ບໍລິສັດ EV ຂອງຈີນໄດ້ພົບຄວາມຜິດປົກກະຕິ ຫຼັງຈາກການຂາຍລົດ EV 200 ຄັນໃນ 1 ເດືອນໃນລາຄາມື 1 , ແຕ່ກັບພົບວ່າລົດຄັນດັ່ງກ່າວຖືກຂາຍໃຫ້ປະເທດຕາເວັນອອກກາງໃນລາຄາແພງກວ່າ.
ພະນັກງານຂອງບໍລິສັດລົດໄຟຟ້າຂອງຈີນ Li Auto ສັງເກດເຫັນສິ່ງທີ່ຜິດປົກກະຕິໃນເວລາທີ່ພວກເຂົານັບຈໍານວນລົດທີ່ຂາຍໄດ້ໃນເດືອນກໍລະກົດ 2023 ໃນໄລຍະສາມອາທິດທໍາອິດຂອງເດືອນ. ອີງຕາມ Li Xiang, CEO ຂອງບໍລິສັດກ່າວວ່າ ມີລົດ 200 ຄັນທີ່ລົງທະບຽນໃນປະເທດຈີນ ແຕ່ບໍ່ເຄີຍເຮັດປະກັນໄພ ເຮັດໃຫ້ບໍ່ສາມາດນຳໃຊ້ໃນປະເທດໄດ້.
ເຊິ່ງຫຼັງຈາກກວດສອບແລ້ວພົບເຫັນວ່າ ລົດເຫຼົ່ານັ້ນຖືກສົ່ງອອກ ແລະ ຂາຍເປັນລົດມືສອງຢູ່ຕ່າງປະເທດ ໂດຍສ່ວນໃຫຍ່ແມ່ນສົ່ງອອກໄປຍັງປະເທດອາຊີກາງ ແລະ ຕາເວັນອອກກາງ. Li Xiang ໄດ້ກ່າວວ່າ ລົດ SUV Li Auto L7 ທີ່ມີລາຄາໃນຈີນປະມານ 25,800 ໂດລາ ເມື່ອຖືກສົ່ງອອກໄປຂາຍໃນຕ່າງປະເທດຈະຢູ່ໃນລາຄາສູງຂຶ້ນແບບກ້າວກະໂດດທີ່ 70,897 ໂດລາ.
ເນື່ອງຈາກວ່າໃນປັດຈຸບັນ ລົດ EV ກຳລັງເປັນກະແສນິຍົມໃນທົ່ວໂລກ ແລະ ປະເທດຈີນກໍບໍ່ໄດ້ມີນາຍໜ້າຢ່າງເປັນທາງການ ເຮັດພວກຜູ້ຄ້າລາຍຍ່ອຍໃຊ້ປະໂຫຍດຈາກນະໂຍບາຍທີ່ອະນຸຍາດໃຫ້ຂາຍລົດຍົນທີ່ໃຊ້ແລ້ວໃນຕ່າງປະເທດໄດ້ໂດຍບໍ່ໄດ້ຮັບໃບອະນຸຍາດຈາກຜູ້ຜະລິດລົດຍົນ ເຊິ່ງຜູ້ຄ້າລາຍຍ່ອຍນີ້ເຫຼົ່ານີ້ຈະໃຊ້ກົນອຸບາຍກໍຄື ຈະລົງທະບຽນລົດໃໝ່ໃນປະເທດຈີນກ່ອນ ແລ້ວຫຼັງຈາກນັ້ນກໍຈະຈັດສົ່ງໄປຕ່າງປະເທດທັນທີ ເຊິ່ງນີ້ໝາຍຄວາມວ່າລົດເຫຼົ່ານີ້ແມ່ນຂອງມື 2 ໃນທາງເຕັກນິກ.
ເຊິ່ງເທຣນໃນການຂາຍລົດ EV ທີ່ໃຊ້ແລ້ວນີ້ແມ່ນມາຈາກ ຄວາມຕ້ອງການລົດໄຟຟ້າຢູ່ຕ່າງປະເທດທີ່ນັບມື້ນັບເພີ່ມຂຶ້ນ ຍ້ອນຊ່ອງວ່າງໃນນະໂຍບາຍການຄ້າຂອງຈີນທີ່ອະນຸຍາດໃຫ້ລົດໃຊ້ແລ້ວສາມາດຂາຍຢູ່ຕ່າງປະເທດໂດຍບໍ່ໄດ້ຮັບອະນຸຍາດ.
ໂດຍມີຣັດເຊຍ, ຄາຊັກສະຖານ ແລະ ຊາອຸດີອາຣະເບຍ ເປັນປະເທດຈຸດໝາຍປາຍທາງຫຼັກຂອງລົດໄຟຟ້າ “ມືສອງ” ເຫຼົ່ານີ້. ເຊິ່ງໃນປີ 2023, ຈີນຈະສົ່ງອອກລົດຫຼາຍກວ່າ 1 ແສນຄັນ, ໃນນັ້ນສ່ວນໃຫຍ່ຈະເປັນລົດໄຟຟ້າ ຫຼື ປລັກອິນແບບໄຮບຣິດ.
ຢ່າງໃດກໍຕາມ, ຜູ້ຊື້ລົດ EV ຂອງຈີນຍັງຄົງພໍໃຈກັບລາຄາທີ່ເຂົາເຈົ້າຈ່າຍໄປ, ເນື່ອງຈາກວ່າລົດ EV ຂອງຈີນມີລາຄາຕໍ່າ ແລະ ກຸ້ມກັບເງິນທີ່ຈ່າຍໄປ. ຈາກແຕ່ກ່ອນທີ່ເຄີຍເບິ່ງວ່າ ລົດຈາກຈີນທີ່ມີລາຄາຖືກ ມັກຈະມີຄຸນະພາບທີ່ຕໍ່າ.
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
