ລັດຖະບານລາວປະກາດຍຸກໃໝ່ແຫ່ງການພັດທະນາແຮ່ທາດ ປ່ຽນທິດຈາກການ “ຂຸດຄົ້ນແລ້ວສົ່ງອອກແຮ່ດິບ” ສູ່ການປຸງແຕ່ງສ້າງມູນຄ່າເພີ່ມພາຍໃນປະເທດຢ່າງເຕັມຕົວ. ແນໃສ່ອັດຊ່ອງໂຫວ່ການລັກລອບ ແລະ ຍົກລະດັບມາດຕະຖານ ESG ຢ່າງເຂັ້ມງວດ, ເພື່ອປ່ຽນຊັບພະຍາກອນທີ່ລ້ຳຄ່າໃຫ້ກາຍເປັນຜົນປະໂຫຍດສູງສຸດ ແລະ ຍືນຍົງສຳລັບປະເທດຊາດ.
ຕາມການລາຍງານຂອງ ກະຊວງອຸດສາຫະກຳ ແລະ ການຄ້າ, ເມື່ອວັນທີ 31 ກໍລະກົດ 2026 ຜ່ານມາ, ກະຊວງອຸດສາຫະກຳ ແລະ ການຄ້າ (ອຄ) ໄດ້ເປີດກອງປະຊຸມສຳມະນາວິທະຍາສາດ ເພື່ອປຶກສາຫາລືກ່ຽວກັບຮ່າງຄຳສັ່ງວ່າດ້ວຍການປັບປຸງນະໂຍບາຍ ແລະ ເພີ່ມທະວີການຄຸ້ມຄອງການພັດທະນາແຮ່ທາດໃນໄລຍະໃໝ່ ໂດຍໃຫ້ກຽດເປັນປະທານຂອງ ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ ຜູ້ປະຈຳການ.
ພາຍໃນງານ, ທ່ານຮອງນາຍົກລັດຖະມົນຕີ ໄດ້ຍົກໃຫ້ເຫັນເຖິງສະພາບຄວາມເປັນຈິງໃນໄລຍະຜ່ານມາ ທີ່ການພັດທະນາສ່ວນໃຫຍ່ຍັງອີງໃສ່ພຽງແຕ່ການຂຸດຄົ້ນ ແລະ ສົ່ງອອກແຮ່ດິບ ເຊິ່ງເຮັດໃຫ້ປະເທດເສຍໂອກາດໃນການສ້າງມູນຄ່າເພີ່ມ.
ພ້ອມດຽວກັນນັ້ນ, ຂະແໜງດັ່ງກ່າວຍັງປະເຊີນກັບສິ່ງທ້າທາຍຫຼາຍດ້ານ ບໍ່ວ່າຈະເປັນການລັກລອບຂຸດຄົ້ນ, ການຄຸ້ມຄອງທີ່ບໍ່ເປັນເອກະພາບລະຫວ່າງສູນກາງ ແລະ ທ້ອງຖິ່ນ, ການຈັບຈອງເນື້ອທີ່ແລ້ວປະຖິ້ມ, ບັນຫາລົດບັນທຸກເກີນນ້ຳໜັກ ລວມໄປເຖິງຜົນກະທົບຕໍ່ສິ່ງແວດລ້ອມ ແລະ ສັງຄົມ ທີ່ເກີດຈາກການຂຸດຄົ້ນແບບບໍ່ຍືນຍົງ.
ເພື່ອເປັນການແກ້ໄຂບັນຫາທີ່ຮາກຖານ, ລັດຖະບານຈຶ່ງໄດ້ກຳນົດທິດທາງຍຸດທະສາດໃໝ່ ໂດຍຈະຫັນປ່ຽນໄປສູ່ການຊຸກຍູ້ອຸດສາຫະກຳປຸງແຕ່ງ, ການສ້າງຕ່ອງໂສ້ມູນຄ່າພາຍໃນປະເທດ ແລະ ການພັດທະນາອຸດສາຫະກຳຕໍ່ເນື່ອງ.
ເປົ້າໝາຍຫຼັກແມ່ນເພື່ອສ້າງລາຍຮັບທີ່ໝັ້ນຄົງ, ເພີ່ມການຈ້າງງານໃຫ້ປະຊາຊົນ ແລະ ສ້າງພື້ນຖານເສດຖະກິດທີ່ເຂັ້ມແຂງ. ສິ່ງທີ່ໜ້າຈັບຕາໃນຮ່າງນະໂຍບາຍໃໝ່ນີ້ ແມ່ນການຍົກລະດັບມາດຕະຖານການຄັດເລືອກນັກລົງທຶນແບບກ້າວກະໂດດ ເຊິ່ງຕໍ່ໄປນີ້ນັກລົງທຶນຈະບໍ່ພຽງແຕ່ຕ້ອງມີຄວາມພ້ອມດ້ານເຕັກນິກ ແລະ ການເງິນເທົ່ານັ້ນ, ແຕ່ຕ້ອງຜ່ານການປະເມີນມາດຕະຖານດ້ານສິ່ງແວດລ້ອມ, ສັງຄົມ ແລະ ການຄຸ້ມຄອງທີ່ດີ ຫຼື ESG ຢ່າງເຂັ້ມງວດ ເພື່ອຮັບປະກັນວ່າທຸກໂຄງການຈະເປັນການລົງທຶນທີ່ມີຄຸນນະພາບ ແລະ ມີຄວາມຮັບຜິດຊອບຢ່າງແທ້ຈິງ.
ທ່ານ ສະເຫຼີມໄຊ ກົມມະສິດ ໄດ້ເນັ້ນໜັກໃນຕອນທ້າຍວ່າ ຮ່າງຄຳສັ່ງສະບັບໃໝ່ນີ້ ບໍ່ແມ່ນພຽງແຕ່ການເພີ່ມມາດຕະການຄວບຄຸມຊົ່ວຄາວ, ແຕ່ເປັນການວາງຮາກຖານໃໝ່ທັງລະບົບ ໃຫ້ແກ່ການບໍລິຫານຊັບພະຍາກອນແຮ່ທາດຂອງຊາດ. ນີ້ຄືບາດກ້າວສຳຄັນໃນການຫັນໄປສູ່ຄວາມທັນສະໄໝ, ໂປ່ງໃສ ແລະ ໄດ້ມາດຕະຖານສາກົນ ເຊິ່ງບໍ່ພຽງແຕ່ຈະຊ່ວຍປ້ອງກັນການສູນເສຍຊັບພະຍາກອນເທົ່ານັ້ນ, ແຕ່ຍັງຈະເປັນການສ້າງຄວາມເຊື່ອໝັ້ນໃຫ້ນັກລົງທຶນ ແລະ ປົກປ້ອງຜົນປະໂຫຍດອັນສູງສຸດຂອງປະເທດຊາດໃນໄລຍະຍາວ.
#LaoXperts #ຂ່າວເສດຖະກິດລາວ #ອຸດສາຫະກຳແຮ່ທາດ #ນະໂຍບາຍລັດຖະບານ #ການພັດທະນາແບບຍືນຍົງ #ກະຊວງອຸດສາຫະກຳແລະການຄ້າ #ແຮ່ທາດລາວ #ESG
