ລັດຖະບານລາວເດີນໜ້າປະຕິຮູບການບໍລິຫານລັດຄັ້ງສຳຄັນ ເລັ່ງຫັນລະບົບບໍລິການປະຕູດຽວສູ່ດີຈິຕອນ (Smart ODSC) ແລະ ລະບົບຊຳລະເງິນອອນລາຍລວມສູນ. ເປົ້າໝາຍສູງສຸດແມ່ນເພື່ອລຶບລ້າງຄວາມຊັກຊ້າ, ຕັດບັນຫາຄວາມບໍ່ໂປ່ງໃສ ແລະ ຍົກລະດັບຄຸນນະພາບການໃຫ້ບໍລິການແກ່ປະຊາຊົນ-ນັກລົງທຶນຢ່າງແທ້ຈິງ.
ຕາມການລາຍງານຂອງ ຂປລ, ວັນທີ 23 ກໍລະກົດ 2026 ທີ່ນະຄອນຫລວງວຽງຈັນ, ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ ໄດ້ເປັນປະທານກອງປະຊຸມຄັ້ງປະຖົມມະລືກຂອງຄະນະຊີ້ນໍາລະດັບຊາດ ເພື່ອຈັດຕັ້ງປະຕິບັດກົນໄກບໍລິການຂອງລັດຜ່ານປະຕູດຽວ. ກອງປະຊຸມຄັ້ງນີ້ບໍ່ພຽງແຕ່ເປັນການປະກາດເຈດຕະນາລົມອັນແຮງກ້າຂອງພັກ-ລັດ ແຕ່ຍັງເປັນການວາງແຜນປະຕິບັດງານ 5 ປີ (2026-2030) ໂດຍອີງໃສ່ດຳລັດສະບັບໃໝ່ (ເລກທີ 218/ລບ) ເພື່ອເປັນບ່ອນອີງທາງກົດໝາຍທີ່ໜັກແໜ້ນໃນການຂັບເຄື່ອນວຽກງານດັ່ງກ່າວໃຫ້ມີເອກະພາບໃນທົ່ວປະເທດ.
ຕະຫຼອດໄລຍະຫລາຍປີທີ່ຜ່ານມາ, ພາບລວມຂອງລະບົບການບໍລິຫານພາກລັດໃນ ສປປ ລາວ ມັກປະເຊີນກັບສິ່ງທ້າທາຍເລື່ອງຂັ້ນຕອນເອກະສານທີ່ຫຍຸ້ງຍາກ, ໃຊ້ເວລາດົນ ແລະ ຊ່ອງຫວ່າງຄວາມບໍ່ໂປ່ງໃສໃນການເກັບຄ່າທຳນຽມຕ່າງໆ ເຊິ່ງສົ່ງຜົນກະທົບໂດຍກົງຕໍ່ຄຸນນະພາບຊີວິດຂອງປະຊາຊົນ ແລະ ຄວາມເຊື່ອໝັ້ນຂອງນັກລົງທຶນ.
ດັ່ງນັ້ນ, ການຍົກລະດັບກົນໄກປະຕູດຽວເດີມໃຫ້ກາຍເປັນລະບົບອັດສະລິຍະ ຫລື Smart ODSC ຈຶ່ງເປັນກຸນແຈສຳຄັນໃນການແກ້ໄຂບັນຫານີ້ຢ່າງຮາກຖານ. ສິ່ງທີ່ໜ້າຈັບຕາເບິ່ງທີ່ສຸດຄື ການວາງແຜນນຳໃຊ້ລະບົບການເກັບຄ່າບໍລິການ ແລະ ຄ່າທຳນຽມເຂົ້າສູ່ລະບົບອອນລາຍລວມສູນ ຜ່ານແອັບພລິເຄຊັນມືຖື ແລະ ລະບົບທະນາຄານ ເຊິ່ງຈະເປັນການຕັດຊ່ອງຫວ່າງການຈ່າຍເງິນນອກລະບົບຢ່າງເດັດຂາດ ແລະ ຊ່ວຍຮັບປະກັນໃຫ້ລາຍຮັບທຸກກີບໄຫລເຂົ້າສູ່ງົບປະມານແຫ່ງລັດຢ່າງເຕັມເມັດເຕັມໜ່ວຍ.
ບາດກ້າວຕໍ່ໄປຫລັງຈາກນີ້, ທຸກກະຊວງ, ອົງການ ແລະ ອຳນາດການປົກຄອງທ້ອງຖິ່ນໃນຂອບເຂດທົ່ວປະເທດ ຈະຕ້ອງໄດ້ເລັ່ງກຳນົດໜ້າວຽກບໍລິການຂອງຕົນເພື່ອນຳເຂົ້າສູ່ສູນບໍລິການປະຕູດຽວຢ່າງເປັນຮູບປະທຳ.
ຖ້າຫາກຍຸດທະສາດການແບ່ງຂັ້ນ, ແບ່ງສິດ ແລະ ຫັນເປັນດີຈິຕອນນີ້ປະກົດຜົນເປັນຈິງ ຈະບໍ່ພຽງແຕ່ເປັນການສ້າງຄວາມສະດວກສະບາຍໃຫ້ແກ່ປະຊາຊົນຜູ້ມາໃຊ້ບໍລິການເທົ່ານັ້ນ ແຕ່ຍັງເປັນການພິກໂສມໜ້າປະຫວັດສາດການບໍລິຫານລັດ, ຍົກລະດັບດັດຊະນີຄວາມສະດວກໃນການດຳເນີນທຸລະກິດ (Ease of Doing Business) ເພື່ອດຶງດູດການລົງທຶນຈາກຕ່າງຊາດ ແລະ ຊຸກຍູ້ເສດຖະກິດຂອງ ສປປ ລາວ ໃຫ້ກ້າວໄປສູ່ຍຸກດິຈິຕອນຢ່າງເຕັມພາກພູມ.
#LaoXperts #ປະຕິຮູບການບໍລິຫານລັດ #ບໍລິການປະຕູດຽວ #SmartODSC #ສປປລາວ #ດີຈິຕອນລາວ #LaosDigitalTransformation #ລັດຖະບານລາວ
