ລັດຖະບານກຳລັງຮ່ວມມືກັບອົງການອື່ນໆໃນລາວ ເພື່ອປັບປຸງວຽກງານກະສິກຳ ໂດຍຮັບປະກັນໃຫ້ຊາວກະສິກອນມີການເຂົ້າເຖິງແຫຼ່ງທຶນ ແລະ ຕະຫຼາດໃຫ້ຫຼາຍຂຶ້ນ ແລະ ນຳໃຊ້ເທັກໂນໂລຢີທີ່ທັນສະໄໝເພື່ອຊຸກຍູ້ຜົນຜະລິດ.
ຄຳເຫັນດັ່ງກ່າວ ມີຂຶ້ນ ໃນລະຫວ່າງ ທ່ານ ລິນຄຳ ດວງສະຫວັນ ລັດຖະມົນຕີກະຊວງກະສິກຳ ແລະ ປ່າໄມ້ ໄດ້ປຶກສາຫາລືກ່ຽວກັບບັນຫາດັ່ງກ່າວໃນກອງປະຊຸມຂອງກະຊວງ ແລະ ອົງການແນວລາວສ້າງຊາດ ໃນທ້າບອາທິດທີ່ຜ່ານມາ.
ກອງປະຊຸມໄດ້ເຫັນດີເປັນເອກະສັນກັນກ່ຽວກັບຄວາມຕ້ອງການປະສານສົມທົບໃນການປະຕິບັດນະໂຍບາຍຂອງພັກກ່ຽວກັບການປູກຝັງ, ໂດຍກ່າວວ່າ SMEs ຕິດພັນກັບກະສິກຳຈະໄດ້ຮັບແຫຼ່ງທຶນຫຼາຍກວ່າ.
ນອກຈາກນັ້ນ, ໂຄງການໜຶ່ງເມືອງ, ໜຶ່ງຜະລິດຕະພັນ ຈະໄດ້ຮັບການສົ່ງເສີມໃຫ້ກວ້າງຂວາງຍິ່ງຂຶ້ນ ແລະ ການຮ່ວມມື ແລະ ກຸ່ມຜະລິດກໍ່ຈະໄດ້ຮັບການເພີ່ມທະວີການສະໜັບສະໜູນ,ແນວລາວສ້າງຊາດ ແລະ ກະຊວງ ຈະສືບຕໍ່ສົມທົບກັນໃນດ້ານນີ້ ແລະ ສະຫະພັນຊາວກະສິກອນລາວ ຈະຖືກສ້າງຕັ້ງຂື້ນພາຍໃຕ້ແນວລາວສ້າງຊາດ.
ໂດຍ ສະຫະພັນຊາວກະສິກອນລາວທີ່ດຳເນີນງານຢູ່ຂັ້ນຮາກຖານຕົ້ນຕໍຈະມີບົດບາດປະສານງານໂດຍການຊຸກຍູ້ແນວທາງໜູນຊ່ວຍຂອງພັກໃຫ້ແກ່ຊາວກະສິກອນ, ສິດທິຕ່າງໆ ແລະ ຜົນປະໂຫຍດຂອງຊາວກະສິກອນ ພ້ອມກັບຕີລາຄາຄວາມສາມາດບົ່ມຊ້ອນຂອງຊາວກະສິກອນເພື່ອຊຸກຍູ້ການຜະລິດໃນພື້ນທີ່ນັ້ນໆ.
ບຸລິມະສິດອັນດັບໜຶ່ງແມ່ນເນັ້ນໜັກເຖິງດ້ານເສດຖະກິດກະສິກຳ, ພ້ອມທັງຮັບປະກັນໃຫ້ຜະລິດຕະພັນກະເສດຮັກສາຄຸນນະພາບສູງ ແລະ ຜະລິດເປັນຈຳນວນຫຼວງຫຼາຍ.
ແນວລາວສ້າງຊາດ ແລະ ກະຊວງກະສິກຳ ແລະ ປ່າໄມ້ ຈະກຳນົດພື້ນທີ່ປູກພືດສະເພາະ ແລະ ຊຸກຍູ້ໃຫ້ມີການຜະລິດກະສິກຳເປັນສິນຄ້າ ແລະ ປຸງແຕ່ງຜະລິດຕະພັນກະເສດຫຼາຍຂຶ້ນ, ໂດຍຜ່ານການພົວພັນໂດຍກົງກັບກົມສົ່ງເສີມຂອງກະຊວງ.
ບັນດາຜູ້ເຂົ້າຮ່ວມຍັງໄດ້ປະກອບຄຳເຫັນໃສ່ຮ່າງເອກະສານທີ່ໄດ້ສັງລວມໃສ່ບັນດາທິດທາງດັ່ງກ່າວ ເພື່ອຮັບປະກັນໃຫ້ຄົບຖ້ວນ ແລະ ສອດຄ່ອງກັບຄວາມຕ້ອງການຜະລິດໃນປະຈຸບັນ ແລະ ອະນາຄົດ.
ທີ່ມາ: Vientiane Times
