ການເຊື່ອມຕໍ່ທາງລົດໄຟໃນສ່ວນຂອງ ໜອງຄາຍ-ວຽງຈັນ ເຊິ່ງເປັນສ່ວນໜຶ່ງໃນໂຄງການ ລົດໄຟ ຈີນ-ໄທ ຄາດວ່າຈະສຳເລັດໃນປີ 2028, ຕາມການລາຍງານຂອງໜັງສືພິມບາງກອກໂພສ. ການກໍ່ສ້າງພາກນີ້ແມ່ນຢູ່ໃນເສັ້ນທາງເຊື່ອມຕໍ່ທາງລົດໄຟລາວ-ຈີນ, ຄາດຈະເປີດກາລະໂອກາດໃໝ່ເພື່ອຊຸກຍູ້ການຄ້າໃນພາກພື້ນ ແລະ ການເຄື່ອນໄຫວເສດຖະກິດອື່ນໆ.
ໜັງສືພິມ ບາງກອກໂພສ ລາຍງານວ່າ: ໂຄງການດັ່ງກ່າວຈະມີມູນຄ່າປະມານ 3 ຕື້ບາດ ຫຼື ປະມານ 86 ລ້ານໂດລາ ໜອງຄາຍ ຫາ ວຽງຈັນ ໄລຍະທາງ 7,3 ກິໂລແມັດ ເຊິ່ງສຶກສາຄວາມເປັນໄປໄດ້ ຈາກ ທາງລົດໄຟແຫ່ງປະເທດໄທ ເຊິ່ງແຜນງານຄັ້ງສຸດທ້າຍຄາດວ່າ ຈະສຳເລັດໃນທ້າຍປີໜ້ານີ້ ແລະ ຈະເລີ່ມລົງມືສ້າງໃນປີ 2025.
ໄທພວມກ້າວໄປເຖິງເປົ້າໝາຍເຊື່ອມໂຍງລະບົບທາງລົດໄຟກັບໂຄງການລົດໄຟຄວາມໄວສູງບາງກອກ-ໜອງຄາຍ, ເພື່ອແນໃສ່ຊຸກຍູ້ການເຊື່ອມຕໍ່ໃນພາກພື້ນ ແລະ ຄວາມຫວັງດ້ານການຄ້າກັບຈີນຜ່ານທາງລົດໄຟລາວ-ຈີນ.
ສ່ວນທາງລົດໄຟຄວາມໄວສູງໄທ-ຈີນຈະຍາວກວ່າ 600 ກິໂລແມັດຈາກໜອງຄາຍຫາບາງກອກ. ເມື່ອການກໍ່ສ້າງທຸກພາກສ່ວນຂອງທາງລົດໄຟຄວາມໄວສູງຂອງໄທສຳເລັດແລ້ວ, ມັນຈະເລັ່ງລັດການຂົນສົ່ງສິນຄ້າ ແລະ ຜູ້ໂດຍສານໄດ້ຢ່າງໄວວາ ແລະ ທັນການ.
ທາງລົດໄຟລາວ-ຈີນ ແລະ ທາງລົດໄຟຄວາມໄວສູງໄທ-ຈີນ ແມ່ນສ່ວນໜຶ່ງຂອງເສັ້ນທາງລົດໄຟທີ່ໄດ້ວາງໄວ້ໃນຂົງເຂດຄຸນໝິງ-ສິງກະໂປ, ເຊື່ອມຕໍ່ຈີນກັບລາວ, ໄທ, ມາເລເຊຍ ແລະ ສິງກະໂປ.
ທາງລົດໄຟລາວ-ຈີນທີ່ແລ່ນລະຫວ່າງນະຄອນຄຸນໝິງຂອງຈີນກັບນະຄອນຫຼວງວຽງຈັນ ຂອງລາວທີ່ເປີດບໍລິການໃນທ້າຍປີ 2021 ທີ່ຜ່ານມາ ແລະ ໄດ້ກາຍເປັນປະຕູການຄ້າທີ່ສຳຄັນລະຫວ່າງປະເທດອາຊີຕາເວັນອອກສຽງໃຕ້ກັບຈີນ.
ທາງລົດໄຟຂົນສົ່ງສິນຄ້າຈາກອາຊີໄປຍັງຢູໂຣບໃນເວລາສັ້ນກວ່າ, ເຮັດໃຫ້ບໍລິສັດສົ່ງອອກມີໂອກາດສາມາດຂະຫຍາຍທຸລະກິດຢູ່ພາກພື້ນໄດ້ຫຼາຍກວ່າ. ໂດຍຜ່ານເຄືອຂ່າຍທາງລົດໄຟຈີນ-ຢູໂຣບ, ການຂົນສົ່ງສິນຄ້າຈາກອາຊີຕາເວັນອອກສຽງໃຕ້ສາມາດໄປຮອດຕະຫຼາດຢູໂຣບໃນ 15-22 ມື້ ເຊິ່ງກົງກັນຂ້າມກັບ 45 ມື້ຖ້າຂົນສົ່ງທາງທະເລ.
ທ່ານ ວິໄລສຸວັນ ນັກທຸລະກິດຊາວໄທ ທ່ານໜຶ່ງ ກ່າວວ່າ: ສປປ ລາວ ມີໂອກາດທີ່ດີ ໃນການຊຸກຍູ້ການເຕີບໂຕທາງດ້ານເສດຖະກິດ ຫຼັງຈາກການເປີດທາງລົດດໄຟ ລາວ-ຈີນ ເນື່ອງຈາກວ່າປະເທດລາວປັດຈຸບັນໄດ້ຈຸດເຊື່ອມຕໍ່ຈີນໃຫ້ກັບບັນດາປະເທດໃນພາກພື້ນ. ລາວເປັນສ່ວນໜຶ່ງຂອງເຂດການຄ້າເສລີອາຊຽນ, ທີ່ມີພົນລະເມືອງ 600 ລ້ານກວ່າຄົນ, ໃນນັ້ນມີ 1,4 ຕື້ຄົນຢູ່ຈີນ, ແລະ ທາງລົດໄຟລາວ-ຈີນໃນປັດຈຸບັນໄດ້ຂະຫຍາຍໄປຍັງຢູໂຣບອີກເຂົ້າເຖິງຕະຫຼາດໄດ້ອີກກວ່າ 600 ລ້ານຄົນ”.
ທ່ານ ວິໄລສຸວັນ ກ່າວອີກວ່າ: ຖ້າລາວນຳໃຊ້ທາງລົດໄຟລາວ-ຈີນທີ່ເຊື່ອມຕໍ່ອາຊີ ແລະ ຢູໂຣບຢ່າງເຕັມທີ່, ໃນໄລຍະຍາວລາວຈະກາຍເປັນປະເທດທີ່ພັດທະນາຄືສິງກະໂປ. ຄືກັນກັບສິງກະໂປເປັນສູນກາງທາງທະເລລະຫວ່າງອາຊີ ແລະ ຢູໂຣບ, ລາວອາດຈະເປັນສູນກາງທາງລົດໄຟລະຫວ່າງອາຊີ ແລະ ຢູໂຣບ.”
ສິນຄ້າທີ່ສົ່ງຜ່ານທາງລົດໄຟຈາກລາວ ປະກອບມີ ຢາງພາລາ, ມັນຕົ້ນ, ກາເຟ, ແຮ່ທາດ ເປັນຕົ້ນ, ໃນຂະນະທີ່ສິນຄ້າອຸປະໂພກທົ່ວໄປ, ຊິ້ນສ່ວນເຄື່ອງຈັກ, ຊິ້ນສ່ວນລົດໃຫຍ່ ແລະ ສິນຄ້າເອເລັກໂຕຣນິກ ແມ່ນສົ່ງມາຈາກປະເທດຈີນ.
ຜູ້ຊ່ຽວຊານລາວເວົ້າວ່າ ດຽວນີ້ປະເທດຄວນສຸມໃສ່ການປຸງແຕ່ງຜະລິດຕະພັນກະເສດ ແລະ ແຮ່ທາດເພື່ອສົ່ງອອກຜ່ານທາງລົດໄຟລາວ-ຈີນ ແລະ ຫຼຸດຜ່ອນປະລິມານສິນຄ້າທີ່ບໍ່ໄດ້ປຸງແຕ່ງທີ່ສົ່ງອອກໃນປັດຈຸບັນ ເຊິ່ງມັນຈະເປັນການເພີ່ມມູນຄ່າໃຫ້ແກ່ສິນຄ້າສົ່ງອອກ ແລະ ສ້າງລາຍຮັບເປັນເງິນຕາຕ່າງປະເທດທີ່ຈຳເປັນຫຼາຍໃຫ້ແກ່ລາວ.
https://www.bangkokpost.com/thailand/general/2705848
ຮູບພາບຈາກ The B1M
ຕິດຕາມຂ່າວທັງໝົດຈາກ LaoX: https://laox.la/all-posts/