ລາວ-ຈີນ ຈັບມືຊຸກຍູ້ການສົ່ງອອກ ເປີດທາງດັນສິນຄ້າກະສິກຳບຸກຕະຫຼາດໃຫຍ່
ລາວ ແລະ ຈີນ ຍົກລະດັບການຮ່ວມມືຍຸດທະສາດ ຕັ້ງເປົ້າຊຸກຍູ້ການຄ້າກະສິກຳ ແລະ ສ້າງໂອກາດທາງເສດຖະກິດທີ່ເປັນຮູບປະທຳໃຫ້ແກ່ຊາວກະສິກອນ ແລະ ພາກທຸລະກິດພາຍໃນປີ 2030 ເຊິ່ງບາດກ້າວນີ້ຄືການເປີດປະຕູສູ່ການພັດທະນາລະບຽງເສດຖະກິດ ລາວ-ຈີນ ທີ່ຕິດພັນກັບການຍົກລະດັບມາດຕະຖານການຜະລິດເພື່ອການສົ່ງອອກທີ່ຍືນຍົງ.
ຕາມການລາຍງານຂອງ ກະຊວງ ກະສິກຳ ແລະ ສິ່ງແວດລ້ອມ, ທິດທາງອັນສຳຄັນດັ່ງກ່າວ ໄດ້ຖືກຍົກໃຫ້ເຫັນຢ່າງຈະແຈ້ງໃນກອງປະຊຸມລະຫວ່າງ ກະຊວງກະສິກຳ ແລະ ສິ່ງແວດລ້ອມ ຮ່ວມກັບ ຄະນະກຳມະການຮ່ວມມື ລາວ-ຈີນ ທີ່ຈັດຂຶ້ນຢູ່ນະຄອນຫຼວງວຽງຈັນ ເມື່ອວັນອັງຄານທີ່ຜ່ານມາ ໂດຍການເປັນປະທານຂອງ ທ່ານ ດຣ. ຈັນທະຄອນ ບົວລະພັນ ລັດຖະມົນຕີຊ່ວຍວ່າການກະຊວງກະສິກຳ ແລະ ສິ່ງແວດລ້ອມ.
ການປຶກສາຫາລືໃນຄັ້ງນີ້ໄດ້ສຸມໃສ່ການຮັດແໜ້ນໂຄງຮ່າງການຮ່ວມມືສອງຝ່າຍ ແລະ ວາງທິດທາງບູລິມະສິດດ້ານກະສິກຳ ໃຫ້ສอดຄ່ອງກັບແຜນການພັດທະນາລະບຽງເສດຖະກິດ ລາວ-ຈີນ ໄປຈົນເຖິງປີ 2030 ເຊິ່ງທັງສອງຝ່າຍໄດ້ຮ່ວມກັນທົບທວນຄືນຜົນສຳເລັດໃນຊຸມປີທີ່ຜ່ານມາ ພ້ອມທັງກຳນົດແຜນການ ແລະ ຄາດຄະເນຜົນຮັບສຳລັບໄລຍະ 5 ປີຕໍ່ໜ້າ ໂດຍເນັ້ນໜັກໃສ່ຂົງເຂດບູລິມະສິດທີ່ຂະແໜງກະສິກຳຈະສາມາດປະກອບສ່ວນເຂົ້າໃນການເຕີບໂຕທາງດ້ານເສດຖະກິດ ແລະ ການຄ້າລະຫວ່າງສອງປະເທດໃຫ້ແຂງແກ່ນກວ່າເກົ່າ.
ໜຶ່ງໃນປະເດັນຫຼັກທີ່ໄດ້ຮັບການຈັບຕາ ແລະ ເປັນຄວາມຫວັງໃໝ່ຂອງຊາວກະສິກອນ ແມ່ນໂຄງການຊ່ວຍເຫຼືອລ້າຈາກລັດຖະບານຈີນ ເພື່ອສະໜັບສະໜູນການຜະລິດພືດຜັກ ແລະ ໝາກໄມ້ສະອາດໃນລາວ.
ຂໍ້ລິເລີ່ມດັ່ງກ່າວນີ້ ຖືກປະເມີນວ່າຈະເປັນກຸນແຈສຳຄັນໃນການຍົກລະດັບຄຸນນະພາບຜົນຜະລິດກະສິກຳຂອງລາວ ພ້ອມທັງສ້າງຮາກຖານທີ່ເຂັ້ມແຂງໃນການສະໜອງສິນຄ້າຄຸນະພາບສູງ ເພື່ອຕອບໂຈດຄວາມຕ້ອງການຂອງທັງຕະຫຼາດພາຍໃນ ແລະ ຕ່າງປະເທດ.
ນອກຈາກນີ້, ກອງປະຊຸມຍັງໄດ້ລົງເລິກເຖິງການຮ່ວມມືໃນການຜະລິດກະສິກຳແບບທັນສະໄໝ, ການຄົ້ນຄວ້າແນວພັນພືດ ແລະ ສັດ, ການຄວບຄຸມພະຍາດໃນພືດ ແລະ ສັດ, ກະສິກຳເພື່ອການຄ້າ ກໍຄືການຊຸກຍູ້ການສົ່ງອອກສິນຄ້າກະສິກຳຈາກລາວໄປຍັງປະເທດຈີນໃຫ້ມີປະລິມານເພີ່ມຂຶ້ນ.
ຢ່າງໃດກໍຕາມ ເງື່ອນໄຂສຳຄັນທີ່ສຸດໃນການຊຸກຍູ້ການສົ່ງອອກ ແມ່ນຜົນຜະລິດກະສິກຳຂອງລາວຈະຕ້ອງຜ່ານການຢັ້ງຢືນ ແລະ ຕອບສະໜອງໄດ້ຕາມມາດຕະຖານສຸຂານາໄມພືດ ແລະ ສັດ ຕາມທີ່ທັງສອງປະເທດໄດ້ຕົກລົງກັນໄວ້.
ການປະຕິບັດຕາມມາດຕະຖານເຫຼົ່ານີ້ຢ່າງເຄັ່ງຄັດ ຈະເປັນປັດໄຈຕັດສິນຊີ້ຊະຕາໃນການເປີດກວ້າງການເຂົ້າເຖິງຕະຫຼາດ ແລະ ສ້າງຂີດຄວາມສາມາດໃນການແຂ່ງຂັນໃຫ້ແກ່ສິນຄ້າລາວ ໃນຕະຫຼາດຈີນທີ່ມີຂະໜາດໃຫຍ່ ແລະ ມີກຳລັງຊື້ສູງມະຫາສານ.
ເມື່ອເບິ່ງໃນພາບລວມ ພາຍໃຕ້ຂອບການຮ່ວມມື ລາວ-ຈີນ ທີ່ກວມເອົາຫຼາກຫຼາຍຂົງເຂດແບບຮອບດ້ານ ນັບຕັ້ງແຕ່ການເມືອງ, ຄວາມໝັ້ນຄົງ, ການຄ້າ, ການລົງທຶນ, ພື້ນຖານໂຄງລ່າງ, ພະລັງງານ ໄປຈົນເຖິງວິທະຍາສາດເຕັກໂນໂລຊີ, ການສຶກສາ, ສາທາລະນະສຸກ, ວັດທະນະທຳ, ການທ່ອງທ່ຽວ ແລະ ການພັດທະນາຊັບພະຍາກອນມະນຸດ; ຂະແໜງກະສິກຳຖືເປັນໜຶ່ງໃນເສັ້ນເລືອດໃຫຍ່ທີ່ຈະເຊື່ອມໂຍງຜົນປະໂຫຍດຂອງປະຊາຊົນຮາກຖານ.
ໃນຕໍ່ໜ້າ ທັງສອງຝ່າຍຈະເລັ່ງກຳນົດໂຄງການບູລິມະສິດເພີ່ມຕື່ມ ແລະ ວາງເປົ້າໝາຍທີ່ສາມາດວັດແທກຜົນໄດ້ຢ່າງຊັດເຈນ ເພື່ອຊຸກຍູ້ໃຫ້ຂະແໜງກະສິກຳກາຍເປັນກຳລັງຂັບເຄື່ອນຫຼັກຂອງລະບຽງເສດຖະກິດ ລາວ-ຈີນ ພ້ອມທັງສະໜັບສະໜູນການເຕີບໂຕທີ່ຍືນຍົງ ແລະ ຮັດແໜ້ນສາຍໃຍການຄ້າຂອງທັງສອງຊາດໃຫ້ຈະເລີນງອກງາມຍິ່ງໆຂຶ້ນໄປ.
#LaoXperts #ການຄ້າລາວຈີນ #ກະສິກຳລາວ #ລະບຽງເສດຖະກິດລາວຈີນ #ສົ່ງອອກກະສິກຳ #ເສດຖະກິດລາວ #LaosChinaPartnership
