ຊາວກະສິກອນ ແຂວງຫຼວງພະບາງ ປູກກາເຟເພື່ອສົ່ງອອກໄປປະເທດຍີ່ປຸ່ນ, ພາຍໃຕ້ໂຄງການຄໍ້າປະກັນສະບຽງອາຫານໃຫ້ຊາວກະສິກອນ ດ້ວຍການສ້າງຄວາມເຂັ້ມແຂງທາງດ້ານເສດຖະກິດກັບຍີ່ປຸ່ນ (COFFEE-JAPAN).
ອີງຕາມການລາຍງານຂອງໜັງສືພິມ ວຽງຈັນທາມ, ນັບຕັ້ງແຕ່ໂຄງການດັ່ງກ່າວໄດ້ເລີ່ມຂຶ້ນໃນເດືອນກຸມພາ, ປະຊາຊົນໃນແຂວງຫຼວງພະບາງໄດ້ເລີ່ມປ່ຽນແປງວິຖີຊີວິດຂອງເຂົາເຈົ້າ, ໂດຍໄດ້ຮັບການສະໜັບສະໜູນທາງດ້ານເຕັກນິກ, ວິຊາການຕ່າງໆ ໃນການປູກກາເຟເພື່ອສົ່ງອອກ.
ໂຄງການ COFFEE-JAPAN ແມ່ນໄດ້ຮັບທຶນສະໜັບສະໜູນຈາກລັດຖະບານຍີ່ປຸ່ນ ແລະ ໄດ້ດຳເນີນການຮ່ວມມືກັບກະຊວງກະສິກຳ ແລະ ປ່າໄມ້ຂອງລາວ, ອົງການອາຫານໂລກຂອງສະຫະປະຊາຊາດ ແລະ ບໍລິສັດເອກະຊົນຈຳນວນໜຶ່ງ.
ໂຄງການດັ່ງກ່າວພວມດຳເນີນຢູ່ 8 ບ້ານໃນເມືອງໂພນໄຊ ແລະ ວຽງຄຳ ແຂວງຫຼວງພະບາງ, ເຊິ່ງຈະດຳເນີນໃນໄລຍະ 30 ເດືອນ, ໂດຍກາເຟທີ່ຜະລິດພາຍໃຕ້ໂຄງການດັ່ງກ່າວຈະຖືກຂາຍໃຫ້ຍີ່ປຸ່ນ.
ການຊ່ວຍເຫຼືອຂອງຍີ່ປຸ່ນແມ່ນການຊ່ວຍເຫຼືອເພື່ອສະຖຽນລະພາບ ແລະ ປັບປຸງລາຍຮັບຂອງຊົນນະບົດ, ພ້ອມທັງຮັບປະກັນຄວາມປອດໄພດ້ານສະບຽງອາຫານແລະການປັບປຸງໂພຊະນາການ.
ໂຄງການດັ່ງກ່າວໄດ້ສະໜອງການເຝິກອົບຮົມ ແລະ ພື້ນຖານໂຄງລ່າງໃຫ້ແກ່ຊາວກະສິກອນ, ເຊິ່ງຈະເປັນຜົນປະໂຫຍດຂອງໝູ່ບ້ານທັງໝົດຂອງເຂົາເຈົ້າ, ໂດຍມີເປົ້າໝາຍສູງສຸດຄືເຮັດໃຫ້ຊີວິດການເປັນຢູ່ທີ່ດີຂອງທຸກໆຄົນໃນຊຸມຊົນດີຂຶ້ນ.
ໂຄງການດັ່ງກ່າວຊ່ວຍຊຸກຍູ້ການຜະລິດກາເຟ ແລະ ຊອກຫາຕະຫຼາດໃຫ້ຊາວກະສິກອນ, ໃນຂະນະດຽວກັນກໍສົ່ງເສີມການເຂົ້າເຖິງ ແລະ ຄວາມເຂົ້າໃຈກ່ຽວກັບໂພຊະນາການທີ່ຈໍາເປັນ. ເຊິ່ງຄວາມຄືບໜ້າຂອງການປະຕິບັດໂຄງການໄດ້ເຮັດໃຫ້ຊາວກະສິກອນມີການປ່ຽນແປງແນວຄິດຂອງເຂົາເຈົ້າ ແລະ ຮັບເອົາວິຖີຊີວິດທີ່ງ່າຍຂຶ້ນ ແລະ ມີສຸຂະພາບດີຂຶ້ນ.
ເຂົາເຈົ້າໄດ້ຮຽນຮູ້ກ່ຽວກັບຄວາມສໍາຄັນຂອງໂພຊະນາການທີ່ດີ ແລະ ກໍາລັງໄດ້ຮັບລາຍໄດ້ໃໝ່ຈາກການປູກກາເຟ ແລະ ກໍາລັງຮຽນຮູ້ກ່ຽວກັບຄວາມຕ້ອງການທີ່ຈະປົກປັກຮັກສາທີ່ດິນປ່າໄມ້ ແບບ ຢືນຢົງ.
ໃນໄລຍະທີ່ຜ່ານມາ ຊາວກະສິກອນຮຸ່ນກ່ອນກໍເຄີຍພະຍາຍາມປູກກາເຟມາກ່ອນ, ແຕ່ດ້ວຍຄວາມຮູ້ທີ່ບໍ່ພຽງພໍ ແລະ ບໍ່ມີການເຂົ້າເຖິງຕະຫຼາດທີ່ຖືກຕ້ອງ ເຮັດໃຫ້ທຸລະກິດກາເຟຂອງເຂົາເຈົ້າບໍ່ສາມາດດຳເນີນຕໍ່ໄປໄດ້ ແລະ ຕົ້ນກາເຟສ່ວນໃຫຍ່ທີ່ພວກເຂົາປູກໄວ້ແມ່ນຖືກຖິ້ມປະໄປ.
ປັດຈຸບັນ, ພາຍໃຄ້ໂຄງການດັ່ງກ່າວ, ຊາວກະສິກອນຮຸ່ນໃໝ່ທີ່ມີຄວາມຮູ້ ແລະ ມີການເຂົ້າເຖິງຕະຫຼາດທີ່ເໝາະສົມ ໄດ້ກັບມາສານຕໍ່ກິດຈະການທີ່ພໍ່ແມ່ຂອງພວກເຂົາໄດ້ເລີ່ມໄວ້. ດ້ວຍເງິນທີ່ໄດ້ຈາກການປູກກາເຟ, ຊາວກະສິກອນສາມາດຊື້ອາຫານທີ່ມີໂພຊະນາການ ແລະ ດີຕໍ່ສຸຂະພາບໃຫ້ກັບຄອບຄົວຂອງພວກເຂົາໄດ້.
ຕິດຕາມຂ່າວທັງໝົດຈາກ LaoX: https://laox.la/all-posts/
