ເບິ່ງຄືວ່າ Libertarian Javier Milei ປະທານາທິບໍດີຂອງອາເຈນຕິນາຄົນໃໝ່ທີ່ມີແນວຄິດແບບເປີດກວ້າງ ໄດ້ອອກມາຫຼຸດກຳແພງລະຫວ່າງການເກັບພາສີ crypto ອີກຄັ້ງ, ຫຼັງຈາກທີ່ລັດຖະບານໄດ້ປະກາດວ່າຈະເປີດໂອກາດໃຫ້ຜູ້ຖືຄອງ crypto ສາມາດລົງທະບຽນໃຫ້ສິນຊັບຕົນເອງ ແລະ ສາມາດຊໍາລະບັນຊີໃຫ້ຖືກຕ້ອງຕາມກົດໝາຍໄດ້.
ໃນວັນທີ 27 ທັນວາທີ່ຜ່ານມາ ສະພາແຫ່ງຊາດອາເຈນຕິນາໄດ້ປະກາດໃຊ້ຮ່າງກົດໝາຍການປະຕິຮູບດ້ານພາສີ, ແຮງງານ, ອາຊະຍາກຳ ແລະ ພະລັງງານຫຼາຍສະບັບ ເຊິ່ງໃນຮ່າງກົດໝາຍດັ່ງກ່າວໄດ້ມີການກ່າວເຖິງຂັ້ນຕອນໃນການຊໍາລະພາສີ crypto ຈະຊ່ວຍໃຫ້ຜູ້ເສຍພາສີສາມາດເຂົ້າມາລົງທະບຽນສິນຊັບຂອງເຂົາເຈົ້າໄດ້ໂດຍບໍ່ຈຳເປັນຕ້ອງເປີດເຜີຍແຫຼ່ງທີ່ມາຂອງສິນຊັບ.
ໂດຍຜູ້ເສຍພາສີທັງໝົດຈໍາເປັນຕ້ອງຈ່າຍພາສີໂດຍອີງໃສ່ອັດຕາພາສີຊັບສິນທີ່ 5% ຫາກຜູ້ຖືປະກາດວ່າຈະຖືຄອງ crypto ພາຍໃນທ້າຍເດືອນມີນາ 2024 ນີ້, ແລະ ໃນກໍລະນີທີ່ຕ້ອງເສຍພາສີ 10% ແມ່ນຜູ້ທີ່ຖືຄອງ crypto ມາແລ້ວຕັ້ງແຕ່ເດືອນເມສາຈົນເຖິງທ້າຍເດືອນມິຖຸນາ 2024 ແລະ ຜູ້ທີ່ຕ້ອງເສຍພາສີ 15% ແມ່ນຜູ້ທີ່ຖືຄອງ crypto ມາຕັ້ງແຕ່ເດືອນກໍລະກົດຈົນເຖິງທ້າຍເດືອນກັນຍາ.
ເຊິ່ງກ່ອນໜ້ານີ້, Diana Mondino ລັດຖະມົນຕີການຕ່າງປະເທດໄດ້ອອກມາກ່າວວ່າ ດຳລັດສະບັບນີ້ແມ່ນມີເປົ້າໝາຍໃນການປະຕິຮູບເສດຖະກິດ ແລະ ອະນຸຍາດໃຫ້ສາມາດນຳໃຊ້ crypto ເຂົ້າໃນການໃຊ້ຈ່າຍປະຈໍາວັນພາຍໃຕ້ເງື່ອນໄຂສະເພາະໃດໜຶ່ງ. ເຊິ່ງນີ້ແມ່ນສອດຄ່ອງກັບຄໍາສັ່ງທີ່ຈະຟື້ນຟູເສດຖະກິດຂອງອາເຈນຕິນາທີ່ໄດ້ປະກາດໃນວັນທີ 20 ທັນວາທີ່ຜ່ານມາ. ເຖິງແມ່ນວ່າໃນການປະກາດດັ່ງກ່າວຈະບໍ່ໄດ້ກ່າວເຖິງ crypto ໂດຍກົງ ແຕ່ກໍໄດ້ອະນຸຍາດໃຫ້ລູກໜີ້ສາມາດຊຳລະໃນສະກຸນເງິນທີ່ບໍ່ໄດ້ຮັບການຍອມຮັບວ່າເປັນເງິນທີ່ຊຳລະໄດ້ຕາມກົດໝາຍໃນອາເຈນຕິນາໄດ້.
ສຳລັບການເຄື່ອນໄຫວທັງໝົດນີ້ແມ່ນເກີດຂຶ້ນຈາກຄວາມຕ້ອງການຂອງປະທານາທິບໍດີອາເຈນຕິນາຄົນໃໝ່ທີ່ຕ້ອງການແກ້ໄຂບັນຫາໄພເງິນເຟີ້ພາຍໃນປະເທດ, ໂດຍເຂົາໄດ້ຍົກຍ້ອງໃຫ້ bitcoin ວ່າເປັນເງິນທີ່ຈະສົ່ງຄືນມູນຄ່າໃຫ້ກັບພາກເອກະຊົນ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
