ໂຄສົກຂອງບັນດາປະເທດສະມາຊິກ G20 ໄດ້ປະກາດວ່າ: ພວກເຮົາໄດ້ຮັບການອະນຸມັດ ແລະ ຄຳແນະນຳຈາກຄະນະກໍາມະການຄວາມໝັ້ນຄົງທາງດ້ານການເງິນ (FSB) ສໍາລັບການຄວບຄຸມ ແລະ ການດູແລຄຸ້ມຄອງຕະຫຼາດສິນຊັບ Crypto ທັງໝົດ ລວມເຖິງ Stablecoin ໃນທ້າຍອາທິດທີ່ຜ່ານມາ, ໂດຍມີເປົ້າໝາຍເພື່ອນໍາເອົາສະກຸນເງິນດິຈິຕອນມາຢູ່ພາຍໃຕ້ກົດລະບຽບທີ່ຄ້າຍຄືກັນກັບທະນາຄານແບບດັ້ງເດີມ.
ອີງຕາມຄຳປະກາດດັ່ງກ່າວໄດ້ລະບຸວ່າ ການອະນຸມັດຈາກ FSB ໃນຄັ້ງນີ້ມີເປົ້າໝາຍເພື່ອຫຼຸດຜ່ອນຄວາມສ່ຽງຕ່າງໆທີ່ກ່ຽວຂ້ອງກັບລະບົບນິເວດຂອງ Crypto. ດັ່ງນັ້ນ G20 ສັງເກດເຫັນວ່າຈຳເປັນຈະຕ້ອງໄດ້ຕິດຕາມຄວາມສ່ຽງຕ່າງໆທີ່ກ່ຽວຂ້ອງກັບການພັດທະນາໃນລະບົບນິເວດສິນຊັບ Crypto ຢ່າງໃກ້ຊິດ.
ພາຍຫຼັງການປະກາດດັ່ງກ່າວ ບັນດາລັດຖະມົນຕີການຄັງ ແລະ ຜູ້ວ່າການທະນາຄານກາງຂອງບັນດາປະເທດ G20 ໃຫ້ຄຳໝັ້ນສັນຍາທີ່ຈະປຶກສາຫາລື ແລະ ດຳເນີນການຕາມແຜນງານໃນລະຫວ່າງການປະຊຸມຄັ້ງຕໍ່ໄປໃນເດືອນຕຸລາ 2023 ທີ່ເມືອງ Marrakech ປະເທດໂມຣັອກໂຄ.
ຈາກການຮັບຮອງໃນຄັ້ງນີ້, ຜູ້ນໍາ G20 ໄດ້ມອບໝາຍໃຫ້ FSB ແລະ Standard-Setting Bodies (SSBs) ສົ່ງເສີມອຸດສາຫະກໍາຢ່າງຖືກຕ້ອງ ແລະ ເໝາະສົມ ເພື່ອໃຫ້ສອດຄ່ອງກັບກົດລະບຽບທີ່ວາງໄວ້ໃນທົ່ວໂລກ. ໂດຍໜ່ວຍງານດູແລຄຸ້ມຄອງຈະຕ້ອງຄຳນຶງເຖິງຄວາມສ່ຽງທີ່ເພີ່ມຂຶ້ນ, ໂດຍສະເພາະໃນຕະຫຼາດທີ່ເກີດໃໝ່ ແລະ ບັນດາປະເທດກໍາລັງພັດທະນາ (EMDE)
ນອກຈາກນີ້, G20 ຍັງເຕັມໃຈທີ່ຈະນຳເອົາ Financial Action Task Force (FATF) ເຂົ້າມາໃຊ້ເພື່ອທີ່ຈະຈັດການຄວາມສ່ຽງດ້ານການຟອກເງິນ ແລະ ຄວາມສ່ຽງດ້ານການທີ່ໃຊ້ມາສະໜັບສະໜູນໃນການກໍ່ການຮ້າຍ. G20 ຍັງໄດ້ຮຽກຮ້ອງໃຫ້ມີການດຳເນີນການຢ່າງໄວວາຂອງ CryptoAsset Reporting Framework (CARF) ແລະ ການປັບປຸງມາດຕະຖານການລາຍງານທົ່ວໄປ (CRS).
ທັງໝົດທີ່ເຮັດໄປນີ້ ແມ່ນເພື່ອສ້າງໂຄງສ້າງໃນການປະສານງານຈາກທົ່ວໂລກ ເພື່ອທີ່ຈະຮ່ວມມືກັນ ແລະ ແບ່ງປັນຂໍ້ມູນຂ່າວສານທີ່ຈະຊ່ວຍໃຫ້ລັດຖະບານສາມາດເຂົ້າໃຈໄດ້ດີຂຶ້ນກ່ຽວກັບລະບົບນິເວດ crypto ທີ່ມີການປ່ຽນແປງຕະຫຼອດໄປ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
