ສັນຍາຄູ່ຮ່ວມມືເສດຖະກິດຮອບດ້ານພາກພື້ນ (RCEP) ໄດ້ກາຍເປັນແຮງໜຸນສໍາຄັນ ຊຸກຍູ້ການຄ້າ ໄທ-ຈີນ ໂດຍສະເພາະໃນຂະແໜງການກະສິກຳ ເຊັ່ນໝາກໄມ້ເຂດຮ້ອນ ຂອງໄທທີ່ກຳລັງໄດ້ຮັບຄວາມນິຍົມ ແລະ ຂະຫຍາຍຕົວຢ່າງໄວວາໃນຕະຫຼາດຂອງຈີນ.
ໂດຍ RCEP ໄດ້ມີຜົນບັງຄັບໃຊ້ໃນວັນທີ 1 ມັງກອນ 2022, ລວມມີ 15 ປະເທດອາຊີ ປາຊີຟິກ, ໃນນັ້ນມີ 10 ປະເທດສະມາຊິກອາຊຽນ ແລະ 5 ຄູ່ຮ່ວມມືການຄ້າຄື: ຈີນ, ຍີ່ປຸ່ນ, ສ.ເກົາຫຼີ, ອອສເຕຣເລຍ ແລະ ນິວຊີແລນ.
ໂດຍອີງຕາມການລາຍງານຂອງ ສຳນັກຂ່າວ Xinhua ຈາກຈີນ, ໃນໄລຍະ 2 ປີທີ່ຜ່ານມາ ອຸດສາຫະກຳຫຼາຍແຫ່ງຂອງໄທໃນຂົງເຂດກະສິກຳ, ແຜ່ນແພ, ແລະ ລົດ ໄດ້ຮັບຜົນປະໂຫຍດຈາກ RCEP ຢ່າງຫຼວງຫຼາຍ. ການຕັດອັດຕາພາສີໄດ້ຊຸກຍູ້ການເຕີບໂຕທາງດ້ານການຄ້າ ແລະ ການລົງທຶນຂອງບັນດາປະເທດສະມາຊິກ RCEP. ເຊິ່ງໃນປີ 2022, ວົງເງິນການຄ້າຂອງໄທກັບບັນດາສະມາຊິກ RCEP ໄດ້ເພີ່ມຂຶ້ນ 7,11% ເມື່ອທຽບໃສ່ປີກາຍ ເປັນ 300 ຕື້ໂດລາ.
ທ່ານ Han Zhiqiang, ເອກອັກຄະລັດຖະທູດຈີນປະຈຳໄທ ໃຫ້ຮູ້ວ່າ: 10 ເດືອນຕົ້ນປີ 2023, ການຄ້າສອງຝ່າຍລະຫວ່າງສອງປະເທດບັນລຸ 105,1 ຕື້ ໂດລາ. ຈີນໄດ້ສືບຕໍ່ເປັນຄູ່ຮ່ວມມືການຄ້າໃຫຍ່ທີ່ສຸດຂອງໄທເປັນປີທີ 11 ແລະ ເປັນຕະຫຼາດສົ່ງອອກກະສິກຳໃຫຍ່ທີ່ສຸດຂອງໄທ.
ທ່ານ Han Zhiqiang ກ່າວອີກວ່າ: “ໝາກຖົ່ວລຽນໄທໄດ້ຫັນຈາກໝາກໄມ້ທີ່ມີຊື່ສຽງໄປເປັນຜະລິດຕະພັນທີ່ມີຊື່ສຽງໃນຕະຫຼາດຈີນ. ຜູ້ບໍລິໂພກຈີນຈຳນວນຫຼາຍແມ່ນນິຍົມໝາກໄມ້ທີ່ມາຈາກໄທ”
ທ່ານ Mo Jiaming ຜູ້ຂາຍໝາກໄມ້ໃນເມືອງ ນານໜິງ ປະເທດຈີນ ກ່າວວ່າ: “ໃນຖານະເປັນຜູ້ນໍາເຂົ້າໝາກໄມ້, ຂໍ້ຕົກລົງ RCEP ໄດ້ນໍາເອົາຜົນປະໂຫຍດທີ່ແທ້ຈິງມາໃຫ້ຂ້ອຍ. ຄວາມນິຍົມຂອງໝາກພ້າວຂອງໄທໃນປະເທດຈີນທີ່ເພີ່ມຂຶ້ນແມ່ນເຮັດໃຫ້ຂ້ອຍມີໂອກາດທາງທຸລະກິດຫຼາຍຂຶ້ນ.”
ນອກນີ້ ຍັງມີຂໍ້ໄດ້ປຽບຈາກ ຂໍ້ລິເລີ່ມໜຶ່ງແລວທາງໜຶ່ງເສັ້ນທາງ (BRI) ທີ່ໄດ້ປ່ຽນຮູບແບບການຄ້າ ແລະ ການຂົນສົ່ງໃຫ້ມີຄວາມຫຼາກຫຼາຍ ແລະ ວ່ອງໄວຫຼາຍຂຶ້ນ ທີ່ເຮັດໃຫ້ສິນຄ້າໄທໄດ້ເຂົ້າຕະຫຼາດຈີນຫຼາຍຂຶ້ນດ້ວຍລາຄາທີ່ເໝາະສົມຫຼາຍຂຶ້ນ.
ການຂົນສົ່ງໝາກຖົ່ວລຽນສົດຈາກໄທໄປຍັງເເມືອງຈົງຊິງພາກຕາເວັນຕົກສຽງໃຕ້ຂອງຈີນຜ່ານ ທາງລົດໄຟລາວ-ຈີນແມ່ນໃຊ້ເວລາພຽງ 4 ມື້. ເຊິ່ງນີ້ເປັນການປ່ຽນແປງຄັ້ງໃຫຍ່ ເມື່ອທຽບໃສ່ເສັ້ນທາງບົກ-ທະເລທີ່ຜ່ານມາ, ທີ່ຕ້ອງໃຊ້ເວລາ 8 ຫາ 10 ມື້ ໃນການຂົນສົ່ງ.
ສັນຍາ RCEP ຍັງໄດ້ເສີມຂະຫຍາຍຕ່ອງໂສ້ອຸດສາຫະກຳຂອງຈີນແລະໄທ, ນຳມາເຊິ່ງກາລະໂອກາດໃໝ່ໃຫ້ແກ່ວິສາຫະກິດ.
ໃນ 9 ເດືອນຕົ້ນປີ 2023, ວິສາຫະກິດຈີນໄດ້ສະໝັກເຂົ້າຮ່ວມ 264 ໂຄງການລົງທຶນຢູ່ໄທ, ເພີ່ມຂຶ້ນ 196,6% ເມື່ອທຽບໃສ່ໄລຍະດຽວກັນຂອງປີ 2023, ດ້ວຍມູນຄ່າການລົງທຶນ 97,46 ຕື້ບາດ (ປະມານ 2,8 ຕື້ໂດລາສະຫະລັດ), ເພີ່ມຂຶ້ນ 116,5% ເມື່ອທຽບໃສ່ປີກາຍ.
https://english.news.cn/20240116/bc934a34f298460bb5c451bf49401eed/c.html
ຕິດຕາມຂ່າວທັງໝົດຈາກ LaoX: https://laox.la/all-posts/