Apple ໄດ້ປະກາດຍົກເລີກໂຄງການພັດທະນາລົດໄຟຟ້າທີ່ດຳເນີນງານມາດົນກວ່າ 10 ປີເພື່ອຫັນໄປສຸມໃສ່ການພັດທະນາປັນຍາປະດິດແທນ.
ສຳນັກງານຕ່າງປະເທດໄດ້ມີການລາຍງານວ່າ ທາງບໍລິສັດ Apple Inc., ຜູ້ຜະລິດສະມາດໂຟນຊັ້ນນໍາຂອງໂລກຈາກສະຫະລັດ ໄດ້ຕັດສິນໃຈຍົກເລີກແຜນການພັດທະນາການຜະລິດລົດໄຟຟ້າ (EV) ຂອງຕົນ ທີ່ໄດ້ດໍາເນີນງານມາເປັນເວລາອັນຍາວນານກວ່າ 10 ປີ. ສ້າງຄວາມປະຫຼາດໃຈກັບພະນັກງານເກືອບ 2,000 ທີ່ເຮັດວຽກກ່ຽວໃນໂຄງການ EV ດັ່ງກ່າວ.
Jeff Williams, ຫົວໜ້າຝ່າຍປະຕິບັດການ ແລະ Kevin Lynch, ຮອງປະທານຜູ້ຮັບຜິດຊອບໂຄງການ EV ໄດ້ກ່າວເຖິງການຍົກເລີກໂຄງການດັ່ງກ່າວໃນຖະແຫຼງການ ໃນວັນອັງຄານທີ່ຜ່ານມາ, ໂດຍທັງສອງໄດ້ບອກກ່າວກັບເຈົ້າໜ້າທີ່ວ່າໂຄງການ EV ຈະເລີ່ມທະຍອຍປິດຕົວລົງ ແລະ ພະນັກງານຫຼາຍຄົນໃນທີມພັດທະນາລົດ ຫຼື Special Projects Group (SPG) ຈະຖືກຍ້າຍໄປຢູ່ພະແນກປັນຍາປະດິດພາຍໃຕ້ການບໍລິຫານຂອງ John Giannandrea ເຊິ່ງມີໜ້າທີ່ໃນການພັດທະນາໂຄງການທີ່ກ່ຽວຂ້ອງກັບເຕັກໂນໂລຊີ Generative AI ທີ່ເລິ່ມມີບົດບາດສໍາຄັນຕໍ່ບໍລິສັດຫຼາຍຂຶ້ນເລື້ອຍໆ.
ຢ່າງໃດກໍຕາມ, ບົດລາຍງານກ່າວວ່າ ບໍ່ແມ່ນທຸກຄົນຈະສາມາດຍ້າຍໄປເຮັດວຽກຢູ່ໃນພະແນກ Generative AI ຄືກັບວິສະວະກອນຮາດແວ ແລະ ນັກອອກແບບຍານພາຫະນະຫຼາຍຮ້ອຍຄົນໄດ້. ເຊິ່ງນີ້ເຮັດໃຫ້ມີຄວາມເປັນໄປໄດ້ວ່າ Apple ຈະເລີກຈ້າງພະນັກງານຈຳນວນຫຼາຍ.
ການເຄື່ອນໄຫວດັ່ງກ່າວໄດ້ເຮັດໃຫ້ບັນດານັກລົງທຶນຕ່າງໆໂລ່ງໃຈຫຼາຍຂຶ້ນ, ສົ່ງຜົນໃຫ້ຮຸ້ນ Apple ໃນຕະຫຼາດຫຼັກຊັບນິວຢອກໃນມື້ວານນີ້ເພີ່ມຂຶ້ນປະມານ 1% ໂດຍປິດຕະຫຼາດຢູ່ທີ່ 182.63 ໂດລາສະຫະລັດຕໍ່ຮຸ້ນ.
ການຕັດສິນໃຈຂອງ Apple ທີ່ຈະສິ້ນສຸດໂຄງການພັດທະນາລົດໄຟຟ້າ “Project Titan” ຖືເປັນການສິ້ນສຸດຂອງຄວາມພະຍາຍາມທີ່ມີມູນຄ່າຫຼາຍຕື້ໂດລາ. ເຊິ່ງໄດ້ເລີ່ມຕົ້ນມາຕັ້ງແຕ່ປີ 2014, ໂດຍມີເປົ້າໝາຍເພື່ອສ້າງລົດໄຟຟ້າແບບອັດຕະໂນມັດຢ່າງເຕັມຮູບແບບ ທີ່ມີການຕົກແຕ່ງພາຍໃນຄ້າຍຄືລົດລີມູຊີນ ແລະ ລະບົບນຳທາງດ້ວຍ
ຢ່າງໃດກໍຕາມ, ໂຄງການດັ່ງກ່າວໄດ້ປະເຊີນກັບບັນຫາຫຼາຍຢ່າງຕັ້ງແຕ່ເລີ່ມຕົ້ນຄື:
- ມີການປ່ຽນແປງຜູ້ຮັບຜິດຊອບໂຄງການຫຼາຍຄັ້ງ
- ວຽກງານທີ່ຍັງບໍ່ທັນໄດ້ດໍາເນີນ
- ຄວາມກັງວົນຈາກນັກລົງທຶນ
- ຕະຫຼາດລົດ EV ທົ່ວໂລກມີການແຂ່ງຂັນສູງ.
- Apple ອາດຈະເຂົ້າຕະຫຼາດຊ້າເກີນໄປ.
ຜູ້ຊ່ຽວຊານກ່າວວ່າ Apple ຍັງຕ້ອງການເວລາຫຼາຍປີໃນການພັດທະນາລົດ ແລະ ເຕັກໂນໂລຊີທີ່ຊ່ວຍໃຫ້ລົດສາມາດຂັບເຄື່ອນໄດ້ແບບອັດຕະໂນມັດ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/