ຈີນໄດ້ອະນຸຍາດໃຫ້ລາວສົ່ງງົວແລະຄວາຍໄປຈີນອີກເທື່ອໜຶ່ງ, ຫຼັງຈາກຢຸດການຄ້າຍ້ອນການແຜ່ລະບາດຂອງພະຍາດຜິວໜັງເປັນກ້ອນ (lumpy skin disease) ຂອງສັດລ້ຽງຂອງລາວ.
ພິທີປະກາດການຟື້ນຟູການຄ້າໄດ້ຈັດຂຶ້ນຢູ່ເຂດຊາຍແດນລາວ-ຈີນ ເມືອງສິງ ແຂວງຫຼວງນ້ຳທາ ໂດຍມີການເຂົ້າຮ່ວມຂອງເຈົ້າໜ້າທີ່ລັດຖະບານ ແລະ ຜູ້ຕາງໜ້ານັກທຸລະກິດລາວ ແລະ ຈີນ.
ພາຍຫຼັງການລະບາດຂອງພະຍາດຜິວໜັງໃນລາວ ໃນປີກາຍນີ້, ກົມພາສີຂອງຈີນ ໄດ້ຫ້າມການນຳເຂົ້າງົວ-ຄວາຍຈາກລາວ ແຕ່ເມື່ອບໍ່ດົນມານີ້ໄດ້ຕົກລົງໃຫ້ສືບຕໍ່ນຳເຂົ້າຄືນໃໝ່ ພາຍຫຼັງທີ່ທາງການຈີນ ແລະ ລາວ ກວດພົບວ່າບໍ່ມີພະຍາດດັ່ງກ່າວແລ້ວ.
ໂດຍການສົ່ງອອກງົວ-ຄວາຍ ໄປ ສປຈີນ ຖືເປັນນະໂຍບາຍສົ່ງເສີມຊາວກະສິກອນລາວ ໃນການສົ່ງອອກສັດໃຫຍ່ໄປຈີນ ຂອງ 2 ພັກ 2 ລັດ ລາວ-ຈີນ. ເຊິ່ງພາຍໃຕ້ຂໍ້ຕົກລົງທີ່ໄດ້ລົງນາມລະຫວ່າງລັດຖະບານຂອງສອງປະເທດ, ລາວໄດ້ຮັບໂຄຕ້າສົ່ງອອກງົວ 500.000 ໂຕຕໍ່ປີ. ເຊິ່ງພາຍໃນພິທີຟື້ນຄືນການສົ່ງອອກນີ້ ໄດ້ມີການຂົນສົ່ງງົວ-ຄວາຍ 160 ໂຕຂ້າມຊາຍແດນໄປຈີນ.
ທ່ານ ບຸນເຖິງ ດວງສະຫວັນ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າກ່າວໃນພິທີວ່າ: ລັດຖະບານຈີນໄດ້ລິເລີ່ມການສົ່ງອອກສັດຂອງລາວເພື່ອແນໃສ່ສ້າງວຽກເຮັດງານທຳ, ສ້າງລາຍຮັບໃຫ້ແກ່ປະຊາຊົນລາວ, ແລະ ຫຼຸດຜ່ອນຄວາມທຸກຍາກຢູ່ບັນດາແຂວງຊາຍແດນຂອງສອງປະເທດ.
ທ່ານ ບຸນເຖິງ ຍັງໄດ້ສະເໜີໃຫ້ທາງການລາວ ແລະ ຈີນ ໃຫ້ຄວາມສຳຄັນຕໍ່ໂຄງການດັ່ງກ່າວ ແລະ ຖ້າຫາກມີບັນຫາໃດໆ ເກີດຂຶ້ນກໍຄວນປຶກສາຫາລືກັນໂດຍໄວ ເພື່ອບໍ່ໃຫ້ເກີດຄວາມຫຼ້າຊ້າ ຫຼື ສົ່ງຜົນກະທົບທາງລົບຕໍ່ຜູ້ດຳເນີນທຸລະກິດທີ່ກ່ຽວຂ້ອງ.
ພ້ອມນີ້, ທ່ານຍັງໄດ້ແນະນຳໃຫ້ອົງການທີ່ຮັບຜິດຊອບຂອງລາວ ແລະ ສປ ຈີນ ກວດກາໂຄງການສົ່ງອອກສັດລ້ຽງເປັນປະຈຳ ແລະ ລາຍງານຜົນການຄົ້ນພົບໃຫ້ຂັ້ນເທິງເປັນປະຈຳ.
ທ່ານ ສີທອງ ພິພັກຂະວົງ, ຮອງຫົວໜ້າກົມລ້ຽງ ສັດ ແລະ ການປະມົງ ໄດ້ລາຍງານໃຫ້ຮູ້ກ່ຽວກັບແຜນການ ແລະ ມາດຕະການສົ່ງເສີມການລ້ຽງງົວ ເພື່ອສົ່ງອອກໄປ ສປ ຈີນ ປະກອບມີ 4 ແຜນການໃຫຍ່ ຄາດວ່າອາດນໍາໃຊ້ທຶນທັງໝົດ 9.226 ຕື້ກີບ ຫຼື ເກືອບ 1 ຕື້ໂດລາສະຫະລັດ.
ປັດຈຸບັນ ທົ່ວປະເທດມີຟາມງົວທັງໝົດ 402 ຟາມ, ມີງົວ 50.000 ກວ່າໂຕ, ໃນນີ້ ພາກເໜືອ ມີ 163 ຟາມ, ພາກກາງ 149 ຟາມ ແລະ ພາກໃຕ້ 90 ຟາມ. ຢ່າງໃດກໍຕາມ ເຖີງວ່າລັດຖະບານ ໄດ້ເປີດໂອກາດໃຫ້ລາວສົ່ງອອກງົວໄປ ສປ ຈີນ ກໍຕາມ ແຕ່ໃນສະພາບປັດຈຸບັນ ລາວເຮົາບໍ່ມີງົວພຽງພໍສະໜອງຕະຫຼາດຂອງຈີນນັບທັງປະລິມານ ແລະ ຄຸນະພາບ.
ຕິດຕາມຂ່າວທັງໝົດຈາກ LaoX: https://laox.la/all-posts/
