ໃນວັນທີ 29 ມີນາ 2023, ສະຫາຍ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຄຳນັບຂອງ ສະຫາຍ ຫວັງ ໜິງ ເລຂາພັກແຂວງຢຸນນານ ພ້ອມດ້ວຍຄະນະ, ໃນໂອກາດທີ່ມາຢ້ຽມຢາມ ແລະ ເຮັດວຽກຢູ່ ສປປ ລາວ ແຕ່ວັນທີ 29 ມີນາ ຫາ 1 ເມສາ 2023.
ໃນໂອກາດດັ່ງກ່າວ, ສະຫາຍ ສອນໄຊ ສີພັນດອນ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ ຄະນະຜູ້ແທນແຂວງຢຸນນານ ທີ່ໄດ້ມາຢ້ຽມຢາມ ສປປ ລາວ ໃນຄັ້ງນີ້ ແລະ ຖືໂອກາດນີ້ ສະແດງຄວາມຊົມເຊີຍ ຕໍ່ຜົນສໍາເລັດອັນຈົບງາມຂອງ ກອງປະຊຸມສະພາທີ່ປຶກສາການເມືອງ ແລະ ສະພາຜູ້ແທນປະຊາຊົນທົ່ວປະເທດຈີນ ສະໄໝທີ 14 ໃນຕົ້ນເດືອນມີນາ 2023, ເຊິ່ງຖືເປັນເຫດການທີ່ສໍາຄັນຂອງ ສປ ຈີນ ພ້ອມດຽວກັນສະຫາຍນາຍົກ ຍັງໄດ້ສະແດງຄວາມຊົມເຊີຍສະຫາຍ ຫວັງ ໜິງ ທີ່ໄດ້ຮັບການແຕ່ງຕັ້ງເປັນເລຂາພັກແຂວງ ແລະ ປະທານສະພາປະຊາຊົນແຂວງຢຸນນານ.
ສປປ ລາວ ແລະ ສປ ຈີນ ເປັນປະເທດເພື່ອນມິດຍຸດທະສາດທີ່ມີສາຍພູ ແລະ ແມ່ນໍ້າຕິດຈອດກັນ ໂດຍສະເພາະແມ່ນແຂວງຢຸນນານຂອງ ສປ ຈີນ ກັບ ສປປ ລາວ; ສອງຝ່າຍ ໄດ້ຕີລາຄາສູງຕໍ່ສາຍພົວພັນມິດຕະພາບ ອັນເປັນມູນເຊື້ອ ແລະ ການພົວພັນແບບຄູ່ຮ່ວມມືຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ແລະ ການເປັນຄູ່ຮ່ວມຊະຕາກໍາ ລາວ-ຈີນ, ຈີນ-ລາວ ທີ່ສືບຕໍ່ມີຜົນສຳເລັດອັນຈົບງາມ, ເຫັນໄດ້ຈາກການພົບປະແລກປ່ຽນການຢ້ຽມຢາມຂອງການນຳຂັ້ນສູງສອງປະເທດ ລາວ-ຈີນ ຢ່າງເປັນປະຈຳ, ໃນໄລຍະການແພ່ລະບາດຂອງເຊື້ອ ພະຍາດໂຄວິດ-19 ພາກສ່ວນກ່ຽວຂ້ອງຂອງ ສປປ ລາວ ແລະ ແຂວງຢຸນນານ ໄດ້ຮ່ວມກັນຈັດກອງປະຊຸມຜ່ານ ວິດີໂອທາງໄກ ເພື່ອປຶກສາຫາລືກ່ຽວກັບການແກ້ໄຂສະພາບຄວາມຫຍຸ້ງຍາກ ໃນການສົ່ງອອກສິນຄ້າກະສິກໍາ, ສະພາບລົດອັ່ງອໍຢູ່ດ່ານສາກົນ ບໍ່ເຕັນ-ບໍ່ຫານ ແລະ ບັນຫາຄົງຄ້າງອື່ນໆ. ພ້ອມນີ້, ສອງຝ່າຍ ໄດ້ເຫັນດີເປັນເອກະ ພາບກັນຈະສືບຕໍ່ຊຸກຍູ້ໃຫ້ບັນດາວິສະຫະກິດຂອງຈີນ ໂດຍສະເພາະແມ່ນນັກທຸລະກິດ-ນັກລົງທຶນ, ປະຊາຊົນຈີນ ກໍຄື ປະຊາຊົນແຂວງຢຸນນານ ເຂົ້າມາລົງທຶນຕາມຂະແຫນງການທີ່ສອງຝ່າຍມີທ່າແຮງນໍາກັນ ແລະ ເຂົ້າມາທ່ອງທ່ຽວຢູ່ ສປປ ລາວ ໃຫ້ຫຼາຍຂຶ້ນ.
ສະຫາຍນາຍົກລັດຖະມົນຕີ ໄດ້ຕີລາຄາສູງຕໍ່ການຊ່ວຍເຫຼືອອັນລ້ຳຄ່າຂອງ ພັກ-ລັດຖະບານ ແລະ ປະຊາຊົນຈີນ ໂດຍສະເພາະແມ່ນການຊ່ວຍເຫຼືອດ້ານຕ່າງໆ ລວມທັງການສົ່ງຊ່ຽວຊານທີມແພດຈາກແຂວງຢຸນນານ ເຂົ້າມາຊ່ວຍ ສປປ ລາວ ໃນການຮັບມືກັບການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ ໃນໄລຍະຜ່ານມາ ໂດຍສະເພາະ ກໍຄື ການຊ່ວຍເຫຼືອຈາກບັນດາການນຳແຂວງຢຸນນານ ທີ່ໄດ້ໃຫ້ການຊຸກຍູ້ການພົວພັນຮ່ວມມືກັບ ບັນດາພາກສ່ວນກ່ຽວຂ້ອງຂອງລາວ ທັງກ່ອນ ແລະ ຫຼັງ ການແຜ່ລະບາດພະຍາດໂຄວິດ-19, ແຂວງຢຸນນານ ຍັງໄດ້ໃຫ້ການຊຸກຍູ້ສົ່ງເສີມບັນດານັກທຸລະກິດຂອງແຂວງມາລົງທຶນຢູ່ ສປປ ລາວ, ອັນພົ້ນເດັ່ນ ກໍແມ່ນການລົງທຶນໃນໂຄງການກໍ່ສ້າງເສັ້ນທາງດ່ວນວຽງຈັນ-ວັງວຽງ, ເຂດເສດຖະກິດກວມລວມໄຊເສດຖາ, ການລົງທຶນດ້ານກະສິກຳຂອງແຂວງຢຸນນານຢູ່ ສປປ ລາວ ລວມທັງ ເຂດເສດຖະກິດ ບໍ່ເຕັນ-ບໍ່ຫານ ແລະ ອື່ນໆ; ນອກນັ້ນ, ຍັງ ໄດ້ຊ່ວຍເຫຼືອທາງດ້ານການສ້າງບຸກຄະລາກອນໃຫ້ແກ່ ສປປ ລາວ ໂດຍໄດ້ສືບຕໍ່ສະຫໜອງທຶນການສຶກສາໃຫ້ ແກ່ນັກສຶກສາລາວ ໃຫ້ໄດ້ມີໂອກາດໄປສຶກສາຢູ່ແຂວງຢຸນນານ, ເຊິ່ງເປັນການປະກອບສ່ວນທີ່ສໍາຄັນ ເຂົ້າໃນການ ຈັດຕັ້ງປະຕິບັດແຜນການພັດທະນາ ເສດຖະກິດ-ສັງຄົມ ຂອງ ສປປ ລາວ ໃນໄລຍະຜ່ານມາ.
ໂອກາດນີ້, ສະຫາຍ ສອນໄຊ ສີພັນດອນ ໄດ້ຕາງໜ້າໃຫ້ ພັກ, ລັດຖະບານ ແລະ ປະຊາຊົນລາວ ສະແດງຄວາມຂອບໃຈຢ່າງຈິງໃຈມາຍັງ ພັກ, ລັດຖະບານ ແລະ ປະຊາຊົນຈີນອ້າຍນ້ອງ ຕໍ່ການຊ່ວຍເຫຼືອດ້ານຕ່າງໆ ໃຫ້ແກ່ ສປປ ລາວ ຕະຫຼອດໄລຍະຜ່ານມາ. ພ້ອມກັນນີ້, ກໍສະເໜີໃຫ້ແຂວງຢຸນນານ ຊ່ວຍຊຸກຍູ້ການເປີດເສັ້ນ ທາງລົດໄຟວຽງຈັນ-ຄຸນໝິງ-ວຽງຈັນ ໃຫ້ສາມາດຂົນສົ່ງຜູ້ໂດຍສານລະຫວ່າງປະເທດໂດຍໄວ ເພື່ອເຮັດໃຫ້ເສັ້ນທາງ ລົດໄຟ ລາວ-ຈີນ ໄດ້ນຳໃຊ້ຢ່າງເຕັມປະສິດທິພາບ, ທັງເປັນການສົ່ງເສີມການໄປມາຫາສູ່ກັນຂອງປະຊາຊົນສອງຊາດ ໂດຍສະເພາະ ໃນຂະແໜງການທ່ອງທ່ຽວ ໃຫ້ຫຼາຍຂຶ້ນກວ່າເກົ່າ, ນອກນັ້ນຍັງໄດ້ແລກປ່ຽນຄວາມຄິດເຫັນກ່ຽວກັບການສ້າງແລວເສດຖະກິດ ລາວ-ຈີນ, ສ້າງແລວເສດຖະກິດຕາມເສັ້ນທາງລົດໄຟ ລາວ-ຈີນ, ຊຸກຍູ້ການຮ່ວມມື ດ້ານກະສິກຳຮ່ວມກັນ ໂດຍສະເພາະແມ່ນການເຊີນຊວນນັກລົງທຶນຈາກແຂວງຢຸນນານ ໃຫ້ເຂົ້າມາສຳຫຼວດ ແລະ ລົງທຶນຢູ່ລາວໃນຂະແໜງຊົນລະປະທານ ເພື່ອເປັນການສົ່ງເສີມການປູກຝັງທີ່ ສປປ ລາວ ມີທ່າແຮງ ລວມທັງຊຸກຍູ້ສົ່ງເສີມກົນໄກການຮ່ວມມືລະຫວ່າງແຂວງຢຸນນານ ກັບບັນດາແຂວງພາກເໜືອຂອງລາວ ທີ່ໄດ້ມີການຈັດປະຊຸມ ພົບປະກັນມາແລ້ວເຖິງ 12 ຄັ້ງ ໃຫ້ໄດ້ຮັບການຈັດຕັ້ງຜັນຂະຫຍາຍຢ່າງຕັ້ງໜ້າ ແລະ ສະເໜີໃຫ້ແຂວງຢຸນນານ ສືບຕໍ່ຊູກຍູ້ໃຫ້ວິສະຫະກິດຂອງແຂວງສືບຕໍ່ການກໍ່ສ້າງເສັ້ນທາງດ່ວນ ແຕ່ອຸດົມໄຊຫາບໍ່ຫານ ແລະ ການກໍ່ສ້າງ ເສັ້ນທາງ R3 ແຕ່ ດ່ານບໍ່ເຕັນ-ບໍ່ຫານ ຊາຍແດນ ລາວ-ຈີນ ຫາເມືອງຫ້ວຍຊາຍແຂວງບໍ່ແກ້ວ ໃຫ້ສຳເລັດໂດຍໄວ, ຊຸກຍູ້ສົ່ງເສີມການຜະລິດເປັນສິນຄ້າ ອໍານວຍຄວາມສະດວກໃຫ້ແກ່ສິນຄ້າກະສິກໍາລາວ ໃຫ້ສາມາດເຂົ້າສູ່ຕະຫຼາດ ສປ ຈີນ ຫຼາຍຂຶ້້້ນ ລວມທັງການຮ່ວມມືດ້ານການປູກພືດທົບແທນການປູກຝິ່ນ ຢູ່ພາກເໜືອລາວ, ເປີດເສັ້ນທາງ ການບິນ ລະຫວ່າງ ແຂວງຢຸນນານ ກັບ ສປປ ລາວ ໃຫ້ກັບມາເປັນປົກກະຕິ ຄືກັບກ່ອນເກີດສະພາບການລະບາດ ຂອງພະຍາດໂຄວິດ-19, ຊຸກຍູ້ໃຫ້ສອງຝ່າຍ ກະກຽມຄວາມພ້ອມທີ່ຈະເປີດດ່ານສາກົນ, ລົດໄຟ ລາວ-ຈີນ ບໍ່ເຕັນ-ບໍ່ຫານ ໃນວັນທີ 13 ເມສາ 2023 ນີ້ ແລະ ຊຸກຍູ້ໂຄງການທາງດ່ວນ ແຕ່ ວັງວຽງ-ບໍ່ເຕັນ ໂດຍສະເພາະແມ່ນ ໄລຍະທີ 4 ແຕ່ອຸດົມໄຊ-ບໍ່ເຕັນ ໃຫ້ໄດ້ຮັບການຈັດຕັ້ງປະຕິບັດໂດຍໄວ. ພ້ອມນີ້, ທ່ານກັນ, ກໍໄດ້ອວຍພອນ ໃຫ້ສາຍພົວພັນອັນເປັນມູນເຊື້ອ, ການພົວພັນຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ແລະ ການເປັນຄູ່ຮ່ວມຊະຕາກໍາ ລາວ-ຈີນ, ຈີນ-ລາວ ຈົ່ງເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ ແລະ ໝັ້ນຄົງຂະນົງແກ່ນ ຕະຫຼອດໄປ, ອວຍພອນໃຫ້ ຄະນະຜູ້ແທນແຂວງຢຸນນານ ຈົ່ງປະສົບຜົນສໍາເລັດໃນການຢ້ຽມຢາມ ສປປ ລາວ ໃນຄັ້ງນີ້.
ໃນຂະນະດຽວກັນ, ສະຫາຍ ຫວັງ ໜິງ ເລຂາພັກແຂວງຢຸນນານ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງຝ່າຍລາວ, ພ້ອມທັງແຈ້ງສະພາບການພັດທະນາທາງດ້ານເສດຖະກິດ ແລະ ສັງຄົມຂອງແຂວງ ຢຸນນານ ໃຫ້ຝ່າຍລາວຊາບ ພິເສດແມ່ນຜົນສຳເລັດໃນການລົບລ້າງຄວາມທຸກຍາກ ເຊິ່ງຝ່າຍແຂວງຢຸນນານຍິນດີຈະແບ່ງປັນປະສົບການ ແລະ ພ້ອມຈະຊ່ວຍເຫຼືອຝ່າຍລາວ ໃນການຖອດຖອນບົດຮຽນ ລວມທັງການຮັບຈັດເຝິກອົບຮົມໃຫ້ແກ່ເຈົ້າໜ້າທີ່ກ່ຽວຂ້ອງຂອງຝ່າຍລາວ, ພ້ອມທັງໄດ້ສະເໜີໃຫ້ຝ່າຍລາວ ສືບຕໍ່ປັບປຸງສະພາບແວດລ້ອມ ໃນການດຶງດູດການລົງທຶນໃຫ້ມີຄວາມສະດວກ ແລະ ຮັບປະກັນຂຶ້ນຕື່ມ ພ້ອມທັງ ໄດ້ຢືນຢັນຄືນຈະສືບຕໍ່ເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອທີ່ດີງາມຂອງສອງຊາດ ຈີນ-ລາວ ໃຫ້ນັບມື້ແຕກດອກອອກຜົນ ຍິ່ງຂຶ້ນ, ພັກ-ລັດຖະບານ ແລະ ປະຊາຊົນຈີນ ໂດຍສະເພາະ ກໍຄື ແຂວງຢຸນນານ ຍິນດີສືບຕໍ່ໃຫ້ການສະໜັບສະໜູນ ແລະ ຊ່ວຍເຫຼືອ ສປປ ລາວ ໃນອະນາຄົດ.
ຂໍ້ມູນຈາກ:
ຕິດຕາມຂ່າວທັງໝົດຈາກ LaoX: https://laox.la/all-posts/
