ການສົ່ງອອກຜັກ ແລະ ໝາກໄມ້ໃນເຄິ່ງທຳອິດຂອງປີ 2024 ມີມູນຄ່າ 3,4 ຕື້ໂດລາສະຫະລັດ, ເພີ່ມຂຶ້ນ 28% ເມື່ອທຽບໃສ່ປີກາຍ, ຍ້ອນຄວາມຕ້ອງການທີ່ເພີ່ມຂຶ້ນຂອງຕະຫຼາດໃນພາກພື້ນທີ່ເພີ່ມຂຶ້ນ.
ອີງຕາມການລາຍງານຂອງ Vnexpress, ສະມາຄົມຜັກ ແລະ ໝາກໄມ້ຫວຽດນາມ ໃຫ້ຮູ້ວ່າ: ຜູ້ຊື້ລາຍໃຫຍ່ຈາກຫວຽດນາມໄດ້ແກ່ ຕະຫຼາດ ຈີນ, ໄທ ແລະ ສ.ເກົາຫຼີ ເຊິ່ງໄດ້ເພີ່ມການນຳເຂົ້າຈາກຫວຽດນາມ 30-60%, ແລະ ບາງຕະຫຼາດສຳຄັນອື່ນໆເພີ່ມຂຶ້ນ 10-50%.
ໂດຍໃນຈຳນວນດັ່ງກ່າວ ຈີນໄດ້ກວມເອົາ 1,7 ຕື້ໂດລາສະຫະລັດໃນເວລາພຽງ 5 ເດືອນຕົ້ນປີ. ທ່ານ Dang Phuc Nguyen ປະທານຂອງ ສະມາຄົມໃຫ້ຮູ້ວ່າ: ຫວຽດນາມ ມີທ່າໄດ້ປຽບໃນການສົ່ງອອກໄປຍັງຈີນ ຍ້ອນພູມສັນຖານໃກ້ຄຽງ ແລະ ຄວາມຄ້າຍຄືກັນໃນດ້ານອາຫານ ໂດຍສະເພາະໝາກຖົ່ວລຽນທີ່ຈີນກຳລັງຕ້ອງການເປັນຈຳນວນຫຼາຍ.
ທ່ານກ່າວວ່າຕື່ມວ່າ ຈີນຈະລົງນາມໃນອະນຸສັນຍາໃນໄວໆນີ້ເພື່ອໃຫ້ຫວຽດນາມສົ່ງອອກໝາກຖົ່ວລຽນແຊ່ແຂງ ແລະ ຜະລິດຕະພັນກະເສດອື່ນໆເຊັ່ນ ຢາສະໝຸນໄພ, ໝາກພ້າວ ແລະ ໝາກໄມ້ແຊ່ແຂງຕື່ມອີກ.
ຕິດຕາມຂ່າວທັງໝົດຈາກ LaoX: https://laox.la/all-posts/
