ກະຊວງໂຍທາທິການ ແລະ ຂົນສົ່ງ ສປປ ລາວ ແລະ ສາຍການບິນຫວຽດເຈັດ ຂອງ ສສ ຫວຽດນາມ ໄດ້ບັນລຸຂໍ້ຕົກລົງເພີ່ມທະວີການເຊື່ອມຕໍ່ການຂົນສົ່ງທາງອາກາດລະຫວ່າງ ປະເທດລາວ-ຫວຽດນາມຄາດສ້າງອາຊີບ ໃນຂະແໜງການບິນໄດ້ກວ່າ 2,500 ຄົນ.
ອີງຕາມການລາຍງານຂອງ ໜັງສືພິມ ປະຊາຊົນ, ພິທີປະກາດດັ່ງກ່າວໄດ້ຈັດຂຶ້ນໃນວັນທີ 11 ກໍລະກົດ ນີ້ ຢູ່ນະຄອນຫຼວງວຽງຈັນ ໂດຍການເປັນສັກຂີພິຍານຂອງ ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ແລະ ທ່ານ ໂຕ ເລິມ ປະທານປະເທດ ແຫ່ງ ສສ ຫວຽດນາມ ພ້ອມແຂກຜູ້ມີກຽດລະດັບສູງຂອງທັງສອງປະເທດເຂົ້າຮ່ວມ.
ໂດຍສາຍການບິນຫວຽດເຈັດ ຈະຮ່ວມມືກັບກົມການບິນພົນລະເຮືອນຂອງ ສປປ ລາວ ເພື່ອຈັດຕັ້ງປະຕິບັດໂຄງການທີ່ກ່ຽວຂ້ອງກັບການບິນ ແລະ ຂະຫຍາຍການເຄື່ອນໄຫວການຂົນສົ່ງທາງອາກາດໃນລາວ ເຊິ່ງຄາດວ່າຈະສ້າງວຽກເຮັດງານທຳໃຫ້ບຸກຄະລາກອນໃນຂະແໜງການບິນໄດ້ເຖິງ 2,500 ຄົນ, ສາຍການບິນຍັງມີແຜນຈະສ້າງຕັ້ງສູນເຝິກອົບຮົມ ແລະ ພັດທະນາໃນປະເທດລາວ ຮ່ວມກັບ ສະຖາບັນເຝິກອົບຮົມການບິນຫວຽດເຈັດເພື່ອຕິດຕາມກວດກາການເຝິກອົບຮົມພະນັກງານໃໝ່ໃນລະດັບສາກົນ.
ຂະນະທີ່ ກົມການບິນພົນລະເຮືອນລາວຈະໃຫ້ການສະໜັບສະໜູນດ້ານບໍລິຫານ, ກົດໝາຍ ແລະ ສິ່ງອຳນວຍຄວາມສະດວກ ຕະຫຼອດຈົນເຖິງການປະສານງານກັບພາກສ່ວນຕ່າງໆ ເພື່ອອໍານວຍຄວາມສະດວກໃນການຈັດຕັ້ງປະຕິບັດໂຄງການ.
ການເຄື່ອນໄຫວດັ່ງກ່າວ ຈະນຳສະເໜີທາງເລືອກຖ້ຽວບິນທີ່ມີລາຄາປະຢັດ ແລະ ການບໍລິການທີ່ມີຄຸນະພາບໃຫ້ແກ່ນັກທ່ອງທ່ຽວລາວ ແລະ ຕ່າງປະເທດທີ່ເຂົ້າມາທ່ຽວຊົມ. ການຂະຫຍາຍຕົວທຸລະກິດຂອງສາຍການບິນມາປະເທດລາວໃນຕົ້ນປີນີ້ ມີຖ້ຽວບິນເຊື່ອມຕໍ່ນະຄອນຫຼວງວຽງຈັນ ຫາ ນະຄອນໂຮ່ມິນ ດ້ວຍສີ່ຖ້ຽວບິນໄປກັບຕໍ່ອາທິດໃນວັນຈັນ, ວັນພຸດ, ວັນສຸກ ແລະ ວັນອາທິດ ດ້ວຍເວລາໃນການບິນພຽງ 1 ຊົ່ວໂມງ 45 ນາທີ.
ໃນປີ 2023, ສາຍການບິນຫວຽດເຈັດໄດ້ເປີດສູນເຝິກອົບຮົມເຮືອບິນລະດັບພາກພື້ນ ໂດຍມີການຮ່ວມມືກັບສາຍການບິນລາວແອລາຍ, ພ້ອມທັງໄດ້ເປີດເສັ້ນທາງບິນທຳອິດລະຫວ່າງລາວ ແລະ ຫວຽດນາມ ເຊິ່ງເຊື່ອມຕໍ່ລະຫວ່າງນະຄອນຫຼວງວຽງຈັນ ແລະ ນະຄອນໂຮ່ຈີມິນ ເຊິ່ງເປັນທາງເລືອກໃຫ້ນັກທ່ອງທ່ຽວໄດ້ເດີນທາງທີ່ສະດວກ.
ປັດຈຸບັນ ປະເທດຫວຽດນາມ ແມ່ນໜຶ່ງໃນບັນດານັກລົງທຶນ ແລະ ຄູ່ຮ່ວມມືການຄ້າອັນດັບຕົ້ນຂອງ ສປປ ລາວ ທີ່ມີ 255 ໂຄງການລົງທຶນ ລວມມູນຄ່າທັງໝົດ 5,5 ຕື້ໂດລາ. ໂຄງການດັ່ງກ່າວໄດ້ສຸມໃສ່ອຸດສາຫະກໍາການຂົນສົ່ງ, ການທ່ອງທ່ຽວ, ວິທະຍາສາດເຕັກໂນໂລຊີ ແລະ ອື່ນໆ ເຊິ່ງເປັນການສົ່ງເສີມການແລກປ່ຽນການຄ້າ ການພັດທະນາແບບຍືນຍົງ ແລະ ການແບ່ງປັນຄວາມຈະເລີນຮຸ່ງເຮືອງຂອງ ສປປ ລາວ, ສສ ຫວຽດນາມ ແລະ ພາກພື້ນ.
https://www.facebook.com/photo?fbid=1026408565839266&set=a.563325785480882
ຕິດຕາມຂ່າວທັງໝົດຈາກ LaoX: https://laox.la/all-posts/
