ໂຮ່ຈີມິນໂສມໃໝ່, ຂັບເຄື່ອນເສດຖະກິດດ້ວຍເຕັກໂນໂລຊີ ແລະ ນະວັດຕະກຳ

ຫຼັງຈາກ 40 ປີແຫ່ງການປ່ຽນແປງໃໝ່, ນະຄອນໂຮ່ຈີມິນພວມກ້າວເຂົ້າສູ່ຍຸກທອງແຫ່ງການພັດທະນາ ໂດຍຫັນປ່ຽນຮູບແບບເສດຖະກິດໄປສູ່ການຂັບເຄື່ອນດ້ວຍເຕັກໂນໂລຊີ, ນະວັດຕະກຳ ແລະ ຜະລິດຕະພາບຂັ້ນສູງ. ເປົ້າໝາຍສຳຄັນແມ່ນການບູລະນາການຊັບພະຍາກອນທຶນ, ໂຄງລ່າງພື້ນຖານ ແລະ ມັນສະໝອງ ເພື່ອຍົກລະດັບຂີດຄວາມສາມາດໃນການແຂ່ງຂັນລະດັບໂລກ ເຊິ່ງຈະສົ່ງຜົນກະທົບຢ່າງມະຫາສານຕໍ່ການເຕີບໂຕແບບກ້າວກະໂດດ ແລະ ຍືນຍົງຂອງພາກພື້ນ.

ຕາມການລາຍງານຂອງ Vietnamnews, ຈາກຈຸດເລີ່ມຕົ້ນຂອງນະໂຍບາຍ Doi Moi ໃນປີ 1986 ທີ່ປົດລັອກຂໍ້ຈຳກັດທາງການຄ້າ, ມາຮອດປັດຈຸບັນ ນະຄອນໂຮ່ຈີມິນໄດ້ຍົກລະດັບຕົນເອງຢ່າງສິ້ນເຊີງ ໂດຍສະເພາະການປະກົດຕົວຂອງສູນກາງເຕັກໂນໂລຊີຂະໜາດໃຫຍ່. 

ເຂດເຕັກໂນໂລຊີຂັ້ນສູງໄຊງ່ອນ (Saigon Hi-Tech Park) ໄດ້ສ້າງມູນຄ່າຜະລິດຕະພັນເຕັກໂນໂລຊີສູງກວ່າ 203 ຕື້ໂດລາສະຫະລັດ ແລະ ສ້າງວຽກເຮັດງານທຳນັບໝື່ນຕຳແໜ່ງ, ເຊິ່ງປັດຈຸບັນສະຖານທີ່ແຫ່ງນີ້ບໍ່ໄດ້ເປັນພຽງແຕ່ພື້ນທີ່ໃຫ້ເຊົ່າໂຮງງານອຸດສາຫະກຳອີກຕໍ່ໄປ ແຕ່ໄດ້ກາຍເປັນລະບົບນິເວດທີ່ສຳຄັນສຳລັບບໍລິສັດເຕັກໂນໂລຊີລະດັບໂລກ. 

ການປ່ຽນແປງດັ່ງກ່າວສະທ້ອນໃຫ້ເຫັນເຖິງການກ້າວຂ້າມຈາກການຮັບຈ້າງຜະລິດ ແລະ ປະກອບສ່ວນສ່ວນ ໄປສູ່ການເປັນເຈົ້າຂອງເຕັກໂນໂລຊີຫຼັກ ເຊິ່ງສົ່ງຜົນໃຫ້ຜະລິດຕະພາບລວມ (TFP) ປະກອບສ່ວນເຂົ້າໃນການເຕີບໂຕທາງເສດຖະກິດຂອງນະຄອນເຖິງ 59% ໃນປີ 2025.

ການຫັນປ່ຽນນີ້ບໍ່ໄດ້ເກີດຂຶ້ນພຽງແຕ່ໃນມິຕິຂອງເຕັກໂນໂລຊີເທົ່ານັ້ນ ແຕ່ຍັງລວມເຖິງການປະຕິຮູບດ້ານນະໂຍບາຍ ແລະ ໂຄງສ້າງພື້ນຖານລະດັບມະຫາພາກ. 

ການຄວບລວມແຂວງບິ່ງເຢືອງ ແລະ ບາເຣຍ-ຫວຸງເຕົ່າ ເຂົ້າກັບນະຄອນໂຮ່ຈີມິນ ໃນເດືອນກໍລະກົດ 2025 ທີ່ຜ່ານມາ ໄດ້ສ້າງພື້ນທີ່ເສດຖະກິດຂະໜາດໃຫຍ່ທີ່ເຊື່ອມໂຍງທັງສູນກາງການເງິນ, ອຸດສາຫະກຳເຕັກໂນໂລຊີສູງ, ທ່າເຮືອ ແລະ ໂລຈິສຕິກເຂົ້າດ້ວຍກັນ. 

ພ້ອມດຽວກັນນັ້ນ, ກົດໝາຍວ່າດ້ວຍການພັດທະນາຕົວເມືອງສະບັບໃໝ່ທີ່ຈະມີຜົນບັງຄັບໃຊ້ໃນເດືອນຕຸລາ 2026 ຍັງຈະຊ່ວຍທະລາຍຂໍ້ຈຳກັດເກົ່າໆ ເປີດທາງໃຫ້ມີການທົດລອງໂມເດວໃໝ່ໆ ເຊັ່ນ: ສູນກາງການເງິນສາກົນຫວຽດນາມ ແລະ ເຂດການຄ້າເສລີ ກ໋າຍແມັບຮະ (Cái Mép Hạ) ເພື່ອເຮັດໜ້າທີ່ເປັນໂຄງລ່າງພື້ນຖານໃນການເຊື່ອມຕໍ່ກະແສທຶນເຂົ້າກັບລະບົບຕ່ອງໂສ້ການຜະລິດ ແລະ ການຄ້າລະດັບໂລກ.

ແນ່ນອນວ່າການຂະຫຍາຍຕົວຂອງໂຄງລ່າງພື້ນຖານ ແລະ ກະແສເງິນລົງທຶນຕ່າງປະເທດທີ່ຫຼັ່ງໄຫຼເຂົ້າມາກວ່າ 10 ຕື້ໂດລາສະຫະລັດໃນຊ່ວງ 8 ເດືອນທຳອິດຂອງປີ 2026 ຈະບໍ່ສາມາດສ້າງຄວາມຍືນຍົງໄດ້ຫາກປາສະຈາກຊັບພະຍາກອນມະນຸດທີ່ມີຄຸນນະພາບ. 

ນະຄອນໂຮ່ຈີມິນຈຶ່ງໄດ້ທຸ້ມເທງົບປະມານຈຳນວນມະຫາສານເຂົ້າໃນການຄົ້ນຄວ້າ ແລະ ພັດທະນາ (R&D) ພ້ອມທັງເລັ່ງຜະລິດບຸກຄະລາກອນຊ່ຽວຊານສະເພາະດ້ານ ເຊັ່ນ: ເຊມິຄອນດັກເຕີ, ໄມໂຄຣຊິບ ແລະ ປັນຍາປະດິດ (AI). 

ສິ່ງທ້າທາຍໃນປັດຈຸບັນຈຶ່ງບໍ່ແມ່ນພຽງແຕ່ການຜະລິດຄົນໃຫ້ພໍກັບຄວາມຕ້ອງການຂອງຕະຫຼາດ ແຕ່ແມ່ນການສ້າງກຳລັງແຮງງານທີ່ສາມາດສ້າງນະວັດຕະກຳ ແລະ ປ່ຽນຄວາມຮູ້ໃຫ້ກາຍເປັນມູນຄ່າທາງເສດຖະກິດ ເພື່ອຮັບປະກັນວ່າທຸກການລົງທຶນຈະຖືກປ່ຽນເປັນຜະລິດຕະພາບ ແລະ ຂີດຄວາມສາມາດໃນການແຂ່ງຂັນທີ່ແທ້ຈິງໃນອະນາຄົດ.

#LaoXperts #HoChiMinhCity #VietnamEconomy #TechInnovation #EconomicGrowth #FDI #SmartCity #Productivity