ທ່ານນາຍົກລັດຖະມົນຕີ ວາງທິດທາງຍຸດທະສາດໃຫ້ນັກທຸລະກິດໜຸ່ມລາວ ເປັນກຳລັງຫຼັກຂັບເຄື່ອນເສດຖະກິດ-ສັງຄົມ ຜ່ານວິກິດເງິນຕາ, ເນັ້ນໜັກການຮ່ວມມືລັດ-ເອກະຊົນໃນ 7 ຂະແໜງບຸລິມະສິດ, ຍູ້ການຫັນເປັນດິຈິຕອນ ແລະ ດຶງດູດແຫຼ່ງທຶນສາກົນ ເພື່ອສ້າງຄວາມເຂັ້ມແຂງໃຫ້ທຸລະກິດພາຍໃນ ແລະ ຍົກລະດັບຊີວິດການເປັນຢູ່ຂອງປະຊາຊົນຢ່າງຍືນຍົງ.
ຕາມການລາຍງານຂອງ ຫ້ອງວ່າການ ນາຍົກລັດຖະມົນຕີ, ກອງປະຊຸມສະຫຼຸບວຽກງານ 6 ເດືອນຕົ້ນປີ ແລະ ທິດທາງແຜນການທ້າຍປີ 2026 ຂອງສະມາຄົມນັກທຸລະກິດໜຸ່ມລາວ ໄດ້ຈັດຂຶ້ນຢ່າງເປັນທາງການໃນຕອນບ່າຍວັນທີ 6 ສິງຫາ 2026 ທີ່ນະຄອນຫຼວງວຽງຈັນ ພາຍໃຕ້ຫົວຂໍ້ “ການພັດທະນາສະມາຄົມທຸລະກິດໜຸ່ມລາວ ແລະ ການສົ່ງເສີມຊາວໜຸ່ມສ້າງເສດຖະກິດ”.
ໃນໂອກາດສຳຄັນນີ້, ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ໃຫ້ກຽດເຂົ້າຮ່ວມໂອ້ລົມ ພ້ອມທັງສະແດງຄວາມຍ້ອງຍໍຊົມເຊີຍຕໍ່ຄະນະບໍລິຫານງານສະມາຄົມ ທີ່ໄດ້ກາຍເປັນແກນນຳສຳຄັນໃນການຮ່ວມມືກັບລັດຖະບານ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ແລະ ວາລະແຫ່ງຊາດ ໂດຍໄດ້ສຸມທຸກສະຕິປັນຍາເພື່ອຜ່ານຜ່າຄວາມຫຍຸ້ງຍາກທາງດ້ານເສດຖະກິດ-ການເງິນ ຊ່ວຍພັດທະນາຊົນນະບົດ ແລະ ຫຼຸດຜ່ອນຄວາມທຸກຍາກຂອງປະຊາຊົນໃຫ້ໄດ້ຮັບຜົນດີຂຶ້ນເປັນກ້າວໆມາ.
ເຖິງຢ່າງໃດກໍຕາມ ທ່ານນາຍົກລັດຖະມົນຕີ ໄດ້ຊີ້ໃຫ້ເຫັນເຖິງສິ່ງທ້າທາຍອັນໜັກໜ່ວງທີ່ປະເທດຊາດກຳລັງປະເຊີນຢ່າງກົງໄປກົງມາ ໂດຍສະເພາະສະພາບການຜັນແປຂອງພາກພື້ນ ແລະ ສາກົນທີ່ຄາດຄະເນໄດ້ຍາກ ເຊິ່ງສົ່ງຜົນກະທົບຕໍ່ຄວາມສ່ຽງດ້ານເງິນຕາ, ເສດຖະກິດມະຫາພາກ ແລະ ສິນເຊື່ອ. ພ້ອມດຽວກັນນີ້ ຍັງມີຂໍ້ຈຳກັດທາງດ້ານໂຄງສ້າງການຜະລິດພາຍໃນ ແລະ ຂີດຄວາມສາມາດໃນການເຂົ້າເຖິງເຕັກໂນໂລຊີທີ່ທັນສະໄໝ ເຊິ່ງສອດຄ່ອງກັບການລາຍງານຂອງທ່ານ ທອງລີ ສີສຸລິດ ທີ່ໄດ້ເນັ້ນໜັກເຖິງຄວາມຈຳເປັນໃນການຍົກລະດັບຄວາມຮູ້, ທັກສະ, ການສ້າງແຫຼ່ງທຶນ ແລະ ການສົ່ງເສີມສະມາຊິກວິສາຫະກິດຂະໜາດນ້ອຍ ແລະ ກາງ (MSME) ໃຫ້ມີຄວາມເຂັ້ມແຂງ ຮ່ວມໄປເຖິງການປັບປຸງວຽກງານການສຶກສາອົບຮົມການເມືອງ-ແນວຄິດ ແລະ ການສ້າງນິຕິກຳເພື່ອຮອງຮັບການຂະຫຍາຍຕົວຂອງທຸລະກິດ.
ເພື່ອເປັນການຜ່າທາງຕັນ ແລະ ຂັບເຄື່ອນເສດຖະກິດໄປຂ້າງໜ້າ, ທ່ານນາຍົກລັດຖະມົນຕີ ໄດ້ວາງທິດຊີ້ນຳຢ່າງເດັດຂາດໃຫ້ນັກທຸລະກິດໜຸ່ມລາວ ເຕົ້າໂຮມຄວາມສາມັກຄີ ແລະ ຍູ້ແຮງການຮ່ວມທຶນໃນການປະຕິບັດໂຄງການຕ່າງໆໃຫ້ເປັນຮູບປະທຳ. ທ່ານໄດ້ເນັ້ນໜັກໃຫ້ເສີມຂະຫຍາຍກົນໄກການຮ່ວມມືລະຫວ່າງພາກລັດ ແລະ ເອກະຊົນ ໂດຍສຸມໃສ່ 7 ຂະແໜງເສດຖະກິດທີ່ເປັນບູລິມະສິດອັນປະກອບມີ: ຂະແໜງກະສິກຳ ແລະ ປ່າໄມ້ ທີ່ເນັ້ນການຜະລິດກະສິກຳສະອາດເພື່ອຄໍ້າປະກັນສະບຽງອາຫານ ແລະ ສົ່ງອອກ, ຂະແໜງອຸດສາຫະກຳປຸງແຕ່ງ ແລະ ຫັດຖະກຳ ເພື່ອສ້າງມູນຄ່າເພີ່ມໃຫ້ແກ່ວັດຖຸດິບພາຍໃນ, ຂະແໜງພະລັງງານ ທີ່ສືບຕໍ່ຍູ້ແຮງການພັດທະນາພະລັງງານທົດແທນສະອາດ, ຂະແໜງບໍ່ແຮ່ ດ້ວຍການຄຸ້ມຄອງ ແລະ ຂຸດຄົ້ນແບບຍືນຍົງ, ຂະແໜງການທ່ອງທ່ຽວ ແລະ ບໍລິການ ເພື່ອດຶງດູດເງິນຕາຕ່າງປະເທດ, ຂະແໜງໂຍທາທິການ ການຂົນສົ່ງ ແລະ ໂລຈິສຕິກ ເພື່ອຫັນປະເທດເປັນສູນກາງການເຊື່ອມຈອດພາກພື້ນ, ແລະ ຂະແໜງເຕັກໂນໂລຊີການສື່ສານ ແລະ ເສດຖະກິດດິຈິຕອນ ເພື່ອຫັນການບໍລິຫານ ແລະ ທຸລະກິດເຂົ້າສູ່ຄວາມທັນສະໄໝ.
ໃນຂະນະທີ່ລັດຖະບານຈະເລັ່ງປັບປຸງສະພາບແວດລ້ອມການດຳເນີນທຸລະກິດໃຫ້ມີຄວາມສະດວກ ແລະ ວ່ອງໄວຂຶ້ນ.
ນອກຈາກນີ້ ທ່ານຍັງໄດ້ຊີ້ນຳໃຫ້ຮີບຮ້ອນຫັນລະບົບການຄຸ້ມຄອງບໍລິຫານເຂົ້າສູ່ຍຸກດິຈິຕອນ ດ້ວຍການນຳໃຊ້ເຕັກໂນໂລຊີທີ່ທັນສະໄໝ, ພັດທະນາແຮງງານຊາວໜຸ່ມໃຫ້ສາມາດເຂົ້າເຖິງຕະຫຼາດແຮງງານໄດ້ຢ່າງທົ່ວເຖິງ, ແລະ ທີ່ສຳຄັນທີ່ສຸດຄືການຊຸກຍູ້ໃຫ້ນັກທຸລະກິດໜຸ່ມຄົ້ນຄວ້າຂຽນບົດໂຄງການຕ່າງໆຮ່ວມກັບອົງການຈັດຕັ້ງສາກົນ ເພື່ອຍາດແຍ່ງແຫຼ່ງທຶນຈາກຕ່າງປະເທດ ມາສົມທົບກັບທ່າແຮງພາຍໃນປະເທດ ສ້າງມູນຄ່າເພີ່ມໃຫ້ສູງສຸດ ກ່ອນຈະປິດທ້າຍດ້ວຍການຮຽກຮ້ອງໃຫ້ທຸກພາກສ່ວນ ນຳເອົາເນື້ອໃນຈິດໃຈຂອງກອງປະຊຸມຄັ້ງນີ້ ໄປຈັດຕັ້ງປະຕິບັດໃຫ້ເກີດໝາກຜົນຕົວຈິງຕາມເປົ້າໝາຍທີ່ວາງໄວ້ຢ່າງແທ້ຈິງ.
ງານດັ່ງກ່າວ ໄດ້ມີການ ເຂົ້າຮ່ວມຂອງທ່ານ ທອງລີ ສີສຸລິດ ເລຂາຄະນະບໍລິຫານງານຊາວໜຸ່ມປະຊາຊົນປະຕິວັດລາວ, ທ່ານ ບົວຄົງ ນາມມະວົງ ລັດຖະມົນຕີ ຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ແລະ ທ່ານ ນາງ ສຸວານີ ຄຳຜຸຍ ປະທານສະມາຄົມນັກທຸລະກິດໜຸ່ມລາວ.
#LaoXperts #ເສດຖະກິດລາວ #ນັກທຸລະກິດໜຸ່ມລາວ #YEAL #ການພັດທະນາເສດຖະກິດ #ລັດຖະບານລາວ #MSME #ການລົງທຶນຕ່າງປະເທດ #ທຸລະກິດຍຸກດິຈິຕອນ
