ທ່າມກາງຄວາມພະຍາຍາມໃນການຟື້ນຟູເສດຖະກິດ ແລະ ຫຼຸດຜ່ອນລະດັບຄວາມທຸກຍາກ, ລັດຖະບານ ສປປ ລາວ, ກະຊວງອຸດສາຫະກຳ ແລະ ການຄ້າ ໄດ້ເປັນເຈົ້າພາບຈັດກອງປະຊຸມຄັ້ງທີ 21 ຄະນະເຮັດວຽກພາກເອກະຊົນ ເພື່ອປຶກສາຫາລືກ່ຽວກັບການຮ່ວມມືປັບປຸງສະພາບແວດລ້ອມແຫ່ງການດຳເນີນທຸລະກິດ.
ກອງປະຊຸມດັ່ງກ່າວໄດ້ເປັນເວທີໃຫ້ກັບລັດຖະບານ, ພາກເອກະຊົນ, ວິສາຫະກິດຂະໜາດນ້ອຍ ແລະ ກາງ ແລະ ບັນດາຄູ່ຮ່ວມມືພັດທະນາ ໄດ້ປຶກສາຫາລືກ່ຽວກັບວິທີເພີ່ມທະວີການລົງທຶນຂອງພາກເອກະຊົນຢູ່ລາວ.
ໂດຍການເປັນປະທານຮ່ວມຂອງ ທ່ານ ບຸນເຖິງ ດວງສະຫວັນ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ; ພ້ອມກັບຕາງໜ້າຈາກຄູ່ຮ່ວມມືສາກົນ, ຕາງໜ້າຈາກພາກທຸລະກິດ ຕ່າງໆ, ມີບັນດາຜູ້ຕາງໜ້າຈາກບັນດາອົງການ, ບັນດາກະຊວງ, ສະຖານທູດ, ຄູ່ຮ່ວມມືພັດທະນາ ແລະ ປະຊາຄົມວິສາຫະກິດທັງພາຍໃນ ແລະ ຕ່າງປະເທດເຂົ້າຮ່ວມກ່ວາ 80 ທ່ານ.
ທ່ານຮອງລັດຖະມົນຕີ ເນັ້ນໜັກເຖິງຄວາມສຳຄັນຂອງການປັບປຸງສະພາບແວດລ້ອມແຫ່ງການດຳເນີນທຸລະກິດ ເພື່ອສ້າງເງື່ອນໄຂແກ້ໄຂບັນດາສິ່ງທ້າທາຍຂອງເສດຖະກິດມະຫາພາກໃນປັດຈຸບັນ.
ທ່ານ ບຸນເຖິງ ກ່າວວ່າ: “ໃນຊຸມປີມໍ່ໆມານີ້, ພວກເຮົາໄດ້ປະຕິຮູບຫຼາຍຢ່າງເພື່ອປັບປຸງສະພາບແວດລ້ອມແຫ່ງການດຳເນີນທຸລະກິດ. ເຖິງຢ່າງໃດກໍຕາມ, ຕ້ອງໄດ້ເຮັດຫຼາຍຢ່າງເພື່ອຊຸກຍູ້ຄວາມຫຼາກຫຼາຍດ້ານເສດຖະກິດ ແລະ ຫຼຸດຜ່ອນການອີງໃສ່ບັນດາຂະແໜງຊັບພະຍາກອນທີ່ເປັນກຳລັງຊຸກຍູ້ການເຕີບໂຕຕົ້ນຕໍ.”
ການປະຕິຮູບປັບປຸງສະພາບແວດລ້ອມການຄ້າ ແລະ ການລົງທຶນ ແມ່ນລວມເຖິງການປັບປຸງວຽກງານການຄວບຄຸມການລົງທຶນ ແລະ ກົດໝາຍວ່າດ້ວຍການສົ່ງເສີມການລົງທຶນ.
ກອງປະຊຸມໄດ້ຍົກໃຫ້ເຫັນຂໍ້ຈຳກັດຂອງການລົງທຶນຂອງເອກະຊົນ ລວມທັງການຂາດແຄນສີມືແຮງງານໃນຕະຫຼາດແຮງງານລາວ ຕາມການລາຍງານຂອງທະນາຄານໂລກ, ພ້ອມທັງມີ ຜົນການຄົ້ນຄວ້າ ແລະ ຄຳແນະນຳທີ່ສຳຄັນຂອງສະພາການຄ້າ ແລະ ອຸດສາຫະກຳ ຢູໂຣບ ປະຈຳລາວ ແລະ ການສຳຫຼວດຄວາມຮູ້ສຶກທາງທຸລະກິດຮ່ວມກັນໂດຍຜູ້ຕາງໜ້າຂອງສະຫະພາບຢູໂຣບ ແລະ ສະພາການຄ້າ ອຸດສາຫະກຳ ແຫ່ງຊາດລາວ.
ທ່ານເອກອັກຄະລັດຖະທູດ ສະຫະພາບ ຢູໂຣບ ນາງ Marciulionyte ກ່າວວ່າ “ຄະນະປະຕິບັດງານນີ້ຊ່ວຍໃຫ້ພວກເຮົາເຮັດວຽກຮ່ວມກັນຢ່າງມີປະສິດທິຜົນ, ພິຈາລະນາທັດສະນະຂອງຜູ້ມີສ່ວນຮ່ວມທີ່ສໍາຄັນທັງໝົດ, ເພື່ອເຮັດໃຫ້ນະໂຍບາຍ ຍຸດທະສາດ ແລະ ໂຄງການສະໜັບສະໜູນທີ່ດີກວ່າ, ເພື່ອແກ້ໄຂຂໍ້ບົກຜ່ອງຂອງທຸລະກິດທີ່ພວກເຮົາກຳລັງປະເຊີນຢູ່”
http://www.vientianetimes.org.la/sub-new/Business/Business_229Industry_23.php
ຕິດຕາມຂ່າວທັງໝົດຈາກ LaoX: https://laox.la/all-posts/