ໃນຍຸກສະໄໝທີ່ຜູ້ຄົນຕ່າງກໍມີຄວາມຫຍຸ້ງຍາກ ວຸ້ນວາຍໃນຊີວິດປະຈຳວັນ, ການມີມິດຕະພາບທີ່ດີປຽບສະເໝືອນ oasis ທ່າມກາງທະເລຊາຍ. ການມີໝູ່ທີ່ດີ ບວກກັບຄວາມສຳພັນທີ່ດີກັບໝູ່ເພື່ອນຈະຊ່ວຍຢຽວຍາຈິດໃຈ, ເຕີມເຕັມຊີວິດ ແລະ ສ້າງຄວາມສຸກໃຫ້ກັບຕົວເຮົາ.
ໃນມື້ນີ້, ເຮົາຈະມາຍົກໃຫ້ເຫັນເຖິງ ‘7 Friends Theory’ ທິດສະດີທີ່ອະທິບາຍກ່ຽວກັບໝູ່ 7 ປະເພດທີ່ເຮົາຄວນມີໃນຊີວິດ, ເຊິ່ງຊາວ TikToker ຕ່າງປະເທດຕ່າງກໍຍົກປະເດັນນີ້ມາເວົ້າເຖິງຢ່າງກວ້າງຂວາງ, ແລ້ວຈະມີໝູ່ປະເພດໃດແດ່ນັ້ນ? ພວກເຮົາໄປເບິ່ງກັນເລີຍ.
ໝູ່ 7 ປະເພດທີ່ຈະເຕີມເຕັມພະລັງບວກໃຫ້ກັບເຮົາ
- ໝູ່ໃນໄວເດັກ: ເປັນໝູ່ທີ່ຮູ້ຈັກກັນຕັ້ງແຕ່ຍັງນ້ອຍ, ເຕີບໃຫຍ່ ແລະ ຮຽນມານຳກັນ ມັກຈະຮູ້ເຖິງການປ່ຽນແປງຂອງເຮົາຫຼາຍທີ່ສຸດ. ເພາະສະນັ້ນ, ຈຶ່ງເປັນອີກຄົນທີ່ອາດຈະຮູ້ຈັກເຮົາຫຼາຍທີ່ສຸດ ແລະ ພື້ນທີ່ແຫ່ງຄວາມສະບາຍໃຈໃຫ້ເຮົາໄດ້.
- ໝູ່ທີ່ເຮັດໃຫ້ເຮົາຫົວໄດ້ຢູ່ສະເໝີ: ໝູ່ຄົນນີ້ເປັນຄົນທີ່ພ້ອມທີ່ຈະມີເວລາດີໆກັບເຮົາຢູ່ສະເໝີ, ຢາກໃຫ້ເຮົາມີຄວາມສຸກ ແລະ ແມ່ນຄົນທີ່ເຮົາມັກຈະທັກຫາເມື່ອມີເລື່ອງດີໆເກີດຂຶ້ນ ຫຼື ຕ້ອງການສຽງຫົວເພື່ອປອບໂຍນຫົວໃຈ?
- ໝູ່ທີ່ຍັງຄືເກົ່າບໍ່ວ່າຈະດົນປານໃດ: ມັກຈະເປັນໝູ່ທີ່ຮູ້ພຽງແນມຕາກໍເຂົ້າໃຈກັນ. ເຖິງແມ່ນວ່າການໃຊ້ຊີວິດຈະບໍ່ຄືກັນ ຫຼື ຕໍ່ໃຫ້ບໍ່ພົບກັນດົນປານໃດ ແຕ່ທຸກຄັ້ງທີ່ໄດ້ລົມກັນ, ກໍຍັງສະໜິດສະໜົມກັນຄືເກົ່າ ຄ້າຍຄືກັບວ່າເຫັນໜ້າກັນທຸກມື້.
- ໝູ່ທີ່ເກັບຄວາມລັບທຸກຢ່າງຂອງເຮົາ: ໝູ່ຄົນນີ້ແມ່ນຜູ້ທີ່ເຮົາໃຫ້ໃຈ ແລະ ໄວ້ໃຈ, ເປັນພື້ນທີ່ທີ່ປອດໄພທີ່ສາມາດຍອມຮັບທຸກເລື່ອງລາວໃນຊີວິດ ແລະ ຈະບໍ່ມີວັນທໍລະຍົດເຮົາ.
- ເພື່ອນທີ່ປຽບສະເໝືອນອ້າຍນ້ອງກັນ: ເປັນເພື່ອນທີ່ໃກ້ຊິດກັບສະມາຊິກໃນຄອບຄົວຂອງເຮົາ. ຈົນກາຍມາເປັນສະມາຊິກຄົນໜຶ່ງໃນເຮືອນ
- ໝູ່ທີ່ປ່ອຍໃຫ້ເຮົາເວົ້າໄປເລື້ອຍ: ໝູ່ຄົນນີ້ອາດເປັນມິດຕະພາບທີ່ຍາກທີ່ຈະພັນລະນາ. ເພາະເປັນຜູ້ປ່ອຍໃຫ້ເຮົາລະບາຍບັນຫາໄປເລື້ອຍໆ ເຖິງແມ່ນວ່າຈະບໍ່ຢາກຮູ້ເລື່ອງເຮົາກໍຕາມ. ດັ່ງນັ້ນ, ເຮົາຈຶ່ງຕ້ອງແຄຄວາມຮູ້ສຶກຂອງເຂົາເປັນພິເສດ. ເພາະບາງຄັ້ງເລື່ອງຂອງເຮົາທີ່ລະບາຍອອກໄປອາດຈະກາຍເປັນພາລະທາງໃຈຂອງເຂົາກໍໄດ້.
- ໝູ່ທີ່ຖືກລິຂິດມາໄວ້ແລ້ວວ່າຕ້ອງມີໃນຊີວິດ: ໝູ່ຄົນນີ້ແມ່ນຄົນທີ່ເຮົາລົມນຳທຸກມື້, ບອກທຸກສິ່ງທີ່ສໍາຄັນໃນຊີວິດ, ເປັນຄົນທີ່ບໍ່ສາມາດຈິນຕະນາການໄດ້ວ່າເປັນຫຍັງພວກເຮົາຈຶ່ງຈະບໍ່ເປັນໝູ່ກັນ ຫຼື ຂາດກັນບໍ່ໄດ້ນັ້ນເອງ.
ມິດຕະພາບທີ່ຍືນຍົງ
ທິດສະດີນີ້ຊີ້ໃຫ້ເຫັນວ່າ ໝູ່ທີ່ດີບໍ່ຈໍາເປັນຕ້ອງມີທັງໝົດ 7 ປະເພດ, ແຕ່ສິ່ງທີ່ສໍາຄັນແມ່ນຄຸນະພາບຂອງມິດຕະພາບທີ່ພວກເຮົາມີຕໍ່ກັນ.
- ມິດຕະພາບທີ່ດີຄວນເປັນທີ່ເພິ່ງພາອາໄສເຊິ່ງກັນແລະກັນໄດ້: ໃຫ້ ແລະ ໄດ້ຮັບເທົ່າທຽມກັນ, ສະຫນັບສະໜູນ ແລະ ຢູ່ຄຽງຂ້າງກັນຢູ່ສະເໝີ, ມີຄວາມຊື່ສັດ ແລະ ຈິງໃຈຕໍ່ກັນ
- ການສື່ສານປະສິດທິພາບ: ເປີດໃຈລົມກັນ, ຮັບຟັງຢ່າງຕັ້ງໃຈ, ເຂົ້າໃຈ ແລະ ເຫັນອົກເຫັນໃຈເຊິ່ງກັນແລະກັນ
- ຄວາມເຄົາລົບເຊິ່ງກັນແລະກັນ: ຍອມຮັບຄວາມແຕກຕ່າງ, ໃຫ້ກຽດ ແລະ ໃຫ້ອະໄພເມື່ອມີຄວາມຜິດພາດເກີດຂຶ້ນ.
ການມີມິດຕະພາບທີ່ດີ ປຽບສະເໝືອນການມີຊັບສົມບັດອັນລ້ຳຄ່າ. ຊ່ວຍເຮັດໃຫ້ຊີວິດມີຄວາມສຸກ, ສົມບູນແບບ ແລະ ເຕີມເຕັມກັນແລະກັນ.
ລອງສຳຫຼວດຕົວເອງເບິ່ງ. ເຮົາມີໝູ່ແບບໃດ? ແລະ ໝູ່ປະເພດໃດທີ່ຍັງຂາດ?
ຢ່າລໍຖ້າ, ອອກໄປສ້າງມິດຕະພາບທີ່ດີກັບຄົນອ້ອມຂ້າງ, ເພາະມິດຕະພາບທີ່ດີ ຈະນໍາພາເຮົາໄປສູ່ຄວາມສຸກທີ່ແທ້ຈິງ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
