ສປປ ລາວ ຈັບມືປະເທດລຸ່ມແມ່ນ້ຳຂອງ ຕັ້ງເປົ້າດຶງນັກທ່ອງທ່ຽວ 22 ລ້ານຄົນຮອດປີ 2030

ສປປ ລາວ ພ້ອມດ້ວຍບັນດາປະເທດອະນຸພາກພື້ນແມ່ນ້ຳຂອງ ໄດ້ບັນລຸຂໍ້ຕົກລົງຄັ້ງສຳຄັນທີ່ນະຄອນໂຮ່ຈິມິນ ເພື່ອເຊື່ອມໂຍງພາກພື້ນໃຫ້ກາຍເປັນຈຸດໝາຍປາຍທາງການທ່ອງທ່ຽວດຽວກັນ. ການຮ່ວມມືຄັ້ງນີ້ແນໃສ່ຊຸກຍູ້ການທ່ອງທ່ຽວດິຈິຕອລ ແລະ ການທ່ອງທ່ຽວສີຂຽວ ໂດຍລັດຖະບານລາວໄດ້ວາງເປົ້າໝາຍທ້າທາຍ ໃນການດຶງດູດນັກທ່ອງທ່ຽວສາກົນໃຫ້ທະລຸ 22 ລ້ານຄົນພາຍໃນປີ 2030 ເພື່ອສ້າງລາຍຮັບ ແລະ ກະຕຸ້ນເສດຖະກິດຂອງຊາດຢ່າງກ້າວກະໂດດ.

ຕາມການລາຍງານຂອງ ກົມພັດທະນາການທ່ອງທ່ຽວໃນລະຫວ່າງວັນທີ 26-27 ສິງຫາ 2026 ທີ່ຜ່ານມາ, ທ່ານ ນາງ ດາລານີ ພົມມະວົງສາ ຮອງລັດຖະມົນຕີກະຊວງວັດທະນະທຳ ແລະ ການທ່ອງທ່ຽວ ໄດ້ນຳພາຄະນະເຂົ້າຮ່ວມກອງປະຊຸມລັດຖະມົນຕີດ້ານການທ່ອງທ່ຽວອະນຸພາກພື້ນ ເຊິ່ງປະກອບມີຂອບການຮ່ວມມື CLV ຄັ້ງທີ 1, CLMV ຄັ້ງທີ 8 ແລະ ACMECS ຄັ້ງທີ 7 ໂດຍມີບັນດາປະເທດຄູ່ຮ່ວມພັດທະນາເຂົ້າຮ່ວມຢ່າງພ້ອມພຽງ. 

ກອງປະຊຸມດັ່ງກ່າວໄດ້ຮັບຮອງເອົາແຜນປະຕິບັດງານສຳຄັນສຳລັບສົກປີ 2026-2028 ໂດຍມີຈຸດປະສົງຫຼັກໃນການສ້າງຜະລິດຕະພັນການທ່ອງທ່ຽວທີ່ຫຼາກຫຼາຍ, ຍົກລະດັບມາດຕະຖານການບໍລິການ ແລະ ຫັນສູ່ການທ່ອງທ່ຽວແບບດິຈິຕອລ ເພື່ອອຳນວຍຄວາມສະດວກໃຫ້ນັກທ່ອງທ່ຽວສາມາດເຂົ້າເຖິງຂໍ້ມູນຂ່າວສານໄດ້ຢ່າງວ່ອງໄວ ແລະ ຊັດເຈນ ພ້ອມທັງຮັບປະກັນການພັດທະນາແບບຍືນຍົງໃນໄລຍະຍາວ.

ບາດກ້າວທີ່ໜ້າຈັບຕາໃນຄັ້ງນີ້ ແມ່ນການດຶງເອົາພາກສ່ວນລະດັບໂລກເຊັ່ນ ອົງການທ່ອງທ່ຽວໂລກ (UN Tourism), ສະມາຄົມທ່ອງທ່ຽວອາຊີປາຊີຟິກ (PATA) ແລະ ເວທີຈອງການທ່ອງທ່ຽວອອນລາຍຢ່າງ Traveloka ເຂົ້າມາຊ່ວຍວິເຄາະພຶດຕິກຳຂອງນັກທ່ອງທ່ຽວ ແລະ ສ້າງຄວາມເຂັ້ມແຂງໃຫ້ແກ່ບຸກຄະລາກອນ. 

ການຮ່ວມມືນີ້ແມ່ນສອດຄ່ອງກັບທ່າອ່ຽງການເຕີບໂຕອັນແຂງແຮງຂອງພາກພື້ນ ຊຶ່ງສະທ້ອນໃຫ້ເຫັນຜ່ານຕົວເລກນັກທ່ອງທ່ຽວສາກົນທີ່ເດີນທາງມາພາກພື້ນນີ້ເຖິງ 65,2 ລ້ານຄົນໃນປີ 2025 ແລະ ພຽງ 6 ເດືອນຕົ້ນປີ 2026 ກໍສາມາດດຶງດູດໄດ້ແລ້ວກວ່າ 33 ລ້ານຄົນ ເຊິ່ງເປັນສັນຍານບວກທີ່ຊີ້ໃຫ້ເຫັນເຖິງການຟື້ນຕົວຢ່າງເຕັມຮູບແບບ.

ສຳລັບ ສປປ ລາວ, ລັດຖະບານໄດ້ວາງແຜນຍຸດທະສາດການທ່ອງທ່ຽວສົກປີ 2026-2030 ຢ່າງຈະແຈ້ງ ໂດຍເນັ້ນໜັກການດຶງດູດນັກທ່ອງທ່ຽວຜ່ານຈຸດແຂງທາງດ້ານການທ່ອງທ່ຽວແບບອະນຸລັກ, ຄວາມຫຼາກຫຼາຍທາງຊີວະນາໆພັນ ແລະ ມໍລະດົກວັດທະນະທຳ. 

ຄຽງຄູ່ກັນນັ້ນ ການຊຸກຍູ້ການທ່ອງທ່ຽວແບບທັນສະໄໝ ຫຼື Smart Tourism ໄດ້ກາຍເປັນວຽກງານບູລິມະສິດອັນດັບຕົ້ນໆ ເພື່ອເຊື່ອມໂຍງລາຍການທ່ອງທ່ຽວຂອງລາວເຂົ້າກັບບັນດາປະເທດເພື່ອນບ້ານ ເຊິ່ງເປັນກົນໄກສຳຄັນທີ່ຈະພາໃຫ້ປະເທດຊາດບັນລຸເປົ້າໝາຍການຕ້ອນຮັບນັກທ່ອງທ່ຽວ 22 ລ້ານຄົນພາຍໃນທ້າຍທົດສະວັດນີ້.

ນອກຈາກນີ້, ເວທີກອງປະຊຸມດັ່ງກ່າວຍັງໄດ້ຖືກຈັດຂຶ້ນຄຽງຄູ່ກັບງານວາງສະແດງການທ່ອງທ່ຽວສາກົນ ITE HCMC 2026 ຄັ້ງທີ 20 ພາຍໃຕ້ຫົວຂໍ້ “ການເຊື່ອມໂຍງທີ່ສົດໃສ – ຈຸດໝາຍປາຍທາງການທ່ອງທ່ຽວຂອງທົ່ວໂລກ”. 

ງານມະຫະກຳ MICE ລະດັບແນວໜ້າຂອງອາຊີນີ້ ໄດ້ກາຍເປັນເວທີສຳຄັນໃນການໂຄສະນາຜະລິດຕະພັນການທ່ອງທ່ຽວຂອງລາວອອກສູ່ສາຍຕາຂອງຜູ້ແທນລະດັບສູງ ແລະ ນັກທຸລະກິດການທ່ອງທ່ຽວຈາກທົ່ວໂລກຫຼາຍພັນຄົນ ຊຶ່ງຈະຊ່ວຍສ້າງເຄືອຂ່າຍທຸລະກິດໃໝ່ໆ ແລະ ຍູ້ແຮງໃຫ້ຍຸດທະສາດການທ່ອງທ່ຽວຂອງ ສປປ ລາວ ປະກົດຜົນເປັນຈິງໄດ້ໄວຂຶ້ນ.

#LaoX #ການທ່ອງທ່ຽວລາວ #SmartTourism #LaoTourism2030 #CLV #CLMV #ACMECS #ASEANTourism #ITEHCMC2026