ເລັ່ງສ້າງ ມາດຕະຖານ ການດຳເນີນທຸລະກິດຢ່າງມີຄວາມຮັບຜິດຊອບ ກຽມພ້ອມແຂ່ງຂັນໃນຕະຫຼາດໂລກ
ສປປ ລາວ ຜະນຶກກຳລັງສາມຝ່າຍ ເລັ່ງສ້າງບົດແນະນຳແຫ່ງຊາດວ່າດ້ວຍການ ການດຳເນີນທຸລະກິດຢ່າງມີຄວາມຮັບຜິດຊອບ (RBC) ຍົກລະດັບມາດຕະຖານແຮງງານ ແລະ ສິ່ງແວດລ້ອມ.
ໂດຍ ເປົ້າໝາຍສຳຄັນແມ່ນເພື່ອສ້າງພູມຄຸ້ມກັນ ແລະ ກະກຽມຄວາມພ້ອມໃຫ້ພາກທຸລະກິດລາວ ສາມາດແຂ່ງຂັນພ້ອມທັງຮັກສາຖານລູກຄ້າໃນຕະຫຼາດສາກົນໄດ້ ໃນໄລຍະທີ່ປະເທດກຳລັງກ້າວພົ້ນຈາກສະຖານະດ້ອຍພັດທະນາ (LDC).
ຕາມການລາຍງານຂອງ ສະພາການຄ້າ ແລະ ອຸດສາຫະກຳແຫ່ງຊາດລາວ, ໃນອາທິດທີ່ທີ່ຜ່ານມາ, ສະພາການຄ້າ ແລະ ອຸດສາຫະກຳແຫ່ງຊາດລາວ (ສຄອຊ) ໄດ້ເປັນເຈົ້າພາບຈັດກອງປະຊຸມປຶກສາຫາລືສາມຝ່າຍຄັ້ງປະຫວັດສາດ ເຊິ່ງເປັນການຈັບມືກັນລະຫວ່າງ ພາກລັດ (ກະຊວງແຮງງານ ແລະ ສະຫວັດດີການສັງຄົມ), ຕົວແທນຜູ້ໃຊ້ແຮງງານ (ສຄອຊ), ຕົວແທນຜູ້ອອກແຮງງານ (ສູນກາງສະຫະພັນກຳມະບານລາວ) ໂດຍໄດ້ຮັບການສະໜັບສະໜູນຈາກອົງການແຮງງານສາກົນ (ILO).
ກອງປະຊຸມຄັ້ງນີ້ໄດ້ເປີດເວທີໃຫ້ທຸກພາກສ່ວນໄດ້ມາລະດົມສະໝອງ ແລະ ແລກປ່ຽນທັດສະນະຢ່າງກົງໄປກົງມາ ເພື່ອຮ່ວມກັນອອກແບບບົດແນະນຳແຫ່ງຊາດວ່າດ້ວຍ RBC ທີ່ບໍ່ພຽງແຕ່ອີງຕາມມາດຕະຖານສາກົນ ແຕ່ຕ້ອງຖືກປັບແຕ່ງໃຫ້ເຂົ້າກັບບໍລິບົດ, ຄວາມຕ້ອງການ ແລະ ຂໍ້ຈຳກັດຂອງທຸລະກິດລາວ ໂດຍສະເພາະກຸ່ມຈຸນລະວິສາຫະກິດ ແລະ ຂະໜາດນ້ອຍ-ກາງ (MSMEs) ໃຫ້ສາມາດເຂົ້າໃຈງ່າຍ ແລະ ນຳໄປປະຕິບັດໄດ້ຈິງ.
ໃນກອງປະຊຸມ, ທ່ານ ປອ ໄຊບັນດິດ ຣາຊະພົນ ຮອງປະທານ ສຄອຊ ໄດ້ເນັ້ນຢໍ້າເຖິງຄວາມຈຳເປັນຮີບດ່ວນຂອງການສ້າງມາດຕະຖານນີ້ ເນື່ອງຈາກການດຳເນີນທຸລະກິດໃນຍຸກປັດຈຸບັນ ບໍ່ສາມາດເບິ່ງຂ້າມຜົນກະທົບຕໍ່ຊຸມຊົນ, ສິດທິແຮງງານ ແລະ ສິ່ງແວດລ້ອມໄດ້ອີກຕໍ່ໄປ.
ປະເດັນນີ້ຍິ່ງທະວີຄວາມສຳຄັນຂຶ້ນໃນຍຸກປ່ຽນຜ່ານ ເຊິ່ງ ທ່ານ ວິບູນ ສິດທິມໍລະດາ ຄະນະບໍລິຫານງານ ສຄອຊ ໄດ້ຊີ້ໃຫ້ເຫັນວ່າ ໃນຂະນະທີ່ ສປປ ລາວ ກຳລັງກະກຽມກ້າວພົ້ນຈາກສະຖານະປະເທດດ້ອຍພັດທະນາ (LDC), ເງື່ອນໄຂການຄ້າ ແລະ ສິດທິພິເສດຕ່າງໆໃນຕະຫຼາດໂລກອາດມີການປ່ຽນແປງ. ດັ່ງນັ້ນ, ການທີ່ວິສາຫະກິດລາວສາມາດສະແດງໃຫ້ເຫັນເຖິງຄວາມໂປ່ງໃສ ແລະ ຄວາມຮັບຜິດຊອບຜ່ານຫຼັກການ RBC ຈະກາຍເປັນ “ໜັງສືຜ່ານແດນ” ໃບສຳຄັນທີ່ຈະຊ່ວຍສ້າງຄວາມເຊື່ອໝັ້ນໃຫ້ກັບຄູ່ຄ້າ, ປົກປ້ອງໂອກາດໃນການເຂົ້າເຖິງຕະຫຼາດໃໝ່ໆ ແລະ ຍົກລະດັບຂີດຄວາມສາມາດໃນການແຂ່ງຂັນຂອງຊາດຢ່າງຍືນຍົງ.
ເພື່ອຮັບປະກັນໃຫ້ບົດແນະນຳດັ່ງກ່າວບໍ່ເປັນພຽງແຕ່ເອກະສານເທິງໜ້າເຈ້ຍ, ທີ່ປະຊຸມໄດ້ເຫັນດີໃຫ້ມີການສ້າງຕັ້ງກຸ່ມ “ຜູ້ຕາງໜ້າ RBC” (RBC Champions) ຂຶ້ນ ເພື່ອເຮັດໜ້າທີ່ເປັນກົນໄກຫຼັກໃນການຂັບເຄື່ອນນະໂຍບາຍ.
ບາດກ້າວຕໍ່ຈາກນີ້ ພາຍໃຕ້ການຊ່ວຍເຫຼືອດ້ານວິຊາການຈາກບໍລິສັດທີ່ປຶກສາ SSI, ຂະບວນການດັ່ງກ່າວຈະສືບຕໍ່ລົງເລິກໃນການເກັບກຳຂໍ້ມູນ, ຮັບຟັງສຽງສະທ້ອນຈາກພາກເອກະຊົນ, ຮ່າງເນື້ອໃນ ແລະ ນຳໄປທົດລອງໃຊ້ຕົວຈິງ. ສຄອຊ ຈະສືບຕໍ່ເປັນແກນນຳຫຼັກໃນການເຊື່ອມປະສານສຽງຂອງພາກທຸລະກິດເຂົ້າສູ່ຂະບວນການສາມຝ່າຍ ເພື່ອໃຫ້ບົດແນະນຳ RBC ແຫ່ງຊາດສະບັບນີ້ ກາຍເປັນເຂັມທິດນຳທາງທີ່ຊ່ວຍໃຫ້ທຸລະກິດລາວເຕີບໃຫຍ່ຢ່າງມີຄຸນນະພາບ ແລະ ເປັນທີ່ຍອມຮັບໃນເວທີສາກົນ.
#LaoXperts #RBCLaos #ທຸລະກິດຍືນຍົງ #LNCCI #ILO #MSMEs #ການຄ້າລາວ #LDCGraduation #ເສດຖະກິດລາວ #ແຮງງານລາວ
