ປົກເວັບ 57

ຍຸກ AI ກຳລັງປ່ຽນໂລກ ເປັນຫຍັງອາຊີ-ປາຊີຟິກ ຈຶ່ງຕ້ອງເລັ່ງເຊື່ອມໂຍງໂຄງຂ່າຍໄຟຟ້າ?

ຄວາມຕ້ອງການໄຟຟ້າຈາກ AI ແລະ ສູນຂໍ້ມູນກຳລັງເພີ່ມຂຶ້ນ ຂະນະທີ່ການເຊື່ອມໂຍງໄຟຟ້າຂ້າມຊາຍແດນອາດເປັນທາງເລືອກໃໝ່ໃຫ້ແກ່ປະເທດໃນພາກພື້ນ.

ໃນກອງປະຊຸມສຸດຍອດຜູ້ບໍລິຫານທຸລະກິດ APEC CEO Summit 2026 ທີ່ນະຄອນເຊິນເຈີ້ນ ປະເທດຈີນ ໃນວັນທີ 17 ພະຈິກ 2026, ທ່ານ ສຸພະກິດ ເຈຍຣະວະນົນ (Soopakij Chearavanont), ປະທານກຸ່ມບໍລິສັດ ເຈຣິນໂພກພັນ (Charoen Pokphand Group) ຂອງໄທ, ໄດ້ຍົກຄຳຖາມສຳຄັນທີ່ອຸດສາຫະກຳປັນຍາປະດິດ (AI) ທີ່ກຳລັງຂະຫຍາຍຕົວຢ່າງໄວວາຕ້ອງປະເຊີນວ່າ: ຈະເຮັດແນວໃດໃຫ້ການສະໜອງໄຟຟ້າສາມາດຮອງຮັບຄວາມຕ້ອງການພະລັງງານສຳລັບການປະມວນຜົນຂໍ້ມູນທີ່ເພີ່ມຂຶ້ນຢ່າງຕໍ່ເນື່ອງ?

ທ່ານໄດ້ສະເໜີໃຫ້ມີການສຶກສາຄວາມເປັນໄປໄດ້ໃນການເຊື່ອມໂຍງລະບົບໄຟຟ້າລະຫວ່າງ ຈີນ, ລາວ ແລະ ໄທ ເພື່ອສະໜັບສະໜູນການພັດທະນາ AI ຂອງໄທ ແລະ ສ້າງຜົນປະໂຫຍດຮ່ວມກັນໃຫ້ທັງສາມປະເທດ.

ຂໍ້ສະເໜີດັ່ງກ່າວໄດ້ສະທ້ອນໃຫ້ເຫັນເຖິງຄວາມທ້າທາຍທີ່ກວ້າງຂວາງກວ່ານັ້ນ ຊຶ່ງບັນດາເສດຖະກິດໃນພາກພື້ນອາຊີ-ປາຊີຟິກ ກຳລັງປະເຊີນຢູ່.

ໃນຂະນະທີ່ຄວາມຕ້ອງການພະລັງການປະມວນຜົນຂໍ້ມູນເພີ່ມຂຶ້ນຢ່າງໄວວາ, ໂຄງລ່າງພື້ນຖານດ້ານໄຟຟ້າຈະສາມາດພັດທະນາໃຫ້ທັນກັບຄວາມຕ້ອງການໄດ້ແນວໃດ? ແລະ ເມື່ອແຫຼ່ງຊັບພະຍາກອນພະລັງງານ ແລະ ຄວາມຕ້ອງການໃຊ້ໄຟຟ້າກະຈາຍຢູ່ຄົນລະພື້ນທີ່, ການຮ່ວມມືລະດັບພາກພື້ນຈະຊ່ວຍເພີ່ມທາງເລືອກໃຫ້ແກ່ບັນດາເສດຖະກິດໄດ້ຫຼືບໍ່?

ໃນຍຸກ AI, ຄວາມສາມາດໃນການແຂ່ງຂັນຈະບໍ່ໄດ້ຂຶ້ນກັບພຽງແຕ່ຊິບປະມວນຜົນ ແລະ ອັນກໍຣິທຶມເທົ່ານັ້ນ, ແຕ່ຈະຂຶ້ນກັບການເຂົ້າເຖິງໄຟຟ້າທີ່ມີຄວາມໝັ້ນຄົງ, ລາຄາເໝາະສົມ ແລະ ມີການປ່ອຍຄາບອນຕ່ຳ ເພີ່ມຂຶ້ນອີກດ້ວຍ.

ຄວາມຕ້ອງການປະມວນຜົນຂໍ້ມູນເພີ່ມຂຶ້ນ: ໂຄງລ່າງພື້ນຖານດ້ານໄຟຟ້າຈະຮອງຮັບໄດ້ຫຼືບໍ່?

ອາຊີຕາເວັນອອກສຽງໃຕ້ກຳລັງກ້າວຂຶ້ນເປັນໜຶ່ງໃນສູນກາງການເຕີບໂຕທີ່ສຳຄັນຂອງເສດຖະກິດດິຈິຕອນໂລກ. ແນວໃດກໍຕາມ, ການຂະຫຍາຍຕົວຢ່າງໄວວາຂອງ AI ແລະ ສູນຂໍ້ມູນ ກຳລັງເຜີຍໃຫ້ເຫັນຊ່ອງຫວ່າງທີ່ໃຫຍ່ຂຶ້ນລະຫວ່າງການພັດທະນາດິຈິຕອນ ແລະ ໂຄງລ່າງພື້ນຖານດ້ານໄຟຟ້າ.

ເຂດລະບຽງເສດຖະກິດພາກຕາເວັນອອກ (Eastern Economic Corridor) ຂອງໄທ ເປັນຕົວຢ່າງທີ່ສະທ້ອນບັນຫານີ້ໄດ້ຢ່າງຊັດເຈນ. ພື້ນທີ່ດັ່ງກ່າວມີໂຄງການພັດທະນາສູນຂໍ້ມູນຢູ່ໃນແຜນລວມ 2.87 ກິກະວັດ (GW), ໂດຍສ່ວນໃຫຍ່ກະຈຸກຕົວຢູ່ໃນແຂວງຊົນບຸຣີ, ຣະຍອງ ແລະ ສະເຊີງເຊົາ.

ເຖິງແມ່ນວ່າຕົວເລກດັ່ງກ່າວຈະກວມເອົາໂຄງການທີ່ປະກາດແຜນແລ້ວ, ໄດ້ຮັບອະນຸມັດ ແລະ ກຳລັງກໍ່ສ້າງ ບໍ່ແມ່ນກຳລັງຂອງສູນຂໍ້ມູນທີ່ເປີດດຳເນີນງານແລ້ວກໍຕາມ, ແຕ່ມັນກໍສະທ້ອນໃຫ້ເຫັນຂະໜາດຄວາມຕ້ອງການໄຟຟ້າທີ່ອາດຈະເພີ່ມຂຶ້ນໃນອະນາຄົດ.

ຂະນະດຽວກັນ, ສະຖານີໄຟຟ້າຍ່ອຍບາງແຫ່ງໃນພື້ນທີ່ກຳລັງໃກ້ຈະຮອດຂີດຈຳກັດຂອງການຮອງຮັບ, ສ່ວນໂຄງການສູນຂໍ້ມູນຂະໜາດໃຫຍ່ກໍຕ້ອງປະເຊີນກັບໄລຍະເວລາລໍຖ້າການເຊື່ອມຕໍ່ເຂົ້າລະບົບໄຟຟ້າທີ່ຍາວນານຂຶ້ນ.

ຢູ່ສິງກະໂປ, ຂໍ້ຈຳກັດດ້ານທີ່ດິນ, ໄຟຟ້າ ແລະ ນ້ຳ ກຳລັງກະຕຸ້ນໃຫ້ການລົງທຶນດ້ານສູນຂໍ້ມູນບາງສ່ວນຂະຫຍາຍໄປຍັງປະເທດໃກ້ຄຽງ. ລັດຈໍໂຮ ຂອງມາເລເຊຍ ຊຶ່ງມີທີ່ຕັ້ງໃກ້ກັບສິງກະໂປ ແລະ ມີທີ່ດິນຮອງຮັບການພັດທະນາ, ກຳລັງກາຍເປັນຈຸດໝາຍສຳຄັນສຳລັບການພັດທະນາສູນຂໍ້ມູນຂະໜາດໃຫຍ່.

ສະຖານະການເຫຼົ່ານີ້ສະທ້ອນຄວາມທ້າທາຍພື້ນຖານປະການໜຶ່ງວ່າ: ຄວາມສາມາດໃນການປະມວນຜົນຂໍ້ມູນ, ການຜະລິດໄຟຟ້າ ແລະ ໂຄງລ່າງພື້ນຖານຂອງລະບົບຕາຂ່າຍໄຟຟ້າ ບໍ່ໄດ້ຂະຫຍາຍຕົວໃນອັດຕາດຽວກັນ ຫຼື ຢູ່ໃນພື້ນທີ່ດຽວກັນສະເໝີໄປ.

ເຖິງແມ່ນວ່າເສດຖະກິດໃດໜຶ່ງຈະມີກຳລັງຜະລິດໄຟຟ້າໂດຍລວມພຽງພໍ, ແຕ່ກໍອາດຈະປະສົບຄວາມຫຍຸ້ງຍາກໃນການຮອງຮັບຄວາມຕ້ອງການໄຟຟ້າໃໝ່ໆ ໃນພື້ນທີ່ທີ່ລະບົບສາຍສົ່ງ ແລະ ລະບົບຈຳໜ່າຍໄຟຟ້າຍັງມີຂໍ້ຈຳກັດ.

ພ້ອມກັນນັ້ນ, ລັກສະນະຂອງຄວາມຕ້ອງການໄຟຟ້າກໍກຳລັງປ່ຽນແປງ. ນອກເໜືອຈາກປະລິມານການສະໜອງແລ້ວ, ຄວາມໝັ້ນຄົງຂອງການຈ່າຍໄຟຟ້າ, ຄວາມມີສະຖຽນລະພາບຂອງລາຄາ, ການເຂົ້າເຖິງພະລັງງານສະອາດ ແລະ ຄວາມສາມາດໃນການກວດສອບຢືນຢັນຄຸນລັກສະນະດ້ານສິ່ງແວດລ້ອມຂອງພະລັງງານ ກຳລັງກາຍເປັນປັດໄຈທີ່ນັກລົງທຶນໃຫ້ຄວາມສຳຄັນຫຼາຍຂຶ້ນ.

ອີງຕາມອົງການພະລັງງານສາກົນ (International Energy Agency – IEA), ຂະແໜງເຕັກໂນໂລຊີກວມເອົາປະມານ 40 ເປີເຊັນ ຂອງສັນຍາຊື້ຂາຍໄຟຟ້າຈາກພະລັງງານໝູນວຽນຂອງພາກທຸລະກິດ ໃນປີ 2025.

ດັ່ງນັ້ນ, ການຮອງຮັບຄວາມຕ້ອງການໄຟຟ້າທີ່ເພີ່ມຂຶ້ນ ຄວບຄູ່ກັບການຫຼຸດຜ່ອນການປ່ອຍຄາບອນ ຈຶ່ງກຳລັງກາຍເປັນບູລິມະສິດຮ່ວມກັນຂອງລະບົບພະລັງງານທົ່ວພາກພື້ນ.

ກ້າວຂ້າມການສະໜອງພາຍໃນປະເທດ: ເປີດໂອກາດນຳໃຊ້ຊັບພະຍາກອນພະລັງງານລະດັບພາກພື້ນ

ການຂະຫຍາຍກຳລັງຜະລິດໄຟຟ້າພາຍໃນປະເທດ ແລະ ການປັບປຸງລະບົບຕາຂ່າຍໄຟຟ້າພາຍໃນໃຫ້ເຂັ້ມແຂງ ຍັງຄົງເປັນພື້ນຖານສຳຄັນໃນການຮອງຮັບຄວາມຕ້ອງການໄຟຟ້າທີ່ເພີ່ມຂຶ້ນ.

ແນວໃດກໍຕາມ, ສຳລັບບັນດາເສດຖະກິດໃນອາຊີ-ປາຊີຟິກ ທີ່ມີຊັບພະຍາກອນພະລັງງານ, ໂຄງສ້າງອຸດສາຫະກຳ ແລະ ຄວາມຕ້ອງການພັດທະນາທີ່ແຕກຕ່າງກັນ, ການເຊື່ອມໂຍງລະບົບໄຟຟ້າລະດັບພາກພື້ນສາມາດຊ່ວຍຂະຫຍາຍທາງເລືອກໃນການແກ້ໄຂບັນຫາໃຫ້ຫຼາກຫຼາຍຂຶ້ນ.

ອາຊີຕາເວັນອອກສຽງໃຕ້ມີຊັບພະຍາກອນພະລັງງານນ້ຳ, ແສງຕາເວັນ ແລະ ລົມ ຢ່າງອຸດົມສົມບູນ, ແຕ່ພື້ນທີ່ທີ່ມີທ່າແຮງສູງໃນການຜະລິດພະລັງງານໝູນວຽນ ບໍ່ໄດ້ຕັ້ງຢູ່ໃນບ່ອນດຽວກັນກັບສູນກາງທີ່ມີຄວາມຕ້ອງການໃຊ້ໄຟຟ້າສູງສະເໝີໄປ.

ບາງເສດຖະກິດມີໂອກາດຢ່າງຫຼວງຫຼາຍໃນການພັດທະນາການຜະລິດໄຟຟ້າຈາກພະລັງງານໝູນວຽນ, ໃນຂະນະທີ່ບາງເສດຖະກິດກັບປະເຊີນຂໍ້ຈຳກັດດ້ານທີ່ດິນ, ນ້ຳ ແລະ ແຫຼ່ງພະລັງງານພາຍໃນປະເທດ.

ການເຊື່ອມຕໍ່ລະບົບໄຟຟ້າຂ້າມຊາຍແດນສາມາດຊ່ວຍຫຼຸດຊ່ອງຫວ່າງດັ່ງກ່າວ, ໂດຍເປີດໂອກາດໃຫ້ບັນດາເສດຖະກິດນຳໃຊ້ຊັບພະຍາກອນທີ່ສາມາດເສີມກັນໄດ້ ແລະ ສົ່ງໄຟຟ້າສະອາດໄປຍັງພື້ນທີ່ທີ່ມີຄວາມຕ້ອງການ.

ຜົນປະໂຫຍດຂອງການເຊື່ອມໂຍງນີ້ບໍ່ໄດ້ຈຳກັດຢູ່ພຽງແຕ່ການຄ້າໄຟຟ້າເທົ່ານັ້ນ.

ການແບ່ງປັນກຳລັງຜະລິດສຳຮອງ ແລະ ຄວາມຍືດຫຍຸ່ນຂອງລະບົບຜ່ານໂຄງຂ່າຍໄຟຟ້າທີ່ເຊື່ອມຕໍ່ກັນ ສາມາດເພີ່ມທາງເລືອກໃນການສະໜອງໄຟຟ້າ ໃນຊ່ວງທີ່ເກີດສະພາບອາກາດຮຸນແຮງ, ຄວາມຕ້ອງການໄຟຟ້າເພີ່ມຂຶ້ນຢ່າງກະທັນຫັນ ຫຼື ການຢຸດຊະງັກຂອງແຫຼ່ງພະລັງງານບາງປະເພດ, ຊຶ່ງຈະຊ່ວຍເສີມສ້າງຄວາມໝັ້ນຄົງ ແລະ ຄວາມທົນທານຂອງລະບົບພະລັງງານໂດຍລວມ.

ສິ່ງສຳຄັນແມ່ນ ການເຊື່ອມໂຍງໄຟຟ້າລະດັບພາກພື້ນ ແລະ ຄວາມໝັ້ນຄົງດ້ານພະລັງງານພາຍໃນປະເທດ ບໍ່ແມ່ນເປົ້າໝາຍທີ່ຂັດແຍ່ງກັນ.

ການເຊື່ອມໂຍງລະບົບໄຟຟ້າບໍ່ໄດ້ມີຈຸດປະສົງເພື່ອທົດແທນຄວາມສາມາດດ້ານພະລັງງານພາຍໃນປະເທດ ແລະ ບໍ່ຈຳເປັນຕ້ອງສ້າງການເພິ່ງພາຝ່າຍດຽວ.

ແຕ່ໃນທາງກົງກັນຂ້າມ, ການຊື້ຂາຍໄຟຟ້າສອງທິດທາງ ແລະ ການນຳໃຊ້ຊັບພະຍາກອນທີ່ເສີມຊຶ່ງກັນແລະກັນ ສາມາດຂະຫຍາຍທາງເລືອກໃຫ້ແກ່ບັນດາເສດຖະກິດທີ່ເຂົ້າຮ່ວມ, ພ້ອມທັງສະໜັບສະໜູນເປົ້າໝາຍດ້ານຄວາມໝັ້ນຄົງພະລັງງານ ແລະ ການພັດທະນາຂອງແຕ່ລະປະເທດ.

ເຊື່ອມໂຍງໂຄງລ່າງພື້ນຖານ ແລະ ຕະຫຼາດໄຟຟ້າເຂົ້າດ້ວຍກັນ

ໂຄງຂ່າຍໄຟຟ້າອາຊຽນ (ASEAN Power Grid) ເປັນກອບການຮ່ວມມືທີ່ສຳຄັນໃນການຊຸກຍູ້ການຮ່ວມມືດ້ານໄຟຟ້າລະດັບພາກພື້ນ.

ການສຶກສາດ້ານການເຊື່ອມຕໍ່ລະບົບໄຟຟ້າລະດັບພາກພື້ນຂອງສູນພະລັງງານອາຊຽນ (ASEAN Centre for Energy) ໄດ້ລະບຸ 18 ໂຄງການບູລິມະສິດ, ຊຶ່ງສະທ້ອນໃຫ້ເຫັນທ່າແຮງອັນສຳຄັນໃນການຂະຫຍາຍການເຊື່ອມໂຍງໃນອະນາຄົດ.

ແນວໃດກໍຕາມ, ການກໍ່ສ້າງໂຄງລ່າງພື້ນຖານສາຍສົ່ງໄຟຟ້າພຽງຢ່າງດຽວ ຍັງບໍ່ພຽງພໍທີ່ຈະປ່ຽນວິໄສທັດດັ່ງກ່າວໃຫ້ກາຍເປັນຜົນປະໂຫຍດທີ່ເປັນຮູບປະທຳ.

ມີສາມບູລິມະສິດສຳຄັນທີ່ຄວນໄດ້ຮັບຄວາມເອົາໃຈໃສ່ເປັນພິເສດ.

1. ປະສານແຜນພັດທະນາໄຟຟ້າໃຫ້ສອດຄ່ອງກັບການພັດທະນາດິຈິຕອນ

ຄວາມຕ້ອງການໄຟຟ້າຂອງບັນດາສູນຂໍ້ມູນຄວນຖືກນຳເຂົ້າມາພິຈາລະນາໃນການວາງແຜນພັດທະນາລະບົບໄຟຟ້າຕັ້ງແຕ່ໄລຍະຕົ້ນ, ໂດຍມີການປະສານງານຢ່າງໃກ້ຊິດລະຫວ່າງການຜະລິດໄຟຟ້າ, ການຂະຫຍາຍໂຄງຂ່າຍໄຟຟ້າ, ລະບົບກັກເກັບພະລັງງານ ແລະ ການພັດທະນາອຸດສາຫະກຳ.

ແຜນພັດທະນາໄຟຟ້າແຫ່ງຊາດຄວນສອດຄ່ອງກັບແຜນການເຊື່ອມໂຍງໄຟຟ້າລະດັບພາກພື້ນໃຫ້ຫຼາຍຂຶ້ນ.

ຂະນະດຽວກັນ, ການປັບປຸງປະສິດທິພາບຂອງສູນຂໍ້ມູນ, ໂດຍສະເພາະລະບົບລະບາຍຄວາມຮ້ອນ ແລະ ການບໍລິຫານຈັດການນ້ຳ, ກໍສາມາດຊ່ວຍຫຼຸດຄວາມກົດດັນຕໍ່ລະບົບໄຟຟ້າ ແລະ ຊັບພະຍາກອນອື່ນໆ.

2. ເສີມສ້າງຕະຫຼາດຊື້ຂາຍໄຟຟ້າຂ້າມຊາຍແດນ

ພາຍໃຕ້ການເຄົາລົບນະໂຍບາຍດ້ານພະລັງງານ ແລະ ກອບລະບຽບກົດໝາຍຂອງແຕ່ລະເສດຖະກິດທີ່ເຂົ້າຮ່ວມ, ການຮ່ວມມືລະດັບພາກພື້ນຄວນຊຸກຍູ້ໃຫ້ມີກົນໄກທີ່ສາມາດນຳໃຊ້ໄດ້ຈິງ ສຳລັບການເຂົ້າໃຊ້ລະບົບສາຍສົ່ງໄຟຟ້າ, ການຈັດສັນຂີດຄວາມສາມາດຂອງລະບົບ, ການຊຳລະສະສາງທຸລະກຳໃນຕະຫຼາດ ແລະ ການຮັບຮູ້ໃບຢັ້ງຢືນພະລັງງານໝູນວຽນຮ່ວມກັນ.

ກົນໄກເຫຼົ່ານີ້ຈະຊ່ວຍໃຫ້ໄຟຟ້າສະອາດບໍ່ພຽງແຕ່ສາມາດສົ່ງຜ່ານຊາຍແດນໄດ້ເທົ່ານັ້ນ, ແຕ່ຍັງສາມາດຊື້ຂາຍ, ວັດແທກ ແລະ ກວດສອບຢືນຢັນໄດ້, ຊຶ່ງຈະຊ່ວຍສະໜັບສະໜູນຄຳໝັ້ນສັນຍາດ້ານຄວາມຍືນຍົງຂອງອຸດສາຫະກຳດິຈິຕອນ.

3. ເພີ່ມທະວີການຮ່ວມມືດ້ານເຕັກໂນໂລຊີ ແລະ ການເງິນ

ລັດຖະບານ, ລັດວິສາຫະກິດ ແລະ ບໍລິສັດສະໜອງໄຟຟ້າ, ບໍລິສັດເຕັກໂນໂລຊີ, ສະຖາບັນການເງິນ ແລະ ທະນາຄານເພື່ອການພັດທະນາຫຼາຍຝ່າຍ ສາມາດນຳຄວາມຊຳນານທີ່ແຕກຕ່າງກັນມາເສີມກັນໄດ້ ໃນການພັດທະນາລະບົບຕາຂ່າຍໄຟຟ້າ, ລະບົບກັກເກັບພະລັງງານ, ການເພີ່ມປະສິດທິພາບການນຳໃຊ້ພະລັງງານ ແລະ ການຊື້ຂາຍໄຟຟ້າຂ້າມຊາຍແດນ.

ການຮ່ວມມືໃນການພັດທະນາໂຄງການ ແລະ ການລະດົມທຶນ ຈະມີບົດບາດສຳຄັນໃນການເຮັດໃຫ້ໂຄງລ່າງພື້ນຖານໄຟຟ້າລະດັບພາກພື້ນມີຄວາມຄຸ້ມຄ່າທາງທຸລະກິດ ແລະ ສາມາດດຳເນີນໄປໄດ້ຢ່າງຍືນຍົງໃນໄລຍະຍາວ.

ໂຄງລ່າງພື້ນຖານທາງກາຍະພາບ ແລະ ກົນໄກສະຖາບັນຕະຫຼາດ ຈຳເປັນຕ້ອງພັດທະນາໄປຄຽງຄູ່ກັນ.

ການປະສານມາດຕະຖານທາງເຕັກນິກ, ຂໍ້ກຳນົດດ້ານກົດລະບຽບ ແລະ ຊັບພະຍາກອນທາງການເງິນໃຫ້ສອດຄ່ອງກັນ ຈະຊ່ວຍໃຫ້ການຮ່ວມມືດ້ານພະລັງງານລະດັບພາກພື້ນ ສ້າງຜົນປະໂຫຍດທາງເສດຖະກິດ, ສັງຄົມ ແລະ ສິ່ງແວດລ້ອມໄດ້ຫຼາຍຂຶ້ນ.

ເຊື່ອມໂຍງລະບົບພະລັງງານ ເພື່ອຂະຫຍາຍໂອກາດ ແລະ ຜົນປະໂຫຍດຮ່ວມກັນ

ໃນເດືອນເມສາ 2026, ໂຄງການເຊື່ອມໂຍງລະບົບໄຟຟ້າ 500 ກິໂລໂວນ (kV) ລະຫວ່າງ ຈີນ-ລາວ ໄດ້ເລີ່ມເປີດດຳເນີນງານ, ໂດຍເປັນໂຄງລ່າງພື້ນຖານໃໝ່ທີ່ຮອງຮັບການຊື້ຂາຍໄຟຟ້າສະອາດໃນຂະໜາດທີ່ໃຫຍ່ຂຶ້ນ ແລະ ການສົ່ງໄຟຟ້າສອງທິດທາງລະຫວ່າງສອງປະເທດ.

ໂຄງການນີ້ເປັນຕົວຢ່າງທີ່ເປັນຮູບປະທຳວ່າ ການຮ່ວມມືດ້ານໄຟຟ້າຂ້າມຊາຍແດນ ສາມາດສະໜັບສະໜູນການຈັດສັນ ແລະ ນຳໃຊ້ຊັບພະຍາກອນພະລັງງານໃຫ້ມີປະສິດທິພາບຫຼາຍຂຶ້ນໄດ້ແນວໃດ, ພ້ອມທັງສະໜອງບົດຮຽນ ແລະ ແນວທາງສຳລັບການຮ່ວມມືລະດັບພາກພື້ນທີ່ກວ້າງຂວາງກວ່າເກົ່າ.

ຈາກໂຄງຂ່າຍໄຟຟ້າອາຊຽນ ໄປສູ່ການຮ່ວມມືດ້ານໄຟຟ້າໃນພາກພື້ນລ້ານຊ້າງ-ແມ່ຂອງ ແລະ ການປຶກສາຫາລືໃນຂອບເຂດ APEC ທີ່ກວ້າງຂວາງກວ່າ ກ່ຽວກັບຄວາມໝັ້ນຄົງດ້ານພະລັງງານ, ການພັດທະນາດິຈິຕອນ ແລະ ຄວາມຍືນຍົງ, ການເຊື່ອມໂຍງດ້ານພະລັງງານກຳລັງກາຍເປັນຂໍ້ຕໍ່ທີ່ມີຄວາມສຳຄັນເພີ່ມຂຶ້ນ ລະຫວ່າງການຫັນປ່ຽນສູ່ດິຈິຕອນ ແລະ ການຫັນປ່ຽນສູ່ເສດຖະກິດສີຂຽວ.

AI ບໍ່ພຽງແຕ່ກຳລັງປ່ຽນແປງໂລກຂອງເຕັກໂນໂລຊີເທົ່ານັ້ນ, ແຕ່ຍັງກຳລັງປ່ຽນຮູບແບບການຜະລິດ, ການສົ່ງຈ່າຍ ແລະ ການຊົມໃຊ້ໄຟຟ້າອີກດ້ວຍ.

ສຳລັບບັນດາເສດຖະກິດໃນອາຊີ-ປາຊີຟິກ, ຄວາມທ້າທາຍສຳຄັນແມ່ນການເຮັດໃຫ້ແນ່ໃຈວ່າ ຄວາມແຕກຕ່າງດ້ານຊັບພະຍາກອນພະລັງງານ ແລະ ລະດັບການພັດທະນາ ຈະບໍ່ກາຍເປັນອຸປະສັກຕໍ່ການເຂົ້າມາມີສ່ວນຮ່ວມໃນເສດຖະກິດດິຈິຕອນ.

ເຊັ່ນດຽວກັບເຄືອຂ່າຍດິຈິຕອນທີ່ເຊື່ອມຕໍ່ຜູ້ຄົນ, ທຸລະກິດ ແລະ ຕະຫຼາດເຂົ້າຫາກັນຂ້າມຊາຍແດນ, ລະບົບໄຟຟ້າທີ່ເຊື່ອມໂຍງກັນກໍສາມາດເຊື່ອມຕໍ່ແຫຼ່ງຊັບພະຍາກອນພະລັງງານ ເຂົ້າກັບສູນກາງຄວາມຕ້ອງການໃຊ້ໄຟຟ້າແຫ່ງໃໝ່ໆ ໄດ້ເຊັ່ນກັນ.

ດ້ວຍການປະສານການພັດທະນາໂຄງລ່າງພື້ນຖານດ້ານດິຈິຕອນ ແລະ ພະລັງງານໃຫ້ສອດຄ່ອງກັນ, ພ້ອມທັງຊຸກຍູ້ການຮ່ວມມືທີ່ເປີດກວ້າງ, ສາມາດນຳໄປປະຕິບັດໄດ້ຈິງ ແລະ ມີຜົນປະໂຫຍດຮ່ວມກັນ, ບັນດາເສດຖະກິດໃນອາຊີ-ປາຊີຟິກ ຈະສາມາດປ່ຽນຄວາມທ້າທາຍດ້ານໄຟຟ້າໃນຍຸກ AI ໃຫ້ກາຍເປັນໂອກາດໃນການສ້າງຄວາມຈະເລີນຮຸ່ງເຮືອງຮ່ວມກັນ ແລະ ການເຕີບໂຕຢ່າງຍືນຍົງ.

Comments are disabled