ຍີ່ປຸ່ນໄດ້ມີການພັດທະນາຂຶ້ນໄປອີກຂັ້ນ ສຳລັບການອະນຸຍາດໃຫ້ບໍລິສັດຮ່ວມລົງທຶນ ແລະ ກອງທຶນລວມອື່ນໆສາມາດຖືຄອງສິນຊັບ crypto ໄດ້ໂດຍກົງ. ໂດຍ Fumio Kishida ຝ່າຍບໍລິຫານຂອງນາຍົກລັດຖະມົນຕີ ໄດ້ຕົກລົງທີ່ຈະຍື່ນຮ່າງກົດໝາຍສະບັບປັບປຸງເພື່ອດຳເນີນການປ່ຽນແປງນີ້.
ອີງຕາມເນື້ອຫາທີ່ໄດ້ປະກາດໃນເວັບໄຊ ກະຊວງເສດຖະກິດ, ການຄ້າ ແລະ ອຸດສາຫະກຳຍີ່ປຸ່ນໃນວັນທີ 16 ກຸມພາທີ່ຜ່ານມາ, ໂດຍມີເນື້ອໃນລະບຸວ່າ ຮ່າງກົດໝາຍສະບັບປັບປຸງໃໝ່ ທີ່ໄດ້ຮັບການອະນຸມັດຈາກຝ່າຍບໍລິຫານ ພາຍໃຕ້ການນໍາພາຂອງນາຍົກລັດຖະມົນຕີ Fumio Kishida ນັ້ນໄດ້ມີຂໍ້ຄວາມທີ່ສໍາຄັນໃນການເປີດໄຟຂຽວໃຫ້ກັບກອງທຶນລວມໃຫ້ສາມາດລົງທຶນໃນ cryptocurrencies ໄດ້ໂດຍກົງ.
ເຊິ່ງໃນຮ່າງກົດໝາຍສະບັບປັບປຸງໃໝ່ນີ້ ຈະມຸ່ງເນັ້ນໄປທີ່ການແກ້ໄຂກົດໝາຍເພື່ອເພີ່ມທະວີຄວາມສາມາດໃນການແຂ່ງຂັນທາງອຸດສາຫະກຳຂອງຍີ່ປຸ່ນ. ໂດຍມີການບັນຍັດໃຫ້ cryptocurrencies ເປັັັນສິນຊັບທີ່ມີສິດ ເຊິ່ງສາມາດໄດ້ຮັບ ແລະ ຖືຄອງເປັນຮຸ້ນສ່ວນຈຳກັດໃນດ້ານການລົງທຶນ, ເຊິ່ງມັກຈະຖືກໃຊ້ໂດຍບໍລິສັດກອງທຶນເພື່ອຮັບປະກັນກອງທຶນສໍາລັບກິດຈະກໍາການລົງທຶນຂອງພວກເຂົາ.
ທັງນີ້ ຍັງໄດ້ມີການລາຍງານອີກວ່າ ແຜນການເພື່ອຊຸກຍູ້ເສດຖະກິດຂອງຂອງນາຍົກ Kishida ຈະສຸມໃສ່ການເຕີບໂຕທາງທຸລະກິດ ແລະ ອົງການຈັດຕັ້ງທີ່ກ່ຽວຂ້ອງກັບ Web3. ເຊິ່ງຖ້າຫາກປຽບທຽບເບິ່ງ ກໍຈະເຫັນໄດ້ວ່າຍີ່ປຸ່ນມີຄວາມເຂັ້ມງວດຫຼາຍຂຶ້ນໃນດ້ານສິນຊັບດິຈິຕອນ.
ຢ່າງໃດກໍຕາມ, ເມື່ອບໍ່ດົນມານີ້ ຍີ່ປຸ່ນໄດ້ຜ່ອນຄາຍຢ່າງເຫັນໄດ້ຊັດເຈນ ບໍ່ວ່າຈະເປັນເລື່ອງຂອງກົດລະບຽບ, ບັນຊີລາຍຊື່ຂອງຫຼຽນ ແລະ ພາສີ. ເຊິ່ງໃນການປະຊຸມລັດຖະບານຄັ້ງຕໍ່ໄປ, crypto ຈະຖືກຍົກມາເປັນຫົວຂໍ້ໜຶ່ງທີ່ຈະໄດ້ຮັບການປຶກສາຫາລື.
ຖ້າຫາກກົດໝາຍດັ່ງກ່າວຜ່ານການພິຈາລະນາຈາກທັງຝ່າຍບໍລິຫານ ແລະ ສະພາ, ກໍໝາຍຄວາມວ່າຊັບສິນດິຈິຕອນຈະຖືກນໍາໄປໃຊ້ຢ່າງກວ້າງຂວາງໃນຊຸມຊົນການລົງທຶນຂອງຍີ່ປຸ່ນ ທັງໃນດ້ານຂອງນັກລົງທຶນຂະໜາດໃຫຍ່ ແລະ ຂະໜາດນ້ອຍ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
