ໃນຊີວິດຂອງພວກເຮົາ ທຸກຄົນລ້ວນແຕ່ຈະມີໝູ່ທີ່ຄອຍຢືນຢູ່ຄຽງຂ້າງ ບໍ່ວ່າຈະເປັນທີ່ປຶກສາ ຫຼື ແບ່ງປັນທຸກສຸກ ຮ່ວມຫົວຮ່ວມຫາງຜ່ານເລື່ອງລາວຕ່າງໆມານຳກັນ, ແຕ່ບໍ່ແມ່ນວ່າຄວາມສໍາພັນກັບໝູ່ເພື່ອນທຸກຄົນຈະລາບລື່ນສະເໝີໄປ. ໃນບາງຄັ້ງກໍມີໝູ່ບາງຄົນທີ່ມັກຈະຂັດໃຈເຮົາ ແລະ ສ້າງຄວາມລຳຄານໃຫ້ເຮົາຢູ່ເລື້ອຍໆ.
ໃນສະຖານະການເຫຼົ່ານີ້ສາມາດເຮັດໃຫ້ເຮົາເກີດຄຳຖາມຂຶ້ນມາໃນຫົວຫຼາຍຢ່າງວ່າ ເປັນຫຍັງເຮົາຈຶ່ງຍັງຄົບກັບໝູ່ຄົນນີ້ຢູ່ ເປັນຫຍັງເຮົາຈຶ່ງຍັງທົນກັບພຶດຕິກຳຂອງເຂົາຢູ່ ແລ້ວເຮົາຄວນຈະເຮັດແບບໃດຕໍ່ໄປ?
ໃນບົດຄວາມນີ້, ພວກເຮົາຈະແກ້ໄຂຄວາມເລິກລັບເຫຼົ່ານີ້ ແລະ ສະເໜີຄໍາແນະນໍາສໍາລັບການຈັດການກັບໝູ່ເພື່ອນທີ່ມັກຈະຂັດໃຈ ເພື່ອຮັກສາຄວາມສຳພັນທີ່ດີເອົາໄວ້ ໂດຍບໍ່ຕ້ອງທໍລະມານໃຈອີກ.
ຕົ້ນຕໍຂອງຄວາມຂັດໃຈ: ເປັນຫຍັງເຮົາເຖິງຍັງຄົບກັບໝູ່ຜູ້ນີ້ຢູ່?
ມີຫຼາຍເຫດຜົນທີ່ວ່າເປັນຫຍັງເຮົາຍັງທົນຄົບກັບໝູ່ຄົນນີ້ທີ່ແສນຈະຂັດໃຈເຮົາຢູ່ເປັນປະຈຳ. ເຊິ່ງບາງສ່ວນອາດຈະມາຈາກປັດໄຈພາຍນອກເຊັ່ນ:
- ຄວາມຜູກພັນໃນອະດີດ: ພວກເຮົາອາດຈະມີຄວາມຊົງຈໍາທີ່ດີ ຮ່ວມກັນໝູ່ຄົນນີ້ຫຼາຍ ແລະ ຜ່ານປະສົບການຫຼາຍຢ່າງຮ່ວມກັນຈົນເຮັດເຮົາບໍ່ຕ້ອງການທີ່ຈະຕັດສາຍສຳພັນ.
- ຄວາມກັງວົນກ່ຽວກັບຄວາມຮັບຮູ້ຂອງຄົນອື່ນ: ເຮົາອາດຈະກັງວົນວ່າຖ້າຫາກຕັດໝູ່ຄົນນີ້ອອກ ແລ້ວຄົນອື່ນຈະເບິ່ງເຮົາແນວໃດ? ຢ້ານວ່າຈະຖືກເບິ່ງວ່າເຮົາເປັນຄົນໃຈຮ້າຍ ຫຼື ຢ້ານເສຍຊື່ສຽງ
- ຄວາມຢ້ານກົວທີ່ຈະສູນເສຍ: ພວກເຮົາອາດຈະຢ້ານວ່າຖ້າພວກເຮົາຕັດໝູ່ຄົນນີ້ອອກ, ພວກເຮົາຈະບໍ່ມີໝູ່ເຫຼືອຢູ່ເລີຍ. ຢ້ານທີ່ຈະຮູ້ສຶກໂດດດ່ຽວ ຫຼື ຢ້ານວ່າບໍ່ມີໃຜຢູ່ຄຽງຂ້າງອີກ.
ນອກຈາກນີ້, ຍັງມີປັດໄຈພາຍໃນທີ່ສົ່ງຜົນຕໍ່ຄວາມຄິດ, ຄວາມຮູ້ສຶກ ແລະ ພຶດຕິກໍາຂອງ ເຮົາເອງເຊັ່ນ:
- ຄວາມໝັ້ນຄົງໃນຕົນເອງຕ່ຳ: ເຮົາອາດຈະມີ self-esteem ໃນຕົນເອງຕ່ຳ ແລະຂາດຄວາມໝັ້ນໃຈໃນຕົນເອງ. ຈົນເຮັດໃຫ້ຍອມທົນຕໍ່ພຶດຕິກຳຂອງໝູ່ທີ່ບໍ່ດີ ເພາະຢ້ານວ່າຈະບໍ່ມີໃຜຄົບນຳ.
- ຄວາມຮູ້ສຶກຜິດ: ເຮົາອາດຮູ້ສຶກຜິດຕໍ່ໝູ່ຄົນນີ້. ເພາະເຄີຍເຮັດສິ່ງທີ່ຜິດຕໍ່ເຂົາມາກ່ອນ ຫຼື ເຄີຍມີການຜິດຖຽງກັນຢ່າງຮຸນແຮງ ຈົນເຮັດໃຫ້ບໍ່ຢາກຕັດຄວາມສໍາພັນ
- ຄວາມເຄີຍຊິນ: ອາດຈະຄຸ້ນເຄີຍກັບພຶດຕິກໍາຂອງໝູ່ຄົນນີ້ ຈົນກາຍເປັນຄວາມລຶ້ງເຄີຍ ມອງຂ້າມສິ່ງທີ່ເຮັດໃຫ້ຂັດໃຈ ຈົນບໍ່ກ້າປ່ຽນແປງຫຍັງ
ຜົນກະທົບຈາກໝູ່ທີ່ແສນຈະຂັດໃຈ
ການມີໝູ່ທີ່ມັກຂັດໃຈ ຫຼື ເຮັດຫຍັງບໍ່ຖືກໃຈຈະສົ່ງຜົນກະທົບທາງລົບຕໍ່ທັງສຸຂະພາບຈິດ ແລະ ຮ່າງກາຍຂອງພວກເຮົາດັ່ງຕໍ່ໄປນີ້:
- ຄວາມຄຽດ: ເຮົາຈະຮູ້ສຶກຄຽດ, ກະວົນກະວາຍ, ຫງຸດຫງິດ, ແລະ ລຳຄານໃນໃຈຢູ່ສະເໝີ ສິ່ງນີ້ສົ່ງຜົນກະທົບຕໍ່ອາລົມ ແລະ ຄວາມຮູ້ສຶກຂອງເຮົາ.
- ຄວາມບໍ່ໝັ້ນໃຈ: ເຮົາອາດຈະຮູ້ສຶກບໍ່ໝັ້ນໃຈໃນຕົວເຮົາເອງ. ຫຼຸດຄຸນຄ່າຕົນເອງ ເພາະຮູ້ສຶກວ່າຕົນເອງບໍ່ດີພໍ ທີ່ຕ້ອງທົນຢູ່ກັບພຶດຕິກໍາຂອງໝູ່ເພື່ອນ
- ບັນຫາສຸຂະພາບຮ່າງກາຍ: ຄວາມກົດດັນທີ່ສະສົມຈາກການຢູ່ກັບໝູ່ເພື່ອນທີ່ມັກຈະຂັດໃຈ. ສົ່ງຜົນກະທົບຕໍ່ສຸຂະພາບທາງດ້ານຮ່າງກາຍ ເຮັດໃຫ້ເກີດພະຍາດຕ່າງໆເຊັ່ນ: ຄວາມດັນເລືອດສູງ, ພະຍາດຫົວໃຈ ຫຼື ລະບົບພູມຕ້ານທານທີ່ອ່ອນແອ.
- ຄວາມສໍາພັນອື່ນໆເສຍຫາຍ: ການອຸທິດເວລາ ແລະ ຄວາມສົນໃຈໃຫ້ກັບໝູ່ເພື່ອນທີ່ເຮົາບໍ່ພໍໃຈ. ສາມາດເຮັດໃຫ້ພວກເຮົາລະເລີຍຄວາມສໍາພັນກັບຄົນອື່ນເຊັ່ນ: ຄອບຄົວ, ໝູ່ສະໜິດ ຫຼື ຄູ່ຮັກ.
ວິທີການຮັບມືກັບໝູ່ຂອງເຮົາ
ການຈັດການກັບໝູ່ທີ່ມັກຂັດໃຈໄປທຸກຢ່າງນັ້ນ ມັນບໍ່ແມ່ນເລື່ອງງ່າຍ ແຕ່ກໍບໍ່ແມ່ນວ່າຈະເປັນໄປບໍ່ໄດ້. ໃຫ້ທ່ານລອງປັບໃຊ້ແນວທາງແນະນຳເຫຼົ່ານີ້ເບິ່ງ ເຜື່ອວ່າຈະຊ່ວຍໃຫ້ຄວາມສໍາພັນຂອງເຮົາກັບໝູ່ດີຂຶ້ນໂດຍບໍ່ຕ້ອງທໍລະມານ
- ເວົ້າກົງໄປກົງມາ
ການສື່ສານຢ່າງກົງໄປກົງມາແມ່ນກຸນແຈສໍາຄັນໃນການແກ້ໄຂບັນຫາ. ຊອກຫາໂອກາດທີ່ຈະລົມກັບໝູ່ຢ່າງໃຈເຢັນ. ອະທິບາຍໃຫ້ລາວຮູ້ວ່າພຶດຕິກໍາຂອງລາວເຮັດໃຫ້ເຮົາຮູ້ສຶກແນວໃດ. ພະຍາຍາມຟັງທັດສະນະຂອງເຂົາເຈົ້າດ້ວຍຄວາມເຂົ້າໃຈ ແລະ ຊອກຫາວິທີແກ້ໄຂຮ່ວມກັນ
- ກໍານົດຂອບເຂດ
ບອກກັບໝູ່ຂອງເຮົາໃຫ້ຊັດເຈນກ່ຽວກັບອັນໃດທີ່ເຮົາສາມາດຮັບໄດ້. ການກຳນົດຂອບເຂດຈະຊ່ວຍໃຫ້ໝູ່ຂອງທ່ານເຂົ້າໃຈວ່າບາງພຶດຕິກຳຂອງເຂົາຈະບໍ່ຍອມຮັບໄດ້ ແລະ ຊ່ວຍເຂົາໃຫ້ມີສະຕິລະວັງຕົວຕໍ່ການປະພຶດຂອງຕົນເອງ
- ຮັກສາໄລຍະຫ່າງ
ຖ້າຫາກການເວົ້າກັນ ຫຼື ການສ້າງຂອບເຂດບໍ່ໄດ້ຊ່ວຍສະຖານະການດີຂຶ້ນ, ລອງພະຍາຍາມຮັກສາໄລຍະຫ່າງຈາກໝູ່ຂອງເຮົາໄລຍະໜຶ່ງ. ການໃຫ້ເວລາກັບ ຕົວເຮົານເອງສາມາດຊ່ວຍໃຫ້ທ່ານຮູ້ສຶກດີຂຶ້ນ, ມີສະຕິຫຼາຍ ແລະ ສາມາດຈັດການກັບບັນຫານີ້ໄດ້ຢ່າງມີປະສິດທິພາບຫຼາຍຂຶ້ນ.
- ຍອມຮັບ ແລະ ເຂົ້າໃຈ
ພະຍາຍາມຍອມຮັບ ແລະ ເຂົ້າໃຈວ່າໝູ່ຄົນນີ້ຂອງເຮົາກໍມີທັງຂໍ້ດີ ແລະ ຂໍ້ເສຍໃນຕົນເອງ ເຊັ່ນດຽວກັນກັບຄົນອື່ນໆ, ການຍອມຮັບຄວາມແຕກຕ່າງຊ່ວຍໃຫ້ຄວາມຄາດຫວັງຫຼຸດລົງ ແລະ ເຮັດໃຫ້ພວກເຮົາຮູ້ສຶກສະບາຍໃຈຫຼາຍຂຶ້ນ
- ປຶກສາຄົນອື່ນ
ຖ້າຫາກວ່າເຮົາຮູ້ສຶກໜັກໃຈຈົນຮັບມືບໍ່ໄຫວ ລອງປຶກສາກັບຄົນອື່ນໆທີ່ໄວ້ໃຈໄດ້ເຊັ່ນ: ຄອບຄົວ, ໝູ່ເພື່ອນຄົນອື່ນ ຫຼື ຜູ້ຊ່ຽວຊານ. ການໄດ້ຮັບຄໍາແນະນໍາ ແລະ ການໃຫ້ກໍາລັງໃຈຈາກຄົນອ້ອມຂ້າງ ຈະເຮັດໃຫ້ເຮົາມີພະລັງ ແລະ ຄວາມໝັ້ນໃຈຫຼາຍຂຶ້ນເພື່ອຈັດການກັບບັນຫານີ້.
ວິທີແກ້ໄຂເພີ່ມເຕີມ
ຖ້າຫາກລອງທຸກວິທີທາງແລ້ວ ຄວາມສຳພັນຍັງບໍ່ດີຂຶ້ນເທື່ອ ແລະ ໝູ່ຂອງກໍຍັງສ້າງຄວາມທຸກໃຈໃຫ້ເຮົາຢູ່ສະເໝີ. ການຕັດໝູ່ອາດຈະເປັນທາງເລືອກສຸດທ້າຍ ແຕ່ກໍຄວນ ເຮັດດ້ວຍຄວາມຮອບຄອບ ແລະ ຄໍານຶງເຖິງຜົນສະທ້ອນທີ່ຈະຕາມມາ.
ຫາກໝູ່ຂອງເຮົາຂໍໂທດ ແລະ ພ້ອມທີ່ຈະປັບປຸງຕົນເອງໃໝ່ ກໍລອງໃຫ້ອະໄພເຂົາອີກຄັ້ງ ເພາະການໃຫ້ອະໄພຈະຊ່ວຍຮັກສາຄວາມສໍາພັນ ແລະ ເປີດໂອກາດໃຫ້ມິດຕະພາບຂອງພວກເຮົາກັບຄືນມາອີກຄັ້ງ. ແຕ່ກໍຈົ່ງຈື່ໄວ້ວ່າ ມິດຕະພາບທີ່ດີຄວນຈະສ້າງຄວາມສຸກ ແລະ ຄວາມສະບາຍໃຈໃຫ້ກັບເຮົາ ຖ້າເພື່ອນຄົນໃດເຮັດໃຫ້ເກີດຄວາມທຸກ ແລະ ຄວາມກົດດັນກັບເຮົາຢູ່ສະເໝີ ກໍຈົ່ງທົບທວນຄວາມສໍາພັນນີ້ອີກຄັ້ງວ່າ ມັນຄຸ້ມຄ່າບໍ່ທີ່ຈະຮັກສາໄວ້?
ທີ່ມາ:
ຕິດຕາມຂ່າວທັງໝົດຈາກ LaoX: https://laox.la/all-posts/
