ທ່ານນາຍົກລັດຖະມົນຕີຫວຽດນາມ ຟ້າມ ມິງ ຈິງ ນາຍົກລັດຖະມົນຕີ ແຫ່ງ ສສ ຫວຽດນາມ ແລະ ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໃຫ້ຄຳໝັ້ນ ແລະ ຕັ້ງເປົ້າວ່າ ຫວຽດນາມ ແລະ ລາວ ຈະຂະຫຍາຍວົງເງິນການຄ້າສອງຝ່າຍໃນປີ 2024 ໃຫ້ເພີ່ມຂຶ້ນ 10-15% ເມື່ອທຽບໃສ່ປີ 2023.
ຄຳເຫັນດັ່ງກ່າວມີຂຶ້ນ ໃນກອງປະຊຸມຂອງຄະນະກໍາມະການຮ່ວມມືທະວິພາຄີ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ ຄັ້ງທີ 46 ໄດ້ໄຂຂຶ້ນຢ່າງເປັນທາງການ ໃນວັນທີ 7 ມັງກອນ 2024, ທີ່ ນະຄອນຫລວງຮ່າໂນ້ຍ.
ໂດຍທັງສອງປະເທດໄດ້ເພີ່ມທະວີການຮ່ວມມືດ້ານປ້ອງກັນຄວາມສະຫງົບ, ປ້ອງກັນຄວາມສະຫງົບ ແລະ ກໍ່ສ້າງເສັ້ນຊາຍແດນລາວ-ຫວຽດນາມ ໃຫ້ເປັນຊາຍແດນສັນຕິພາບ, ຕົກລົງເຖິງການຮ່ວມມື ແລະ ການພັດທະນາຮ່ວມກັນຮອບດ້ານ.
ກອງປະຊຸມດັ່ງກ່າວ, ບັນດາກະຊວງ ແລະ ອົງການຕ່າງໆຂອງສອງປະເທດແລກປ່ຽນ ບົດຮຽນກ່ຽວກັບການຄຸ້ມຄອງເສດຖະກິດມະຫາພາກ ແລະ ສ້າງພື້ນຖານເສດຖະກິດເອກະລາດ ແລະ ເປັນເຈົ້າຕົນເອງໃນສະພາບການເຊື່ອມໂຍງເຂົ້າກັບສາກົນ.
ໂດຍປັດຈຸບັນມີ 245 ໂຄງການຫວຽດນາມ ທີ່ມີໃບຢັ້ງຢືນການລົງທຶນຖືກຕ້ອງຢູ່ລາວມີຈຳນວນທຶນຈົດທະບຽນປະມານ 5,5 ຕື້ໂດລາ. ວົງເງິນການລົງທຶນຂອງຫວຽດນາມ ຢູ່ ລາວ ບັນລຸ 116,6 ລ້ານໂດລາ, ເພີ່ມຂຶ້ນ 65,3% ເມື່ອທຽບໃສ່ປີ 2022. ສ່ວນ ສປປ ລາວມີ 18 ໂຄງການລົງທຶນທີ່ກຳລັງດຳເນີນການຢູ່ຫວຽດນາມ ດ້ວຍຍອດຈຳນວນທຶນຈົດທະບຽນກວ່າ 110 ລ້ານໂດລາສະຫະລັດ.
ປີ 2023, ວົງເງິນການຄ້າສອງຝ່າຍບັນລຸປະມານ 1,6 ຕື້ໂດລາສະຫະລັດ, ຫຼຸດລົງ 2,1% ເມື່ອທຽບໃສ່ປີກາຍ, ແຕ່ຍອດມູນຄ່າການນຳເຂົ້າຂອງຫວຽດນາມຈາກ ສປປ ລາວເພີ່ມຂຶ້ນ 4,2%.
ໂດຍປີ 2024 ການຮ່ວມມືດ້ານການຊື້-ຂາຍໄຟຟ້າຈະສືບຕໍ່ໄດ້ຮັບການຊຸກຍູ້. ການນຳເຂົ້າໄຟຟ້າຂອງຫວຽດນາມຈາກ ສປປ ລາວ, ລັດວິສາຫະກິດໄຟຟ້າຫວຽດນາມ ໄດ້ລົງນາມໃນສັນຍາຊື້-ຂາຍໄຟຟ້າ 19 ສະບັບ ກັບນັກລົງທຶນ ເພື່ອຊື້ໄຟຟ້າຈາກເຂື່ອນໄຟຟ້າ 26 ແຫ່ງທີ່ລົງທຶນຢູ່ລາວ ດ້ວຍກຳລັງການຜະລິດທັງໝົດ 2.689 ເມກາວັດ.
ທັງສອງຝ່າຍ ເຫັນດີເພີ່ມທະວີການແລກປ່ຽນຂໍ້ມູນຂ່າວສານ, ແບ່ງປັນປະສົບການໃນການຄຸ້ມຄອງເສດຖະກິດມະຫາພາກ, ສ້າງພື້ນຖານເສດຖະກິດເອກະລາດ ແລະ ເປັນເຈົ້າຕົນເອງໃນສະພາບການເຊື່ອມໂຍງຢ່າງເລິກເຊິ່ງ, ກວ້າງຂວາງ ແລະ ມີປະສິດທິຜົນ. ຕົກລົງຈະດຳເນີນການເຈລະຈາລະຫວ່າງວິສາຫະກິດຫວຽດນາມ ແລະ ອຳນາດການປົກຄອງລາວ ເພື່ອແກ້ໄຂຄວາມຫຍຸ້ງຍາກ ແລະ ສິ່ງກີດຂວາງໃນການຮ່ວມມື ແລະ ບັນດາໂຄງການລົງທຶນ.
ລັດຖະບານລາວໃຫ້ຄຳໝັ້ນສັນຍາຈະສ້າງເງື່ອນໄຂໃຫ້ບຸລິມະສິດ ແລະ ອຳນວຍຄວາມສະດວກໃຫ້ແກ່ບັນດາໂຄງການໃຫຍ່ໆ ແລະ ທີ່ສຳຄັນຂອງວິສາຫະກິດຫວຽດນາມ, ສຶກສາ ແລະ ດັດສົມລະບຽບການກ່ຽວກັບເວລາຈັດຕັ້ງປະຕິບັດໃນການລົງທຶນກໍ່ສ້າງເຂື່ອນໄຟຟ້າ ແລະ ບໍ່ແຮ່ໃຫ້ແທດເໝາະກັບສະພາບການໃໝ່.
ສອງປະເທດເຫັນດີຖືການພັດທະນາກະສິກຳ ແລະ ຊົນນະບົດເປັນໜຶ່ງໃນບັນດາເສົາຄ້ຳແຫ່ງການຮ່ວມມືດ້ານເສດຖະກິດຂອງສອງປະເທດ, ລັດຖະບານຫວຽດນາມ ຈະສືບຕໍ່ສະໜອງທຶນການສຶກສາຈຳນວນ 1.120 ທຶນໃຫ້ແກ່ພະນັກງານ ແລະ ນັກສຶກສາລາວ ໄປຮ່ຳຮຽນຢູ່ ຫວຽດນາມ, ແລະ ສົ່ງຄູອາຈານໄປສອນພາສາຫວຽດນາມ ຢູ່ລາວ.
ສະຫຼຸບການພົບປະ ທ່ານນາຍົກລັດຖະມົນຕີ 2 ທ່ານ ໄດ້ເນັ້ນໜັກວ່າ ຈະສັ່ງໃຫ້ບັນດາກະຊວງ, ວິສາຫະກິດ ສົມທົບກັນຢ່າງແໜ້ນແຟ້ນ, ປະຕິບັດບັນດາຂໍ້ຕົກລົງ, ຄໍາໝັ້ນສັນຍາຢ່າງມີປະສິດທິຜົນ, ສືບຕໍ່ສ້າງເງື່ອນໄຂສະດວກທີ່ສຸດໃຫ້ບັນດາວິສາຫະກິດຂອງສອງປະເທດຊຸກຍູ້ການຮ່ວມມືດ້ານການລົງທຶນ, ການຜະລິດ, ດຳເນີນທຸລະກິດ.
ຕິດຕາມຂ່າວທັງໝົດຈາກ LaoX: https://laox.la/all-posts/
