ສຳນັກຂ່າວຕ່າງປະເທດລາຍງານວ່າ ຜົນການທົດລອງເພື່ອຕິດຕາມຜົນຈາກການທີ່ໃຫ້ພະນັກງານເຮັດວຽກ 4 ມື້ຕໍ່ອາທິດເມື່ອໜຶ່ງປີກ່ອນ, ເຊິ່ງນີ້ຖືວ່າເປັນການທົດລອງເຮັດວຽກ 4 ມື້ຕໍ່ອາທິດທີ່ມີຈຳນວນບໍລິສັດເຂົ້າຮ່ວມຫຼາຍທີ່ສຸດໃນໂລກ.
ໂດຍໂຄງການທົດລອງດັ່ງກ່າວ ໄດ້ມີ 61 ບໍລິສັດໃນປະເທດອັງກິດເຂົ້າຮ່ວມໃນໂຄງການ ເເລະ ມີພະນັກງານປະມານ 2,900 ຄົນອາສາສະໝັກເຂົ້າຮ່ວມນັບຕັ້ງແຕ່ ເດືອນມິຖຸນາຫາເດືອນທັນວາ ປີ 2022 ເປັນຕົ້ນມາ, ເຊິ່ງໃນການທົດລອງດັ່ງກ່າວ ຈະຫຼຸດເວລາເຮັດວຽກຂອງພະນັກງານໃຫ້ເຫຼືອ 80% ຫຼື 4 ມື້ຕໍ່ອາທິດ ເເລະ ຈ່າຍເງິນເດືອນໃຫ້ພະນັກງານເທົ່າເດີມ ແຕ່ພະນັກງານຈະຕ້ອງເຮັດວຽກເຕັມທີ່ຕາມປົກກະຕິ.
ຫຼັງຈາກການທົດລອງໄດ້ສໍາເລັດ 6 ເດືອນເຕັມກໍໄດ້ພົບວ່າ:
– 89% ຂອງບໍລິສັດທີ່ເຂົ້າຮ່ວມໂຄງການໄດ້ຮັກສານະໂຍບາຍຫຼຸດຜ່ອນຊົ່ວໂມງເຮັດວຽກແຕ່ເງິນເດືອນຍັງເທົ່າເດີມ.
– 51% ຂອງບໍລິສັດທີ່ເຂົ້າຮ່ວມປະກາດໃຫ້ພະນັກງານເຮັດວຽກ 4 ມື້ຕໍ່ອາທິດແບບຖາວອນ.
– 100% ຂອງຜູ້ຈັດການລາຍງານວ່າການເຮັດວຽກ 4 ມື້ໃຫ້ຜົນໄດ້ຮັບທີ່ ດີ ຫຼື ດີຫຼາຍ ໃຫ້ແກ່ອົງກອນ.
– 82% ຂອງບໍລິສັດເຫັນວ່ານະໂຍບາຍດັ່ງກ່າວສົ່ງຜົນໃນດ້ານບວກຕໍ່ກັບການເປັນຢູ່ທີ່ດີຂຶ້ນຂອງພະນັກງານ
– 50% ເຫັນວ່າມັນໄດ້ຫຼຸດອັດຕາໃນການລາອອກຈາກວຽກໃຫ້ໜ້ອຍລົງ ເເລະ 32% ເຫັນວ່ານະໂຍບາຍດັ່ງກ່າວເຮັດໃຫ້ຈັດສັນຫາບຸຄະລາກອນໄດ້ດີຂຶ້ນຢ່າງເຫັນໄດ້ຊັດເຈນ.
Juliet Shore, ອາຈານສອນວິຊາສັງຄົມວິທະຍາຂອງວິທະຍາໄລ Boston ທີ່ເປັນຜູ້ຂຽນບົດລາຍງານກ່າວວ່າ ຜົນການຄົ້ນພົບນີ້ໄດ້ສະແດງໃຫ້ເຫັນວ່າ ຂໍ້ດີຂອງການຫຼຸດຜ່ອນຊົ່ວໂມງເຮັດວຽກພົບວ່າ “ເຫັນໄດ້ຊັດເຈນ ແລະ ຍືນຍົງ”
ໂຄງການດັ່ງກ່າວໄດ້ຂັບເຄື່ອນໂດຍທີມງານຄົ້ນຄວ້າ Autonomy ສົມທົບກັບແຄມເປນ 4 Day Week Campaign ແລະ 4 Day Week Global, ປ່ຽນຈາກແບບດັ້ງເດີມ 5 ມື້ເຮັດວຽກ 40 ຊົ່ວໂມງມາເປັນ 4 ມື້ຂອງ 32 ຊົ່ວໂມງທີ່ຍັງເຮັດວຽກ 100% ຄືເກົ່າ ໂດຍບໍ່ມີການຫຼຸດຜ່ອນຄ່າຈ້າງພະນັກງານ.
ສ່ວນການສຳຫຼວດພະນັກງານ ພົບວ່າ ເຂົາເຈົ້າມີຄວາມສຸກ ທັງສຸຂະພາບກາຍ ແລະ ຈິດໃຈ. ລວມທັງຊີວິດສ່ວນຕົວ, ຫຼຸດຜ່ອນ “ການໝົດໄຟ” ຈາກການເຮັດວຽກ, ເຊິ່ງຜົນປະໂຫຍດເຫຼົ່ານີ້ແມ່ນມີຄວາມຍືນຍົງເຖິງແມ່ນວ່າເວລາຈະຜ່ານໄປ 1 ປີ.
ການສໍາຫຼວດຄວາມເຫັນຂອງສາທາລະນະໂດຍ ແຄມເປນ 4 ມື້ຕໍ່ອາທິດ ໃນອັງກິດໄດ້ພົບເຫັນວ່າ 58% ຂອງຄົນທົ່ວໄປຄາດຫວັງໃນການເຮັດວຽກ 4 ມື້ຈະເປັນມາດຕະຖານພາຍໃນປີ 2030.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
