ຮຸ້ນຂອງບໍລິສັດ Taiwan Semiconductor Manufacturing Co. (TSMC) ໄດ້ເພີ່ມຂຶ້ນຫຼາຍເຖິງ 3.2% ໃນວັນຈັນທີ່ຜ່ານມາ, ເນື່ອງຈາກຝ່າຍບໍລິຫານຂອງປະທານາທິບໍດີ Joe Biden ໄດ້ອະນຸມັດເງິນຊ່ວຍເຫຼືອ ແລະ ເງິນກູ້ເກືອບ 12 ຕື້ໂດລາສະຫະລັດໃຫ້ແກ່ບັນດາບໍລິສັດ semiconductor ອັນດັບຕົ້ນໆຂອງໂລກ ເພື່ອຊຸກຍູ້ການດຳເນີນງານດ້ານການຜະລິດໃນສະຫະລັດ.
ໂດຍໃນຂໍ້ຕົກລົງດັ່ງກ່າວໄດ້ເຮັດໃຫ້ບໍລິສັດ TSMC ຜູ້ຜະລິດຊິບອັນດັບ 1 ຂອງໄຕ້ຫວັນໄດ້ຮັບເງິນສະໜັບສະໜູນຫຼາຍເຖິງ 6.6 ຕື້ໂດລາສະຫະລັດ ແລະ ເງິນທຶນໂດຍກົງຈາກຝ່າຍບໍລິຫານປະມານ 5 ຕື້ໂດລາສະຫະລັດ ເພື່ອສະໜັບສະໜູນການສ້າງໂຮງງານໃນລັດ Arizona. ການເຄື່ອນໄຫວໃນຄັ້ງນີ້ຖືເປັນສ່ວນໜຶ່ງໃນແຜນການຂອງປະທານາທິບໍດີ Joe Biden ເພື່ອຊຸກຍູ້ການຜະລິດເຕັກໂນໂລຊີສຳຄັນພາຍໃນປະເທດ.
ພາຍໃຕ້ຂໍ້ຕົກລົງເບື້ອງຕົ້ນທີ່ສະຫະລັດ ປະກາດໃນວັນຈັນ, TSMC ຈະສ້າງໂຮງງານທີສາມໃນ Phoenix ເພິ່ມເຕີມ, ນອກເໜືອຈາກສອງໂຮງງານຢູ່ໃນລັດດຽວກັນ. ເຊິ່ງຄາດວ່າຈະເລິ່ມການຜະລິດໃນຕົ້ນປີ 2025 ແລະ 2028. ໂດຍລວມແລ້ວ, ການສະໜັບສະໜູນໃນທຸກໆຄັ້ງທີ່ຜ່ານມາ ລວມເຖິງໃນຄັ້ງນີ້ແມ່ນໃຊ້ເງິນລົງທຶນລວມຫຼາຍກວ່າ 65 ຕື້ໂດລາສະຫະລັດໃນໂຮງງານທັງ 3 ແຫ່ງຂອງ TSMC.
ໃນປັດຈຸບັນ TSMC ໄດ້ຖືຄອງ 90% ຂອງຊິບທີ່ທັນສະໄໝທີ່ສຸດໃນໂລກ. ໂດຍ Mark Liu ປະທານ TSMC ກ່າວວ່າການສ້າງຕັ້ງໂຮງງານຢູ່ໃນສະຫະລັດຈະເຮັດໃຫ້ລູກຄ້າສາມາດເຂົ້າເຖິງຊິບພາຍໃນປະເທດທີ່ສາມາດໃຊ້ໄດ້ກັບສະມາດໂຟນຈົນໄປເຖິງດາວທຽມ, ລວມທັງລະບົບປັນຍາປະດິດອີກດ້ວຍ.
ໂຮງງານຜະລິດຊິບ 3 ແຫ່ງນີ້ ຄາດວ່າຈະສ້າງວຽກເຮັດງານທຳດ້ານເຕັກໂນໂລຊີ ປະມານ 6,000 ຕໍາແໜ່ງ ແລະ ວຽກງານທາງອ້ອມຫຼາຍກວ່າ 20,000 ຕໍາແໜ່ງເຊັ່ນ: ວຽກງານກໍ່ສ້າງ, ການຮັກສາຄວາມປອດໄພ ແລະ supply chain, ລວມທັງດຶງດູດ semiconductor suppliers 14 ແຫ່ງໃຫ້ເຂົ້າມາລົງທຶນໃນລັດ.
ການທີ່ສະຫະລັດສາມາດດຶງດູດ TSMC ເຂົ້າມາລົງທຶນໃນປະເທດນັ້ນຖືວ່າເປັນຜົນດີສໍາລັບທັງສອງຝ່າຍ. ເນື່ອງຈາກລັດຖະບານສະຫະລັດ ໄດ້ເນັ້ນໜັກເຖິງຄວາມຈໍາເປັນທີ່ຈະນໍາເອົາການຜະລິດຊິບມາໃຊ້ໃນປະເທດຫຼາຍຂຶ້ນ. ເພື່ອຫຼຸດຜ່ອນການອີງໃສ່ການຜະລິດຊິບຈາກປະເທດອື່ນໆ ຫຼັງຈາກທີ່ປະເຊີນກັບການຂາດແຄນຊິບໃນໄລຍະການລະບາດຂອງ COVID-19, ເຮັດໃຫ້ລາຄາເພີ່ມສູງຂຶ້ນ.
ພ້ອມກັນນັ້ນ, ໄຕ້ຫວັນຍັງຢູ່ໃນຕໍ່າແໜ່ງທີ່ອ່ອນແອເຊັ່ນກັນ ເນື່ອງຈາກຜູ້ຊ່ຽວຊານດ້ານ supply chain ແລະ ເຈົ້າໜ້າທີ່ສະຫະລັດກັງວົນວ່າ ຄວາມເຄັ່ງຕຶງດ້ານການຄ້າລະຫວ່າງສະຫະລັດ ແລະຈີນສາມາດນໍາໄປສູ່ການຮຸກຮານທາງທະຫານຕໍ່ໄຕ້ຫວັນ. ເຊິ່ງມັນອາດຈະສົ່ງຜົນກະທົບຕໍ່ອຸດສາຫະກໍາການຜະລິດຊິບທີ່ສໍາຄັນຂອງປະເທດ. ນອກຈາກນັ້ນ, ໄຕ້ຫວັນກໍກຳລັງປະສົບກັບແຜ່ນດິນໄຫວຂະໜາດໃຫຍ່ ເຊິ່ງນີ້ຊີ້ໃຫ້ເຫັນເຖິງຄວາມອ່ອນແອຂອງອຸດສາຫະກໍາຕໍ່ກັບໄພພິບັດທໍາມະຊາດ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
