ໃນວັນທີ 29 ມັງກອນ, ສຳນັກງານຕ່າງປະເທດໄດ້ມີການລາຍງານວ່າ ສານຮ່ອງກົງໄດ້ສັ່ງໃຫ້ບໍລິສັດ China Evergrande Group ເຊິ່ງເປັນບໍລິສັດອະສັງຫາລິມະຊັບຍັກໃຫຍ່ຂອງຈີນ ໃຫ້ຊຳລະໜີ້ສິນທັງໝົດລວມຫຼາຍກວ່າ 300 ຕື້ໂດລາສະຫະລັດ ດ້ວຍການຍົກເລີກກິດຈະການ Evergrande. ໂດຍການເຄື່ອນໄຫວໃນຄັ້ງນີ້ ໄດ້ສົ່ງຄື້ນຄວາມກັງວົນໄປທົ່ວຕະຫຼາດການເງິນຂອງຈີນທີ່ອ່ອນແອຢູ່ແລ້ວໃຫ້ຮຸນແຮງຍິ່ງຂຶ້ນ ໃນຂະນະທີ່ຈີນກຳລັງພະຍາຍາມແກ້ໄຂບັນຫາໜີ້ສິນໃນຂະແໜງອະສັງຫາລິມະຊັບຂອງຕົນ.
ໂດຍການຕັດສິນໃຈໃນຄັ້ງນີ້ເກີດຂຶ້ນຫຼັງຈາກທີ່ບໍລິສັດໄດ້ພະຍາຍາມປັບໂຄງສ້າງທີ່ຊັບຊ້ອນ ເນື່ອງຈາກມີໜ່ວຍງານທີ່ກ່ຽວຂ້ອງຫຼາຍຝ່າຍແຕ່ກໍບໍ່ສໍາເລັດ ແລະ ການຊັກຊ້າໃນການຊໍາລະໜີ້ພັນທະບັດມາເປັນເວລາຫຼາຍປີ, ເຊິ່ງນີ້ໄດ້ສະແດງໃຫ້ເຫັນເຖິງ ເຄື່ອງໝາຍສຳຄັນໃນວິກິດການທີ່ຢຶດຄອງຂະແໜງອະສັງຫາລິມະຊັບຂອງຈີນ ແລະ ບັ່ນທອນຄວາມໝັ້ນຄົງທາງເສດຖະກິດໃນວົງກວ້າງ.
ຜູ້ພິພາກສາ Linda Chan ໄດ້ກ່າວວ່າ “ເຖິງເວລາທີ່ສານຈະຕ້ອງບອກວ່າ ພໍແລ້ວ” ຫຼັງຈາກທີ່ Evergrande ລົ້ມເຫຼວໃນການແກ້ໄຂບັນຫາໃນໄລຍະ 18 ເດືອນທີ່ຜ່ານມາ.
ຍິ່ງໄປກວ່ານັ້ນ, ລາຄາຮຸ້ນຂອງ China Evergrande ໄດ້ຫຼຸດລົງຫຼາຍເຖິງ -20% ກ່ອນທີ່ຈະມີການຕັດສິນຄະດີ, ການຊື້ຂາຍໃນ Evergrande ແລະ ບໍລິສັດຍ່ອຍໃນເຄືອຖືກໂຈະໄວ້ ພາຍຫຼັງຈາກຄໍາຕັດສິນ. ນີ້ເຮັດໃຫ້ Evergrande, ເຊິ່ງມີຊັບສິນ 240 ຕື້ໂດລາ ມີຄວາມສ່ຽງທີ່ຈະສົງຜົນກະທົບຕໍ່ຕະຫຼາດຮຸ້ນ ແລະ ອະສັງຫາລິມະຊັບຂອງຈີນ.
ເນື່ອງຈາກຕະຫຼາດຮຸ້ນຂອງຈີນຍັງຄົງອ່ອນແອ ເຖິງວ່າຈະມີເມັດເງິນໄຫຼເຂົ້າມາເປັນຈຳນວນຫຼວງຫຼາຍໃນສອງສາມມື້ທີ່ຜ່ານມາ. ແຕ່ຕະຫຼາດອະສັງຫາລິມະຊັບຍັງຢູ່ໃນໄລຍະທີ່ຕົກຕໍ່າທີ່ສຸດໃນຮອບ 9 ປີ ແລະ ຕະຫຼາດຮຸ້ນທີ່ຕົກຕໍ່າທີ່ສຸດໃນຮອບ 5 ປີ ອາດກາຍເປັນປັດໄຈທີ່ມີຄວາມສ່ຽງຕໍ່ການເຕີບໂຕຂອງເສດຖະກິດ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
