ໃນວັນທີ 17 ມັງກອນທີ່ຜ່ານມາ, ສຳນັກງານສະຖິຕິແຫ່ງຊາດຈີນ (NBS) ໄດ້ມີການລາຍງານວ່າ ຍອດລວມຂອງຜະລິດຕະພັນພາຍໃນປະເທດ (GDP) ຂອງຈີນໃນປີ 2023 ເພີ່ມຂຶ້ນ 5.2% ເມື່ອທຽບໃສ່ປີກາຍ ເຊິ່ງສູງກວ່າເປົ້າໝາຍທີ່ລັດຖະບານຈີນໄດ້ວາງໄວ້ປະມານ 5% ພາຍຫຼັງທີ່ຈີນໄດ້ຍຸຕິມາດຕະການປິດລ້ອມເພື່ອປ້ອງກັນການແຜ່ລະບາດຂອງ COVID-19 ສົ່ງຜົນໃຫ້ເສດຖະກິດຈີນຊະລໍຕົວລົງສູ່ລະດັບ 3% ໃນປີ 2022.
ໃນສ່ວນຂອງ GDP ໃນໄຕມາດທີ 4 ຂອງປີ 2023 ໄດ້ມີການຂະຫຍາຍຕົວຂຶ້ນ 5.2% ໂດຍໄດ້ຮັບແຮງຊຸກຍູ້ຈາກການເພີ່ມຄ່າໃຊ້ຈ່າຍເພື່ອຊຸກຍູ້ເສດຖະກິດໃຫ້ຟື້ນຟູຈາກ COVID-19. ຢ່າງໃດກໍຕາມ, ຕົວເລກ GDP ຂອງໄຕມາດທີ 4 ແມ່ນຍັງຕໍ່າກວ່າການຄາດການຂອງນັກວິເຄາະທີ່ໄດ້ເຮັດການສຳຫຼວດ ແລະ ຄາດການວ່າຈະເຕີບໂຕເຖິງ 5.3%.
ໂດຍການເປີດເຜີຍສະຖິຕິຂອງ NBS ໄດ້ມີຄວາມສອດຄ່ອງກັບ ນາຍົກລັດຖະມົນຕີ Li Qiang ໄດ້ກ່າວຄຳປາໄສເມື່ອວັນອັງຄານ (16 ມັງກອນ) ໃນກອງປະຊຸມປະຈຳປີຂອງ World Economic Forum ທີ່ເມືອງ Davos ປະເທດສະວິດເຊີແລນ ວ່າ
“ໃນປີ 2023 ທີ່ຜ່ານມາ, ເສດຖະກິດຈີນໄດ້ມີການຟື້ນຕົວຢູ່ປະມານ 5.2 % ເຊິ່ງສູງກວ່າເປົ້າໝາຍຂອງລັດຖະບານທີ່ວາງໄວ້ ແລະ ພວກເຮົາບໍ່ໄດ້ເພິ່ງພາໃສ່ການກະຕຸ້ນເສດຖະກິດຂະໜາດໃຫຍ່ ເພາະວ່າພວກເຮົາບໍ່ຕ້ອງການໃຫ້ເສດຖະກິດເຕີບໂຕໃນໄລຍະສັ້ນ ແຕ່ຕ້ອງປະເຊີນກັບຄວາມສ່ຽງໃນໄລຍະຍາວ”
ນາຍົກລັດຖະມົນຕີ Li Qiang ກ່າວຕື່ມວ່າ “ເສດຖະກິດຂອງຈີນຈະສາມາດຟື້ນຕົວຂຶ້ນເລື້ອຍໆຢ່າງຕໍ່ເນື່ອງ ແລະ ຍັງຄົງສືບຕໍ່ເປັນແຮງຂັບເຄື່ອນໃຫ້ເສດຖະກິດໂລກມີຄວາມເຂັ້ມແຂງຕໍ່ໄປ”
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
