ເມື່ອບໍ່ດົນມານີ້, ຄະນະກໍາມະການທະນາຄານ ແລະ ຫຼັກຊັບແຫ່ງຊາດ (CNBS) ຂອງປະເທດຮອນດູຣັສໄດ້ສະເໜີຮ່າງກົດໝາຍສັ່ງຫ້າມສະຖາບັນການເງິນຊື້ຂາຍສິນຊັບດິຈິຕອນ ໂດຍມີຈຸດປະສົງເພື່ອຮັກສາສະຖຽນລະພາບ ແລະ ຄວາມປອດໄພຂອງລະບົບການເງິນໃນປະເທດ. ເຊິ່ງນີ້ແມ່ນກົງກັນຂ້າມກັບຫຼາຍປະເທດທົ່ວໂລກທີ່ໄດ້ມີການຍອມຮັບເອົາ cryptocurrencies ເພີ່ມຂຶ້ນເຊັ່ນ: ການເປີດຕົວກອງທຶນ Bitcoin ETF ຂອງສະຫະລັດ…
ສຳລັບການຕັດສິນໃຈຂອງ CNBS ໃນຄັ້ງນີ້ເເມ່ນເກີດຂຶ້ນຈາກການຂາດກົດລະບຽບກ່ຽວກັບ cryptocurrencies ໃນປະເທດຮອນດູຣັສ, ເມື່ອບໍ່ມີກົດລະບຽບທີ່ຊັດເຈນ ກໍຈະເຮັດໃຫ້ຜູ້ໃຊ້ມີຄວາມສ່ຽງຕໍ່ການສໍ້ໂກງ ແລະ ກິດຈະກໍາທີ່ຜິດກົດໝາຍອື່ນໆເຊັ່ນ: ການຟອກເງິນ. ນອກຈາກນີ້ຍັງໄດ້ມີການຍົກໃຫ້ເຫັນເຖິງຄວາມກັງວົນກ່ຽວກັບການດຳເນີນທຸລະກິດ cryptocurrency ແບບ decentralized, ເຊິ່ງມັນເປັນການຍາກສໍາລັບໜ່ວຍງານຄຸ້ມຄອງດູເເລໃນທ້ອງຖິ່ນໃນການຕິດຕາມກິດຈະກຳເຫຼົ່ານີ້.
ດ້ວຍເຫດນີ້, CNBS ຈຶ່ງໄດ້ສັ່ງຫ້າມບໍ່ໃຫ້ສະຖາບັນການເງິນທີ່ບໍ່ໄດ້ຮັບອະນຸມັດຈາກທະນາຄານກາງຮອນດູຣັສ ມີສ່ວນຮ່ວມໃນການຄຸ້ມຄອງ Cryptocurrencies, tokens ຫຼື ສິນຊັບດິຈິຕອນອື່ນໆທີ່ຄ້າຍຄືກັນ. ໂດຍມາດຕະການເຫຼົ່ານີ້ຈະຖືກນຳໃຊ້ເພື່ອຕິດຕາມການເຮັດທຸລະກຳທາງການເງິນຢ່າງໃກ້ຊິດ ແລະ ເພື່ອໃຫ້ໝັ້ນໃຈວ່າຂະແໜງການເງິນຂອງປະເທດຈະຍັງຄົງສະຖຽນລະພາບໄວ້. ເຮັດໃຫ້ການເຄື່ອນໄຫວຂອງຮອນດູຣັສໃນຄັ້ງນີ້ສວນທາງກັບຫຼາຍປະເທດທີ່ເປີດກວ້າງໃນການຊື້ຂາຍ cryptocurrencies ແລະ ການສຶກສາກ່ຽວກັບເຕັກໂນໂລຊີ blockchain.
ການຫ້າມດັ່ງກ່າວໄດ້ດຶງດູດການວິພາກວິຈານຢ່າງຫຼວງຫຼາຍ. ບາງຄົນກໍຍ້ອງຍໍຄວາມລະມັດລະວັງຂອງລັດຖະບານໃນການປົກປ້ອງນັກລົງທຶນຈາກ crypto. ໃນຂະນະທີ່ຄົນອື່ນໆ ກໍໄດ້ວິຈານວ່າການຫ້າມກ່າວວ່າອາດຈະຂັດຂວາງການສ້າງສັນນະວັດຕະກຳ ແລະ ຈໍາກັດການມີສ່ວນຮ່ວມຂອງຮອນດູຣັສໃນເສດຖະກິດດິຈິຕອນທົ່ວໂລກ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/