ຄື: ຮ່າງຂໍ້ຕົກລົງວ່າດ້ວຍການນໍາໃຊ້ເງິນຕາຕ່າງປະເທດຢູ່ ສປປ ລາວ; ຮ່າງຂໍ້ຕົກລົງວ່າດ້ວຍການຄຸ້ມຄອງບັນຊີເງິນຝາກເປັນເງິນຕາຕ່າງປະເທດຢູ່ ສປປ ລາວ.
ໂດຍການເຄື່ອນໄຫວດັ່ງກ່າວ ແມ່ນແນໃສ່ສ້າງຄວາມເປັນເອກະພາບໃນຂັ້ນສູນກາງ ແລະ ທ້ອງຖິ່ນ ໃນການຊຸກຍູ້ການຄ້າ, ການບໍລິການ ແລະ ການລົງທຶນຂອງລາວ, ໂດຍມີເປົ້າໝາຍຮັບປະກັນໃຫ້ລາຍຮັບຈາກເງິນຕາຕ່າງປະເທດເຂົ້າສູ່ລະບົບທະນາຄານຂອງລາວຫຼາຍຂຶ້ນ.
ເປົ້າໝາຍສູງສຸດຂອງ ທຫລ ແມ່ນໃຫ້ທຸກຫົວໜ່ວຍໃນລາວນຳໃຊ້ເງິນກີບຢ່າງເປັນເອກະພາບ, ດຳເນີນທຸລະກຳເປັນເງິນຕາຕ່າງປະເທດຕາມທີ່ໄດ້ກຳນົດໄວ້ ແລະ ຮັບປະກັນໃຫ້ມີເງິນຕາຕ່າງປະເທດພຽງພໍເພື່ອຊໍາລະໃຫ້ປະເທດອື່ນ.
ມາຮອດປັດຈຸບັນ, ທະນາຄານກາງຍັງບໍ່ທັນສ້າງນິຕິກຳສະເພາະໃດໜຶ່ງກ່ຽວກັບການນຳໃຊ້ເງິນຕາຕ່າງປະເທດ ແລະ ການເປີດບັນຊີເງິນຝາກເງິນຕາຕ່າງປະເທດໃນລາວ ເຊິ່ງໝາຍຄວາມວ່າການຄອບຄອງເງິນຕາຕ່າງປະເທດທັງທີ່ຝາກໄວ້ໃນບັນຊີທະນາຄານ ແລະ ນຳໃຊ້ເຂົ້າໃນທຸລະກຳເງິນສົດກໍ່ຍັງບໍ່ທັນມີ
ທ່ານ ສຸລິວັດ ສຸວັນນະຈູມຄໍາ, ຮອງຜູ້ວ່າການ ທຫລ ກ່າວວ່າ: ເຖິງວ່າກົດໝາຍທີ່ກ່ຽວຂ້ອງໃນເລື່ອງນີ້ ຈະຖືກປະກາດໃຊ້ໃນອະດີດ ແລະ ທະນາຄານໄດ້ສົ່ງເສີມການນຳໃຊ້ເງິນກີບຢ່າງຫ້າວຫັນໃນທົ່ວເສດຖະກິດ, ແຕ່ນິຕິກຳຕ່າງໆ ຍັງບໍ່ໄດ້ຖືກບັງຄັບໃຊ້ ແລະ ປະຊາຊົນສ່ວນໃຫຍ່ບໍ່ສົນໃຈ,
ມີຄວາມຕ້ອງການເງິນຕາຕ່າງປະເທດຂອງປະຊາຊົນຢ່າງຫຼວງຫຼາຍ ແລະ ມີອັດຕາແລກປ່ຽນເງິນກີບສູງ. ເມື່ອຄົນມີເງິນຕາຕ່າງປະເທດຢາກແລກປ່ຽນເປັນເງິນກີບ, ເຂົາເຈົ້າບໍ່ໃຊ້ທະນາຄານ.
ສິນຄ້າທີ່ຂາຍໃນລາວ ສ່ວນໃຫຍ່ ແມ່ນນໍາເຂົ້າ ແລະ ກໍານົດລາຄາ ສິນຄ້າ ແລະ ການບໍລິການ ເປັນເງິນຕາ ຕ່າງປະເທດ.
ກົດໝາຍສະບັບນີ້ ຊ່ວຍໃຫ້ທະນາຄານກາງກຳນົດວ່າ ຫົວໜ່ວຍໃດສາມາດນຳໃຊ້ເງິນຕາຕ່າງປະເທດໃນລາວ ເຊັ່ນ: ເຂດເສດຖະກິດພິເສດ, ເຂດການຄ້າຊາຍແດນ ແລະ ຮ້ານຄ້າປອດພາສີ ລວມທັງທຸລະກິດທີ່ເສຍພາສີອາກອນໃຫ້ລັດຖະບານ ແລະ ແຫຼ່ງລາຍຮັບຕົ້ນຕໍແມ່ນມາຈາກເງິນຕາຕ່າງປະເທດ.
ລັດຖະບານໄດ້ຊີ້ນຳໃຫ້ທະນາຄານກາງຮັດແໜ້ນລະບົບການຊຳລະເງິນຕາຕ່າງປະເທດແບບເອເລັກໂຕຼນິກຢ່າງເຂັ້ມງວດ ແລະ ໃຊ້ວິທີທີ່ມີປະສິດທິຜົນເພື່ອກວດສອບວ່າທຸລະກຳແມ່ນຖືກຕ້ອງ ແລະ ບັນລຸຈຸດປະສົງທີ່ແທ້ຈິງຂອງການຊຳລະ, ເພື່ອໃຫ້ການນຳໃຊ້ເງິນຕາຕ່າງປະເທດຖືກກົດໝາຍ.
ໃນຕອນທ້າຍ ຂອງກອງປະຊຸມ, ທ່ານ ນາງ ວັດທະນາ ດາລາລອຍ ຮັກສາການຜູ້ວ່າການ ທຫລ ໄດ້ຮຽກຮ້ອງມາຍັງທຸກພາກສ່ວນໃນສັງຄົມ ພ້ອມທັງພາກລັດ ແລະ ເອກະຊົນ ຈົ່ງພ້ອມກັນຈັດຕັ້ງຜັນຂະຫຍາຍບັນດານິຕິກຳກ່ຽວກັບການຄຸ້ມຄອງເງິນຕາຕ່າງປະເທດ ຢູ ສປປ ລາວ ໃຫ້ເຂັ້ມງວດ ແລະ ມີການປ່ຽນແປງໃໝ່, ນຳໃຊ້ເງິນກີບຢ່າງເປັນເອກະພາບ, ນຳໃຊ້ເງິນຕາຕ່າງປະເທດເທົ່າທີ່ຈຳເປັນ ແລະ ໃຫ້ຖືກຕ້ອງກັບຈຸດປະສົງ, ເປົ້າໝາຍຂອງການນໍາໃຊ້ເງິນຕາຕ່າງປະເທດ ເພື່ອຮັບປະກັນຖານະເງິນຕາຕ່າງປະເທດ ຊຳລະກັບຕ່າງປະເທດໃຫ້ມີຄວາມເຂັ້ມແຂງ, ທັງນີ້ ກໍ່ເພື່ອຮັກສາຄ່າຂອງເງິນກີບ ແລະ ຍົກສູງບົດບາດຄ່າເງິນກີບ ເຮັດໃຫ້ເງິນກີບ ມີສະຖຽນລະພາບ ແລະ ເປັນທີ່ຕ້ອງການນັບມື້ຫຼາຍຂຶ້ນ ດັ່ງຄຳຂວັນທີ່ວ່າ “ຢູ່ເມືອງລາວ ໃຊ້ແຕ່ເງິນກີບ”.
ທີ່ມາ: ທຫລ, Vientiane Times
Vientiane Times
(1) ກອງປະຊຸມສົນທະນາແລກປ່ຽນຄ… – ທະນາຄານແຫ່ງ ສປປ ລາວ – Bank of the Lao PDR | Facebook
